IOR mba civir mbaaôndo kpishi. Kpa Icighanruamabera tese ér Aôndo u mimi ngu môm tseegh. Ngu kposo a mbaaôndo mbagenev cii, shi un ka u hemban sha won cii shi ka u tsôron kpaa. A gba hanma kwagh sha man shin tar ne shi a na se uma. Sha nahan yô, ka un tseegh a kom u se civir ye.

Aôndo ngu a atiatom kpishi, kpa iti na jim jim ngi i môm tseegh. Iti shon ér YEHOVA. Aôndo yange kaa a Mose ér: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.” (Ekesodu 6:3) Iti i Yehova la due ken Icighanruamabera kuma er kwa 7,000 nahan. Pasalmi 83:18 ôr kwagh u Aôndo ‘u i yer iti na ér Yehova (NW)’ la ér ka un tseegh a lu “Uhembansha sha tar cii” ye.

Ma orumace môm nan ngu a nenge a Aôndo ga. Aôndo yange kaa a Mose ér: “Ú fatyô u nengen a ishigh Yagh ga; gadia or á fatyô u nengen a Mo, shi lun uma ga.” (Ekesodu 33:20) Aôndo ngu sha, nahan uumace vea fatyô u nengen a na ga. Ka shami u eren msen hen eev shin foto shin ma ikyav i tilen sha ityough ki Aôndo ga. Yehova Aôndo yange wa tindi sha ikyev i profeti Mose ér: “De gbe eev ga, shin kwagh u a bee ma kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga. De gur ve inya ga, shi de civir ve kpaa ga; gadia Mo TER, Aôndo wou, M ngu Aôndo u gban iwuhe.” (Ekesodu 20:2-5) Anyom nga va kar yô, Aôndo ôr kwagh a profeti Yesaia kaa ér: “Ka Mo TER [“Yehova,” NW], ka iti yam je ne; icivir Yam Me na orgen ga, iwuese Yam kpaa Me na ieev mbi gban a gba la ga.”—Yesaia 42:8.

Ior mbagenev na Aôndo jighjigh, kpa alaghga ve nenge ér Aôndo ka or u se fatyô u fan un shi kporom ikyua a na ga; a cier iyol gande u una doo se ishima. We u nenge nena? Kwagh wou gba Aôndo ishima je kpa? U fatyô u fan Aôndo jim jim, shi kporom ikyua a na je he? De se nenge nen kwagh u Ruamabera a er se sha kwagh u aeren a Aôndo yô.