NYIAN ne ior kpishi senge ér ve mba a jighjigh u nan. Kpa Yesu tese ér ka ior kpuaa tseegh vea lu a jighjigh u nan u mimi ye. A kaa ér: “Gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô. Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.”—Mateu 7:13, 14.

Nyian ne, ior mba tesen ér ve mba a jighjigh u nan u mimi la nena? Yesu kaa ér: “Ka sha atam a ve man né fa ve ye . . . hanma kon u injaa [ngu] um atam a injaa . . . kpa kon u bo yô, ngu um di atam a bo je.” (Mateu 7:16, 17) Nahan yô, jighjigh u nan u mimi um “atam a injaa.” Ngu a mgbegha ior u lun a aeren a Aôndo a lumun a mi la. Ka ve lu a aeren ne nena?

Ior mba lun a jighjigh u nan u mimi mba eren kwagh a tahav vev man ian i vesen i ve lu sha mi la sha u nan Aôndo icivir shi wasen mbagenev kpaa. Yesu tese ér: “Hanmô u i sar nan ka lun u vesen ken a ven yô, nana̱ hingir wanakiriki wen.” (Marku 10:43) Shi kwagh ugen yô, mbalun a jighjigh u nan ka upilambaiorov ga; mba eren ipila hen uya vev shin sha ajiir agen ga. Kasev vev gba ve kwagh, mba we ve ikyo, shi mba nengen sha mbamgbe vev sha dooshima je. Ruamabera kaa ér: “Ne noov kpaa, kasev enev ve̱ doo ne asema, de yuwen nen ve ga.” (Mbakolose 3:19) “Ne nomso kpaa, lu nen a kasev enev imôngo sha kwaghfan, waan nen kasev ikyo er ve hembe yinan agee yô, gadia ve kpaa, ka mbayandyako u sha mrumun u sha mhôôn u uma a ven imôngo, sha u i̱ de vende mbamsen enev ga yô.”—1 Peteru 3:7.

Kwase u nan lu a jighjigh u nan u mimi di kpaa, nan ‘cie nom u nan.’ (Mbaefese 5:33) Gba u kasev vea tese ér “noov vev . . . doo ve asema kua shi ônov vev kpaa.” (Titu 2:4) Uter man ungô mba ve lu a jighjigh u nan mba tee shighe sha u tesen ônov vev atindi a Aôndo man akaawan a na. Mba eren kwagh a mbagenev hen ya man hen ijiirtom man sha ajiir agen kpaa, sha ikyoiwan man sha icivir. Mba dondon kwaghwan u ken Ruamabera u kaa ér: “Hemen nen sha u nan ior icivir” la.—Mbaromanu 12:10.

Mbatomov mba Aôndo mba dondon kwaghwan u Ruamabera ne, a kaa ér: “De ngohol inyaregh ki yamen ishô a mi la ga.” (Ekesodu 23:8) Ka vea lu sha iaven i vesen kpa, mayange mba ye mtsera sha ior ga. Kpa mba gem mba keren a ker u wasen ior, hemban cii je yô mba ve lu ken mzeyol yô. Mba eren tom sha kwaghwan ne: “U eren dedoo man shi u panden karen ior a̱ de hungur ne ga gadia anza a iniav mbin ne doo Aôndo.” (Mbaheberu 13:16) Nahan yô, ve nenge a mimi u mkaanem ma Yesu ôr ne, ér: “U nan a na kwagh hembe saan iyol a u ngohol a ngohol kwagh.”—Aerenakaa 20:35.

Ior mba lun a jighjigh u nan mba kor atindi a Aôndo, man “atindi a Na yô, a  yuhwa [ve] ga.” (1 Yohane 5:3) Ve fa ér “atindi a TER nga vough je . . . Uinezwa mba TER ka mba vough je, mba ne iember ken ishima; tindi u TER ngu wang je, ngu a wanger or ashe.”—Pasalmi 19:7, 8.

Jighjigh u nan u mimi shi ngu a mgbegha ve u palegh nyityô ihyom cii. Mba nengen ér ma zwa shin tar gayô nongoior môm hemba ugen ga, kpa mba gem mba dondon ikyav i Aôndo. “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.”—Aerenakaa 10:34, 35.

Jighjigh u nan u mimi mgbeghan ior “u zenden tsembelee sha akaa cii.” (Mbaheberu 13:18) Shi or u nan lu a jighjigh u nan u mimi yô, nan eren angereke ga shi nan senden ior ityough kpaa ga. Orpasalmi Davidi yange pase injaor i Aôndo a lumun nan yô, ér: “Nan eren anger sha zwa u nan ga, nan eren huror u nan ifer ga.”—Pasalmi 15:3.

Mba ve lu a jighjigh u nan u mimi cii yô, mba haren atesen a ve cii sha Icighanruamabera. Ve na jighjigh ér “icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa.” (2 Timoteu 3:16) Mba eren kwagh a mbagenev sha gbenda u ú tese ér mba a “kwaghfan u a dugh Sha” la, man kwaghfan ne “ka u wang, shi ka u bem kpaa, man u sar sar, man u norom ikyaa ga, a iv a mhôônom ma zungwen kua atam a dedoo.” (Yakobu 3:17) Shi mba palegh aeren a uter a vihin Aôndo ishima man ahir a eren shi mba “kemen . . . ayol sha akombo [shin eev mbu civir].”—1 Yohane 5:21.

Profeti Mose kaa ér: “TER Aôndo A̱ doo u ishima a ishima you cii man a uma wou cii man a agee ou cii.” (Duteronomi 6:5) Ior mba lun a jighjigh u nan mba tesen imba dooshima la hen Aôndo. Mba tesen icivir sha iti i Aôndo i Yehova la. Mba ‘wuese Yehova,’ shi mba ‘yer sha iti Na’ sha jighjigh. (Pasalmi 105:1) Mbatomov mba Aôndo shi mba dondon tindi na u a kaa ér: “Or u nan we ndor a we nana̱ doo u ishima er we iyol you nahan” la. (Levitiku 19:18) Mba palegh ipila shi mba nenge u lun “bem a ior cii.” (Mbaromanu 12:18) Inja na yô, ka inja er ve “gema usanker vev, [ve] var indyuhar a mi, awange a ve kpaa . . . hingir ahô a sôron ikyon a mi” nahan. (Yesaia 2:4) Sha nahan yô, ve “doo ayol a [ve]” shi mba ken mzough u anmgbianev tar sha won cii. (Yohane 13:35) U fa ior mba ve eren nahan nyian kpa?