AÔNDO yange gba tar ne sha u ú lu ijiir i uumace vea tema her a kpe ve iyol yô. Mkaanem nam kaa ér: “Usha ka Usha mba TER, kpa tar yô, A na ônov mba iorov.”—Pasalmi 115:16.

Cii man Aôndo gba Adam, or u hiihii la yô, a er sule u doonashe hen anijiir ugen shin tar, i yilan un ér Eden. Ruamabera kaa ér ifi u Uferati man Tigris (shin Hidekel) la due ken sule u Eden la. a I hen ér sule u Eden la yange u lu ken tar u hegen i yer u ér Turkey la, vegher u sha ityoughkitaregh ki tar shon. Sha mimi yô, sule u Eden la lu shin tar ne jim jim!

Aôndo yange gba Adam, ver un ken sule u Eden la sha u “a̱ sôron u man a̱ kuran u kpaa.” (Genese 2:15) Shighe kar yô, Aôndo gba kwase na Adam, iti na ér Ifa. Aôndo kaa a nom man kwase ne ér: “Mar nen kpishi, seer nen ngeen, iv nen tar, gema nen u, u̱ lu sha ikyev yen.” (Genese 1:28) Ikyav tese wang ér Aôndo “gba [tar] er u̱ lu gbilin dang ga, A maa u sha er ior ve̱ tema sha u” yô.—Yesaia 45:18.

Nahan kpa, Adam man Ifa hemba Aôndo ato, sha u peren tindi na sha apera. Nahan Aôndo zenda ve ken sule u Eden kera. Paradiso la saa ve. Kwaghbo u due ken isholibo i Adam la za hemen her. Ruamabera kaa a vese ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.”—Mbaromanu 5:12.

Yehova yange ta awashima na u hiihii u soo ér tar ne u lu paradiso, ior mba lun sar sar ve tema sha u la keraa? Ei! Aôndo kaa ér: “Kwaghôron Wam, u a dugh ken zwa Wam, una . . . hide her a Mo gbilin ga, kpa una er kwagh u M we ishima yô, ikyôr ia lagh un sha kwagh u M tindi un u eren yô.” (Yesaia 55:11) Tar ne ua hide a hingir paradiso!

Uma ken paradiso una lu nena? Ôr kwagh u uityendezwa mba ken Ruamabera mba i nger ken upeeji mba uhar mba dondon mban.