TÔÔ wer ortwer u he ugen sember va bughun iyouci hen ijiir you. Alaghga sha hiihii la, kwagh na wa shin we. Kpa aluer ahuraior ou agen za twer hen a na man a sôr ve twer tsembelee, angev bee ve di ye? We kpa a lu u ape zan twer hen a na ga zee?

Icighanruamabera ngu er ortwer la nahan sha igbenda igen. Ka i wa taver Ior mbagenev u gban ashe ker. Kpa ka vea dondo kwaghwan u injaa u a lu ker la yô, i kpe ve iyol ken uma kpishi. Nenge ase kwagh u ior mbagenev mba Icighanruamabera a wese ve yô.

Kwase ugen mba yer un ér Sumiatun, a kaa ér, “Shighe u se sember vôson ayol a ase la, m nenge mer orya wam, Dumas, wam ikyo ga. Ashighe kpishi ishima i vihim, m gba ngoron tuhwan un, keren un akaa shi tan un azu je kpaa. Ashighe agen yô, yange ishima i vihim kpishi je, m gba inya m hume.

“Zum u Dumas hii u henen Icighanruamabera la, m naha un tar. Kpa hanma shighe u una henen kwagh yô, m za tema myer ken ruumyou ugen u dondon, m gba ungwan kwagh u a lu henen la. Iyange igen yô, m ungwa i ôr avur agen, i kaa ér: ‘Kasev, ungwan nen imo i noov enev er ka Ter nahan . . . kwase . . . a̱ cia nom u nan.’ (Mbaefese 5:22, 33) Mkaanem man kôrom ken ishima kpen kpen. Tsô m sôn Aôndo mer a̱ dem isholibo yam i m tuhwan nomom la, shi m er msen mer a̱ wasem me hingir kwaseya u dedoo. Ica gba ga tsô maa mo vea Dumas, se gba henen Ruamabera imôngo.”

Icighanruamabera shi kaa ér: “Noov kpaa, kasev vev ve̱ doo ve ishima keng er ayol a ve nahan.” (Mbaefese 5:28) Sumiatun kaa ér: “Akaa a se lu henen ne bende a vese. Hii shighe la je Dumas una za kur tom yô, m kunde tii m na un, shi m gema lamen a na kundu kundu. Dumas kpa seer wan mo ikyo shi gema wasen mo u eren ityom i hen ya. Se cii se nôngo ser se ‘lu sar sar ayol a ase, se zungwen mhôônom, se deen ayol a ase kwaghbo.’ (Mbaefese 4:32) Kwagh ne na yô, dooshima wase man icivir i se naan ayol a ase la za hemen u seer. Se vôso ayol a ase hemba anyom 40 hegen, se mba imôngo saan saan. Kwaghwan u dedoo u ken Mkaanem ma Aôndo la yange war ivaa yase!”

Orgen mba yer un ér Tayib, a kaa ér: “Yange m nyoon ishima kpishi. M nôngon num kpoghuloo, ashighe kpishi m ta mbagenev mciem iyol a gbuuka. Shi m gbidyen kwase wam, Kustriyah; yange ishima ia vihim a na yô, m ta un iju m kende inya. Ior kpishi cian mo.

 “Iyange igen yô, m ôr mkaanem ma Yesu ma ma kaa ér: ‘M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la.’ (Yohane 13:34) Mkaanem man kôrom ken ishima kpishi, nahan m kange ishima mer me gema inja keng keng. Ishima yange ia vihim ker kpishi yô, m er msen hen Aôndo mer a̱ wasem sha er me kundu ishima yô. Ica ia gbaan ga yô, maa ishimavihin la i pande. Mo vea kwase wam se dondo kwaghwan u a lu ken Mbaefese 4:26, 27, ua kaa ér: ‘Iyange i̱ de been ne a ishima i vihin her ga. De ne nen diabolo ian ga’ la. Hanma tugh yô, se ôron Ruamabera shi se eren msen hen Aôndo. Nahan ishima i̱ kera nyian se sha mbamzeyol mba se tagher a mi ken iyange la ga shi kwagh ne wase se u seer doon ayol a ase kpaa.

“Hegen ne hanma or fam ér m ngu or u lun a bemshima. Kwase wam kua ônov av soom shi mba nem civir kpaa. M ngu a azende kpishi, shi m hemba ngun ikyua a Aôndo. Sha mimi yô, saan mo iyol.”

