Se mba gberen ityakerada ken ijô i hemban er 600 nahan sha er se pase “loho u dedoo” sha afatyô wase cii hen “hanma ikyurior man hanma nongo man hanma zwa man hanma nongoior” yô. (Mpase 14:6) Se mba eren zegetom ne nena? Se mba eren u sha iwasen i ior asev mba ngeren kwagh mba sha tar cii kua mbagemankwagh mba kuman iyenge er 3,000 nahan, mba ve lu Mbashiada mba Yehova yô.

Ka i hii ngeren ityakerada yase ken zwa Buter. Ka Mbahemenev Mba Shin Itine ve nengen sha Gbaatom u Ngeren Kwagh, u a lu shin afishi a ase a shin itine la ye. Ka gbaatom ne a nengen sha kwagh u nan mbangerenkwagh mba ve eren tom shin afishi a shin itine, kua hen ubranci asev mbagenev la atineakaa a vea nger kwagh sha mi ye. Er se lu a mbangerenkwagh mba lun a mfe sha akaa wuee yô, ka se nger kwagh sha atineakaa a a bende a ior mba ve dugh sha ajiir kposo kposo yô, nahan ityakerada yase doo ior mba ken ityar wue wue.

Ka a ngeren ityakerada ne a been yô, i tindi a mi hen mbagemankwagh. Ka a ngeren kwagh a sôron shi a lumun a mi cii yô, i tindi a mi sha Intanet hen mbagemankwagh asev mba sha tar cii, mba ve gem kwagh ken ijô kposo kposo la, nahan ve gema kwagh u i tindi a mi la, shi ve sôr un tsembelee. Ka ve ker “akaaôron a mimi,” a aa pase kwagh u i nger ken zwa Buter la ken zwa ve vough yô.—Orpasenkwagh 12:10.

Ukômputa ka ve wase mbagemankwagh ve er tom ve fele fele. Kômputa una fatyô u karen tilen sha ityough ki uumace mba ve ngeren kwagh kua mba ve geman kwagh la ga. Nahan cii kpa, kômputa mba i eren tom a mi la man udikishenali mba sha kômputa kua akaa agen a sha kômputa a tôvon kwagh a mi ka a wase mbangeren man mbagemankwagh u eren ityom ve fele fele. Mbashiada mba Yehova var kwagh ugen u sha kômputa u a wasen ve u gberen ityakerada ken ijô kpishi hen shighe môm yô, mba yer un ér Multilanguage Electronic Publishing System (MEPS). Ka i nyôr a ngeren mba ken ijô uderi imôngo, kua ufoto mba i gbe u a wa ken ngeren mba shon la sha MEPS ne, shi i sôr ve i ver vough vough sha u a gber yô.

Er nan ve ijô i i lu ior udubu kpuaa tseegh ve lamen i la je kpa, se lu nôngon kpoghuloo geman ityakerada kere? Se mba eren nahan sha ci u ka ishima i Yehova u “ior cii ve̱ war ve̱ ar sha mfe u fan mimi la.”—1 Timoteu 2:3, 4.

• Ka tom u nyi i eren sha u ngeren ityakerada yase?

• Se mba gem ityakerada yase ken ijô kpishi sha ci u nyi?