Shighe u aahe a er yô, Mbashiada mba Yehova ka ve kohol iyol fese ve za na anmgbianev vev mba aahe a bende a ve la iwasen. Iniôngon ne ka i tese ér dooshima u a lu hen atô wase la ka u mimi. (Yohane 13:34, 35; 1 Yohane 3:17, 18) Se mba wasen mba aahe a er ve la nena?

Ka se tindi ve a inyaregh. Shighe u zege ijen gba ken Yudia la, Mbakristu mba ken Antioki mba sha ayange a tsuaa la tindi a inyaregh hen anmgbianev vev mba ken Kristu mba ken Yudia mbara. (Aerenakaa 11:27-30) Nahan se kpa, ka sea ungwa ser anmgbianev asev mba ken tar ugen mba yan ican yô, se tindi a inyaregh sha ikyev i tiônnongo wase sha er a tindi mba ve lu ken ibanave tsung mbara a akaa a aa lu ve a iwasen yô.—2 Mbakorinte 8:13-15.

Ka se na iwasen sha igbenda igen kpaa. Mbatamen mba ve lu hen ijiir i aahe a er la, ka ve ker anmgbianev mba ken tiônnongo sha u vea zua a ve cii shi vea fa aluer mba doo doo yô. Komatii u wasen mba aahe a er ve la ngu a nenge sha gbaa u nan ior kwaghyan man mngerem ma man ma dedoo man akondo man ijiir i tsan la, kua iwasen i sha kwagh u tweregh. Mbashiada kpishi mba ve fe ityomaveegh i kwagh a gbe sha mi yô, ka ve na ayol a ve, shi ve vihi inyaregh sha u zan sha ajiir a aahe a er la za nan iwasen shin sôron uya man Ayou a Tartor a a vihi la. Er nongo wase u eren kwagh ken mzough shi se zough a mfe sha u eren tom imôngo yô, kwagh la ka a wase se u kohol iyol fese karen a kar shighe u kwagh a gbe yô. Shin er i lu “mbananjighjigh” a vese imôngo mbara se ne ve iwasen nahan kpa, ka a gba sha mi yô, se na ior mba ken ukwaghaôndo mbagenev kpaa iwasen.—Mbagalatia 6:10.

Ka se taver ve ishima shi se ôr ve avur a ruamabera a surun ve ishima. Ka mba aahe a er ve la ka i hemba gban u a sur ve asema ye. Shighe u aahe a er yô, ka se zua a agee hen Yehova, “Aôndo u A lu a ishimasurun cii” la. (2 Mbakorinte 1:3, 4) Ka i saan se iyol u pasen mba ishima i yen ve la uityendezwa mba ken Bibilo, shi ôron ve ser ica ia gba ga tsô, Tartor u Aôndo ua kar a uaahe mba ve ve a mnyoon man ican la cii kera.—Mpase 21:4.

• Ka nyi ka i wase Mbashiada mba Yehova u nan anmgbianev vev iwasen fele shighe u aahe a ere?

• Ka se sur mba ve war aahe la asema sha kwaghôron u ken ruamabera nena?