Hii nan ve i saan ior mban iyol yum nahana? Saan ve iyol kpishi sha ci u ve za mkohol wase ugen. Ka se veren ashe a kumban imôngo sha mbamkohol asev mba vesen, vough er yange i wa mbacivir Aôndo mba sha ayange a tsuaa mbara kwagh ér ve kumban imôngo kwa tar ken inyom nahan. (Duteronomi 16:16) Hanma inyom yô, ka se lu a mbamkohol utar: ka sema mkohol u iyange i môm man mkohol u ningir u ayange a har man mkohol u vesen u ayange a tar. Ka se zua a mtsera ken mbamkohol mban nena?

Mbamkohol ka ve wase se se hemba lun ken mzough vea anmgbianev asev mba ken Kristu. Er yange i doo Mbaiserael u wuese Yehova “ken mbamkohol mba iorov” nahan, kape se kpa ka i doo se u civir un imôngo sha mbamkohol asev mba vesen je la. (Pasalmi 26:12; 111:1) Mbamkohol mban ka ve bugh se ian i zuan ishigh a Mbashiada mba ken atôônanongo agen shin mba ken ityar igen, shi lun a ve imôngo kpaa. Ka a va luun atetan yô, se ya kwaghyan imôngo hen ijiir i i kombo mkohol la, nahan kwagh ne a na i hemba saan se iyol hen mbamkohol asev. (Aerenakaa 2:42) Ka sea za mbamkohol asev mba vesen mbara yô, se nenge a dooshima u a lu hen atô u “anmgbianev asev” mba ve lu ken “mzough” sha tar cii la.—1 Peteru 2:17.

Mbamkohol mba wasen se u vesen ken jijingi. Shi Mbaiserael yange ve zua a mtsera sha u ‘kaven akaaôron’ a ken Ruamabera a i pase ve wanger wanger la. (Nehemia 8:8, 12) Se kpa akaawan a ken Bibilo a ka se ungwa sha mbamkohol asev la nga se a inja kpen kpen je. Hanma mkohol yô, ngu a lu a itinekwagh i i dugh ken Ruamabera yô. Akaaôron a doon ungwan, a ka i ôr sha mkohol la man anumbe a tiônôô, a ka i er sha u tesen kwagh u a vande eren la, ka a wase se u fan er se er ishima i Aôndo ken uma wase yô. Ka sea ungwa mbagenev vea pase er ve lu tagher a akaa a karen jighjigh ve u nan ken ashighe a ican ne, kpa ve til dông nahan, ishima i taver se kpen kpen. Ka a za mbamkohol mba vesen yô, i er anumbe, a ka a wase se u nengen er akaa a i nger ken Bibilo la yange er kpôô kpôô yô, shi a tese se akaa a wasen se ayange ayange. Sha hanma mkohol yô, ka i er mba ve soo u tesen ken igbar ér ve tsegha ayol a ve sha u civir Aôndo la batisema.

• Mbamkohol ka ashighe a saan iyol sha ci u nyi?

• U fatyô u zuan a mtsera sha u zan mkohol nena?