Vegher 13
Jighjigh u Nan u Mimi Ve a Msaanyol u Tsôron
Icighanruamabera kaa ér: “Or u perapera yô, ka sha jighjigh u nan man nana lu uma ye.” (Mbaromanu 1:17) Mkaanem man ôr ityendezwa igen i doon tsung, i we kpa i̱ bende a we yô. I̱ bende a we sha nyi igbenda?
Yesu u a lu Mesiya la, yange kur tom na shin tar ne yô, kôndo yem sha sha u za lun vea Aôndo imôngo. Er mbahenen nav lu kenger la, ve nenge “i tôô Un i yem a Na Sha; . . . ibeenegh maa ngohol Un sha ashe ve.” (Aerenakaa 1:9) Er lu sha la, Aôndo tsua un ver un ér a̱ lu tor u ageegh, u sha. Ica a gba ga tsô, Yesu, un u a lu “Wan u or” la una va “sha iengem Na a mbatyomov mba Shaav cii a Na imôngo . . . , zum la Una tema sha ikyônough Nagh ki torough ki engem la; á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan.” (Mateu 25:31, 32) Ka hanma shighe man kwagh ne una eree?
Icighanruamabera tsengaôron kwagh u shighe u mbamzeyol vea ngee shin tar, man mbamzeyol mban vea lu ikyav i tesen ér shighe mgbôghom u Mesiya una ôr akuraior ijir yô. Yesu pase akaa agen a aa lu ikyav la yô ér: “Ikyurior igen ia mough num a ikyurior igen; tartor ugen kpaa ua mough num a tartor ugen. Ityartenger i vesen ia lu sha ajiir kposo kposo, kua ijen man ubombauangev kpaa; man akaa a cieryol man uivande mba vesen kpaa vea due sha aôndo.”—Luka 21:7, 10, 11.
Mbamzeyol mba ainge mban tese ér ica a gba ga tsô Mesiya una ôr akuraior cii ijir
Nyian ne, se nenge wang er mkaanem ma Yesu man ma lu kuren sha mi yô. Ica a gba ga tsô, Yesu una va sha u va timin mbaaferev. Ken masejime yô, a tim Satan iyol na kpaa! Tar jimin cii ua hingir Paradiso. Akuraior cii aa lu ken bem ayol a ve man vea inyamtoho je kpaa. “Gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve. Vea vihi kwagh ga, vea tim kwagh . . . kpaa ga.” (Yesaia 11:6, 9) “Ma or u nan tem ker kpaa nana kera kaa er: Kwagh nyoon mo, ga; . . . Tsô á bugh mbaapirashe ashe, man á bugh mbakondonato ato.” (Yesaia 33:24; 35:5) Mbakpenev je kpaa, a va nder ve. “Ter AÔNDO Una ese mliam sha ishiv mbi iorov cii,” man “ku ua kera lu ga, shin ijungwen shin mliam shin ican kpaa ia kera lu je ga.” (Yesaia 25:8; Mpase 21:4) Awashima u Aôndo lu a mi sha hiihii sha ci u tar ne la una kure hen shighe la. Ishimaverenkeghen ne ka i doon kpen kpen!
Za Hemen u Vesen ken Jighjigh Wou u Nan
Ka unô ior Aôndo una na ve uma ken Paradiso? Ka ior mba lun a jighjigh u nan—jighjigh u nan u mimi la!
Umbur wer jighjigh u nan u mimi har sha mfe u vough u a lu ken Mkaanem ma Aôndo la. Sha nahan yô, za hemen u seer fan Aôndo man Yesu!
Ior mba lun a jighjigh u nan vea ember uma ken Paradiso gbem sha won!
Jighjigh u nan u mimi lu a aeren a perapera. Mkaanem ma Aôndo kaa ér: “Jighjigh u nan u lun a aeren ga . . . [ngu] kpenegh.” (Yakobu 2:26) Aluer u ngu a aeren a dedoo ne yô, u kôr cio u lun a anza a Aôndo a doon tsung la, ka tahav man perapera man kwaghfan kua dooshima na je la. Za hemen u nôngon wer u lu a aeren a Aôndo ne!
Aluer u ngu a jighjigh u nan u mimi yô, u zua a averen ngôgh. Sha kpôô yô, jighjigh u nan u mimi ne ka kwagh u vesen u una na a saan we iyol hegen zan zan gbem sha won yô!
