AÔNDO yange gba mbatyomov ver ve sha, ica gba cii ve mase gban orumace ye. Kpa shighe kar yô, icivir i i gbe u a naan Aôndo tswen la hii u saren ortyom ugen. Tsô a er kwagh u ivin isharen na la, nahan a gema iyol na hingir Satan, man ikyav i ishember ne yô ka “Orhendankwagh,” inja na yô ka or u hendan kwagh a Aôndo. Satan hendan kwagh a Aôndo nena?

Satan bume Ifa sha u a hemba Aôndo ato yô. Yange ôr kwagh sha atseregh u tesen ér, er Yehova Aôndo yange Ifa u yan atam a kon ugen yô, ngu nyumen un kwagh u dedoo. A yila Aôndo aie sha cihi shi a ôr kwagh u tesen ér doo u Ifa una venda hemen u Aôndo; a kaa ér: “Aôndo fa iyange i né ya a la, iyange la ashe aa bugh ne, né hingir er Aôndo nahan, né gba fan kwagh u dedoo man kwagh u bo.” (Genese 3:5) Ifa lumun mbaaie mba Satan er la sha ibume je. A per tindi u Aôndo, shi a na Adam kpa per tindi u Aôndo la. Hii shighe la je, Satan hingir orihyom u mbalun a jighjigh u nan u mimi. Man a za hemen u tsughun ior zan zan nyian. Ngu eren kwagh ne nena?

Satan yange hôngor ônov mba Iserael sha eev mbu civir man sha aeren a uter. Yesu, u lu Mesiya la kaa a mbahemenev mba kwaghaôndo u Mbaiserael la ér mcivir ve la ka u gbilinigh, gadia ve lu tesen “atindi a ior tsô.” (Mateu 15:9) Zum u ikyurior la venda Mesiya yô, Aôndo kpa venda ve. Yesu kaa a ve ér: “Á ngohol tartor u Aôndo hen a ven kera á na ikyurior i ia ume atam yô.” (Mateu 21:43) Hen shighe la mbadondon Yesu hingir ior mba Aôndo a lumun ve yô.

Tsô Satan shi gba nôngon kpoghuloo sha u una hôngor mbadondon Yesu kpaa yô. Yange kôrcio kpa? Yesu tsengaôron kwagh u una va er yô, ken injakwagh na igen i í lu kwaghôron u profeti yô. A ôr ken injakwagh la ér, orgen lôô uwua u dedoo ken sule. Ayange nga kar yô, orihyom va lôô ivor i bo ker atô u uwua. Tsô i de ivor ne cii vese imôngo zan zan shighe u sunda. Maa i pav ivor i bo la kposo a uwua la, nahan i nande i kera. Kpa uwua la yô, i kohol u cii i za ombo u ken wuna u orsule la.

Yesu been injakwagh la yô, a pase mbahenen nav ikyav i injakwagh shon. Ka un iyol na a lu Ortanivor la ye. “Ivor i dedoo la yô,” a kaa ér “ka ônov mba tartor; ivor i bo la gema ka ônov mba iferor. Orihyom u a lee i la yô, ka diabolo; sunda la yô, ka mkurtar; mbasundan mbara yô, ka mbatyomov mba Shaav.” (Mateu 13:38, 39) Yesu kaa ér mbahenen nav mba mimi mba er ka uwua nahan. Kpa Satan gema va lôô mbahenen mba aiev, er ka ivor i bo nahan ker atô u mbadondon Yesu mba mimi mbara. Er Yesu iyol na tsengaôron nahan, yange kpen kera uderimbaanyomov mba ngur karen yô, mbahenen mba aiev hii u duen. Ve gba samber a atesen a aiev, inja er ityesen i Ter man Wan man Icighan Jijingi Ka Aôndo Môm la nahan; ityesen ne kaa ér iorov mba utar ken Aôndo môm. Mbahenen mba aiev mban shi hii u civir ieev shi eren pati. Lu iorov kpuaa tseegh za hemen u dondon atesen a Yesu la ye.

Nahan kpa, er Yesu pase nahan, lu u ken hemen yô kwagh a kôr a gema. Mbatyomov mba Aôndo vea pav mbalun a jighjigh u nan u mimi ga la vea ver kposo sha er a tim ve kera yô. Hen shighe la, mbalun a jighjigh u nan u mimi la vea kera lu ilian ga. Ken masejime yô, a tim Satan Diabolo, un u a lu orihyom u hiihii, u jighjigh u nan la kera. Nahan, jighjigh u nan u mimi una hemba!

Nahan kpa, u er nan ve u fa ior mba ve lu a jighjigh u nan u mimi la nyiana? Se time sha mlumun u sha mpin ne ken ityough ki dondon kin.