TAR u ainge ngee a mbamzeyol kpishi. Ityav man uaahe man angev man ibanave man anyighe man akaabo agen tser ior umiliôn imôngo. We kpa alaghga akaa nga a ishima i ze u iyol sha mi ayange ayange yô. Ka an nana wase se? Ma or wa se ikyo je kpa?

Mimi je Aôndo wa se ikyo. A ôr ken Icighan Takerada na la ér: “Wan u man atumba una hungul ngô na je kpa, mhôônom maa kôr un a wan u a dugh ken iyav nav la gaa? Shin ve yô, á hungul ve, kpa Mo yô, ú hungur Mo ga.” a

Kwaghôron ne ka u surun se asema ga he? Dooshima u ngô ka nan lu a mi sha anikyundan u nan la ka môm ken igbenda i vesen i uumace ve tesen dooshima yô, kpa dooshima u Aôndo gema hemba ngula ica je. Mayange je Aôndo una undu se ga! Sha kpôô yô, Aôndo vande wasen se sha gbenda ugen u doon tsung kera je. A er kwagh ne nena? A tese se ér aluer se mba a jighjigh u nan u mimi yô, a saan se iyol.

Aluer u ngu a jighjigh u nan u mimi yô, u zua a msaanyol. Imba jighjigh u nan ne una wase u ú palegh mbamzeyol kpishi shi ú wa ishima a mbamzeyol mba i lu kwagh u ú fatyô u palegh ve ga la kpaa. Shi jighjigh u nan ne una kporom a we hen Aôndo, nahan u zua a mmem ken ishima. Shi aluer u ngu a jighjigh u nan u mimi yô, mlu wou u ken hemen la una doo kpen kpen, inja na yô u zua a uma u tsôron.

Kpa kanyi i lu jighjigh u nan u mimi? Man u er nan ve u lu a mi?