Orgen mba yer un ér Goin, a kaa ér, “Yange m zenden vea agumaior agen a wan tswam, shi m maan taav kpoghuloo; ashighe kpishi m hunde msôrom, m gba sha godobi, m yav her tugh zan zan sev puaa. Shi m maan mcimbim ma bom shi m teen ma kpaa, er ikya kua icigh ki bogh ki i yer ér ecstasy la nahan. M yeren mcimbim man ken avav wam u yangen agbo a gbuuka la. Shin er m cier iyol shi m eren kwagh sha nomor nahan kpa, hanma shighe yô, m lu ken mcie.

“Iyange igen yô, orgen tesem ivur ruamabera ne, i kaa ér: ‘Wan wam, ityesen yam i̱ de hungur we ga . . . gadia vea seer we ayange á ngee, man anyom a uma kua bem kpaa.’ (Anzaakaa 3:1, 2) Yange sarem tsung u ayange a uma wam a ngee shi m  soo bem ken uma wam kpaa! Shi m ôr ivur ne kpaa, i̱ kaa ér: ‘Ne mbadoon mo ishima, er se lu a uityendezwa mban yô, se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.’ (2 Mbakorinte 7:1) Nahan m de u man mcimbim ma bom shi m pav ijende a azende am a wan tswam la, maa m hii u civir Aôndo.

“M de u man mcimbim ma bom kuma anyom 17 hegen. Nahan m ngu gbong gbong shi tsombor wam kpa saan u iyol, shi m ngu a azende a dedoo man imoshima i wang kpaa. Er ma m hunden msôrom, ma m tsaan sha godobi la yô, hanma tugh ka m yav sha gambe wam kundu kundu.”

Orgen mba yer un ér Bambang, a kaa ér: “Shighe u m lu gumor la m eren aferakaa kpoghuloo, man ior mba m bulan ve la kpishi lu ior mba lamen zwa u kiriki ugen, u m kôr u ihyom yô.

“Kpa shighe kar yô, m gba nôngon mer me fa Aôndo. Iniôngon yam ne wasem u zuan a nongoior ugen u u kohol imôngo sha u henen Icighanruamabera yô. Yange m ze mkombo ve la yô, m zua a ior mba lamen zwa shon u m kôr u ihyom la, ve sughum doo doo! Shi m nenge ior mba lamen ijô kposo kposo ken nongo ne, lu imôngo ken mzough shi lu sar sar ayol a ve. Kwagh ne kpiligh mo iyol kpishi! Nahan m mase kaven ivur ruamabera i i kaa ér: ‘Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan’ la.—Aerenakaa 10:34, 35.

“Nyian ne, m dugh ihyom i kôron ken a mo kera. Azende am agen ka ior mba lamen zwa shon u yange m kôr u ihyom yum la. Aôndo tesem ken Icighanruamabera u soon mbagenev.”

Orgen mba yer un ér Garoga, a kaa ér: “Shighe u m lu gumor la, i wuhem ken purusu acin atar; i wuhem kwa har sha ci u m ii, kwa môm di lu sha ci u m kuma orgen ihyô. Ken masejime yô, m hingir u  za kohol nongo ugen u shoja-petali, nahan m wua ior kpishi. Ityav mbira mbi been yô, m hingir orvesen u nongo u mbaiv mbagenev, se anger ior se ngohol ve akaa sha igyosough. Mbakuran av zenden a mo hanma ijiir cii. M lu nomsoor u wan tswam, u vihin kwagh kpe kpe.

“Iyange igen yô, m ôr ivur ruamabera ne: ‘Dooshima we ishima, lu sar sar, gbe iwuhe ga; dooshima gengese iyol ga, moron iyol kpaa ga, we dang ga, keren kwagh na iyol na tsô ga, nyoon ishima ga, koson kwagh u bo ken ishima ga.’ (1 Mbakorinte 13:4, 5) Mkaanem man kôrom ken ishima. Nahan m mough m yem ijiir igen, m za hen Ruamabera, shi m dondo kwaghwan u a lu ker la kpaa.

“M kera ngu ipilaor hegen ga. Kpa ior mba nem icivir hegen sha ci u m tesen ior Mkaanem ma Aôndo. M fa ityôkyaa i m lu uma yô, shi saan mo iyol kpaa.”

Kwagh u ior mba se er akaa a ve sha heen ne man u ior mbagenev udubu udubu la cii tese ér “mkaanem ma Aôndo ma uma je, ma tem gbilin ga.” (Mbaheberu 4:12) Kwaghwan u ken Mkaanem ma Aôndo taver ga shi una fatyô u wasen se shi taver se asema kpaa.

We kpa Icighanruamabera una fatyô u wasen wee? Een, una wase u, a̱ lu nyityô mzeyol u tagher a mi ken uma wou je kpaa. “Icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo.”—2 Timoteu 3:16, 17.

Nahan yô, se time nen sha atesen a hange hange agen, a ken Icighanruamabera la.