ICIGHANRUAMABERA pase se aeren a Aôndo a lu a mi kpishi, a doon tsung la, nahan se fa un. U tesen ikyav yô, Ruamabera pase se aeren a vesen a Aôndo anyiin, a yô ka tahav man perapera man kwaghfan man dooshima. De se time sha aeren ne môm môm.

Yehova yange kaa a Aberaham ér: “Mo M ngu Aôndo Uhembanagee.” (Genese 17:1) Or môm ngu a tahav er un nahan ga; una fatyô u eren nyityôkwagh cii, shi tahav nav mbu a ikighir mayange ga. Aôndo yange gba usha man tar ne sha tahav nav.

Aôndo eren kwagh a tahav nav sha gbenda u injaa tseegh. Hanma shighe yô, eren kwagh a tahav nav sha inja man sha gbenda u van a iwasen. Eren kwagh a tahav nav sha gbenda u ú zough sha perapera na man kwaghfan na kua dooshima na vough yô.

Yehova eren kwagh a tahav nav mgbeghaa sha ci u mbatomov nav mba jighjigh. “Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kroniku 16:9) Kwagh u Aôndo u a lu a tahav kpishi kpa a gem a we se ikyo ne doo u ga he?

“Kwagh u mimi [shin perapera] doon TER ishima.” (Pasalmi 37:28) Hanma shighe yô, eren kwagh u vough man u shami, u a zough sha atindiakaa a na aa a lu a mshi sha mi ga la.

Aôndo kôr ifer ihyom. ‘Sangen a sange ga, ngohol inyaregh ki yamen ishô kpaa ga.’ (Duteronomi 10:17) Hendan a mba ve nzughul a mbagenev la, shi nenge kwagh sha ci u mba ve lu a mpe iyol ga, er “ma kwasecôghol . . . shin ancôghol” nahan. (Ekesodu 22:22) Aôndo eren kwagh a uumace cii a msange shio. “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.”—Aerenakaa 10:34, 35.

Yehova tesen perapera na la sha inja, vough-koko. Hee iyol inya sha kwagh ga, shi a wa tswam kpaa ga. Tsahan mbaasorabo mba ve vende u geman asema la, kpa gem zungu mba ve gem asema la mhôônom. “TER mgbough a mhôônom ma zungwen kua mrumun u sha mhôôn, we ishima, erdoo Na ngee wuee; zehe gbem ga, ishima i nyoon Un gbem kpaa ga. A or se iyev sha asorabo ase ga, A na se injar i sha aferakaa ase la kpaa ga.” (Pasalmi 103:8-10) Shi Aôndo umbur aeren a sha jighjigh a mbatomov nav, nahan ngu a ver ve  doo doo. Aôndo u a tesen imba perapera ngun ne nahan á kuma u ú suur sha a na ga he?

Yehova ka imbor i kwaghfan cii. “Mze u ikpelaakaa man mfe man kwaghfan u Aôndo ve za kweng ne!” (Mbaromanu 11:33) Kwaghfan na hemba hanma kwaghfan ugen cii shi ngu a ikighir ga.

Se mba nengen a kwaghfan u Aôndo ken akaa a a gbe la wanger wanger. Orpasalmi yange kpiligh iyol kaa ér: “Kpash! TERE, ityom You ngi atô kposo kposo, U er i cii sha kwaghfan.”—Pasalmi 104:24.

Icighanruamabera kpa pase se kwaghfan u Aôndo. Tor Davidi nger ér: “Mpase u TER ka u jighjigh, ka a na orlanenkwagh nan hingir orfankwagh.” (Pasalmi 19:7) Nenge kwagh u doon sha wono—inja na yô u fatyô u zuan a mtsera ken kwaghfan u Aôndo u a lu a ikighir ga la! Nahan u lumun u dondon kwaghfan na la kpa?

Dooshima ka ieren i Yehova i hemban cii. Ruamabera kaa a vese ér, “Aôndo ka dooshima.”  (1 Yohane 4:8) Dooshima mgbeghan un shi wasen un u eren hanma kwagh u a eren cii.

Aôndo tesen se dooshima na sha igbenda kpishi. Ne se akaa a dedoo. “Eren akaa a dedoo, . . . nôôn ne ura u senen sha, . . . ivin asema a en a kwaghyan man msaanyol kpaa.” (Aerenakaa 14:17) Sha kpôô yô, “hanma nagh ku dedoo man hanma iyua i vough kpaa ka Sha hen Ter u iwanger ve dugh, ve senen ye.” (Yakobu 1:17) Aôndo pase se mimi sha kwagh na a tese se atindi na kua akaawan a na a doon la ken Ruamabera u a lu iyua i doon tsung la. Yesu yange er msen kaa ér: “Ka kwaghôron Wou je a lu mimi ye.”—Yohane 17:17.

Aôndo shi wasen se ken mbamzeyol asev. “Haa akaa a zan we iyol cii sha TER, tsô Una taver we; Una lumun er i̱ tenger a mbaperapera mayange ga.” (Pasalmi 55:22) Den se asorabo a ase. “We, Tere, U doo, U kegh iyol u den kwaghbo, erdoo Wou ngee a mba ve yer sha iti You cii.” (Pasalmi 86:5) Shi a kaa ér una na se uma u tsôron je kpaa. “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga.” (Mpase 21:4) Nahan u er nena sha dooshima u Aôndo a tese u nee? Una doo u ishima er we kpa u doo un ishima nahan kpa?

Aôndo soo ér we u fa un tsembelee. Mkaanem nam taver we ishima ér: ‘Kporom hen Aôndo, Un kpaa, Una kporom her a we.’ (Yakobu 4:8) Aôndo yange yila profeti u jighjigh, Aberaham, ér “huror Wam.” (Yesaia 41:8) We kpa, Yehova soo ér u lu huror na.

Er u lu henen kwagh u Aôndo seer la, kape u lu hemban lun ikyua a na shi a lu hemban saan we iyol kpaa je la. ‘I saan or u atindi a TER a lu kwagh u gban nan ishima la iyol, shi nan zeren henen atindi a Na ken ishima tugh kua tetan kpaa’ la. (Pasalmi 1:1, 2) Sha nahan yô, za hemen u henen Icighanruamabera. Henen sha aeren a Aôndo man ityom na kpaa. Tese wer Aôndo doo u ishima sha u eren tom sha kwagh u ú lu henen la. “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yohane 5:3) Nahan yô, er msen er ngise orpasalmi er nahan, yange kaa ér: “TERE, nam, m̱ fa igbenda You, tesem ihiange You. Hemen mo ken mimi Wou.” (Pasalmi 25:4, 5) Nahan u mase kaven wer Aôndo ngu “ica a hanmô wase ga.”—Aerenakaa 17:27.