Bibilo ôr kwagh u ikwe ihiar i nomso mba ken Kristu mba ve eren ityom ken nongo u Kristu yô, ka “mbakuran kua udiakon” je la. (Mbafilipi 1:1) Ken atôônanongo kpishi, mbatamen man udiakon mba je kuma ityough imôngo. Ka ityom i nyi udiakon ve eren sha ci u iwasen yase?

Mba wasen mbatamen tom. Udiakon ka nomso mba ve lu a gbashima sha akaa a ken jijingi, shi i ne ve jighjigh shi ve veren ishima sha tom ve tsembelee yô. Mbagenev ken a ve ka agumaior, mbagenev di ka mbaganden. Mba nengen sha ityom i hange hange i i eren ken tiônnongo yô. Ashighe kpishi ka i lu ityom i sôron akaa veren sha inja, man ityom igen i sha agee a iyolough. Kwagh ne ngu a na mbatamen ve hemba veren ishima sha tom u tesen anmgbianev ken atôônanongo shi wasen ve u taver ken jijingi.

Mba eren ityom i lun se a iwasen. Udiakon mbagenev ka mba sôron mtem, mba i we ve tom u ngohol hanma or u nan za ve mkombo wase cii yô. Mbagenev di ka i wa ve tom u nengen sha mbaanar mba samber a iliam, shin tom u nengen sha ityakerada shin u nengen sha inyaregh ki ma tiônnongo gayô tom u nan ior mba ken tiônnongo uharegh mba vea za pase kwagh her yô. Shi ka ve wase u sôron Iyou i Tartor. Ashighe agen, mbatamen ka ve tindi ve ér ve za na mbabeenyol iwasen. Udiakon ka ve er hanma tom u i ne ve u eren cii sha gbashima, nahan mba ne ve icivir ken tiônnongo ve sha ieren ve i tangen iyol ga la man tom u ve eren kpoughuloo la.—1 Timoteu 3:13.

Er ve lu nomso mba ken Kristu yô, mba veren ikyav i dedoo. Ka i tsua udiakon sha ci u mba a aeren a dedoo a Mbakristu la. Ka vea naan akaaôron ken mbamkombo yô, ve taver jighjigh wase u nan. Er ve veren ikyav i dedoo ken tom u pasen kwagh yô, ka ve na se seer lun a gbashima. Er ve eren tom ken ijoughave vea mbatamen yô, ka ve na i saan anmgbianev iyol shi ve hemba lun ken mzough kpaa. (Mbaefese 4:16) Shighe ka una karen yô, ve kpa ve kuma u eren tom u mbatamen.

• Udiakon ka unô ioro?

• Udiakon ka ve wase tionnongo sha u akaa a za hemen tsembelee nena?