UPROFETI mba sha ayange a ngise mbara yange ve na Aôndo jighjigh. Ve na uityendezwa nav jighjigh, nahan uma ve cii har sha uityendezwa mba shon. Uityendezwa mbara kua nyi kpa kere?

Adam man Ifa yange mba hembe a hemba Aôndo ato nahan, maa Aôndo er ityendezwa ér una tsua or u nana cagh “iyô” la ityough, nana tim i kera gbem sha won yô; iyô shon ka “zegedarakon . . . , ka tseyô je la, u i yer un er Diabolo man shi Satan la.” (Genese 3:14, 15; Mpase 12:9, 12) Ka an nana lu or u Aôndo tôndo zwa ér nan ngu van laa?

Yehova ôr kwaghôron u profeti ne anyom nga kar er 2,000 nahan yô, maa a tôndo zwa a profeti Aberaham ér un shon u á lu van la una due ken tsombor na. Aôndo kaa a Aberaham ér: “Akuraior a sha won cii aa zua a iveren ken tsombor [shin vor] wou, sha ci u, u we imo Yam ikyo yô.”—Genese 22:18.

Ken inyom i 1473 C.S.Y. (Cii man Shighe u Yesu) la, Aôndo seer pasen profeti Mose kwagh u “vor” la. Mose kaa a ônov mba Iserael ér: “TER, Aôndo wou, Una ver u Profeti, Una due hen atô wou ken anmgbianev ou je, er mo nahan, ka Un né ver ato sha a Na ye.” (Duteronomi 18:15) Nahan profeti shon u i kaa ér ngu van la, una due ken ônov mba Aberaham er Mose kpa lu wan u Aberaham nahan.

Profeti la shi una lu wan u Tor Davidi kpaa, shi un iyol na kpa una hingir zege tor. Aôndo yange tôndo zwa a Tor Davidi ér: “Me ver wan wou ken ijime you [man] Me ver ikyônough nagh ki torough kia lu gbem.” (2 Samuel 7:12, 13) Aôndo shi pase ér or u ken tsombor u Davidi ne, a yilan un  ér “Wantor u Bem,” shi a kaa kpaa ér: “Mseer u tarkuran kua bem vea lu a ikighir je ga, sha ikyônough ki torough ki Davidi man sha tartor na kpaa, sha er á ver u dông u̱ lu taveraa sha ijirôron i vough kua sha perapera, hii hegen je zan zan gbem sha won.” (Yesaia 9:6, 7) Sha kpôô yô, Tor u perapera ne una hide a va a bem sha tar kua perapera kpaa. Kpa lu u Tor ne una va hanma shighee?

Ortyom Gaberiel va ôr profeti u Aôndo, Daniel, ken masejime ér: “Fa man kav kpaa, hii sha mdugh u tindi sha u sôron man u maan Yerusalem zan zan ar hen u i shigh Un mkurem, ka Tor je la, á lu ulahadi utaankaruhar; man ulahadi akunduatar kar uhar.” (Daniel 9:25) Ulahadi mba shon lu ulahadi mba anyomov 69, hanma lahadi yô lu anyom 7, nahan kohol cii yô lu anyom 483. Shighe ne hii ken inyom i 455 C.S.Y. zan zan inyom 29 la. a

Mesiya, profeti u lun er Mose nahan, u lu “vor” shon u i kegh mve u ú shighe gôgônan la yange va ken inyom i 29 la mimi kpa? De se tôv sha kwagh ne se nenge.