AÔNDO kaa a mbatomov nav ér vea tagher a akaa a karen jighjigh ve u nan. Mkaanem nam kaa ér: “Lu nen geng ge geng shi kuran nen kpaa, orihyom wen diabolo ngu zenden er begha u tan kume nahan, keren or u una ya yô.” (1 Peteru 5:8) Satan una nôngo u vihin jighjigh wou u nan nena?

Alaghga Satan una mgbegha mbagenev ken ijime, kua ior ou je kpaa ér ve kighir we u̱ de gbe ashe ken Icighanruamabera ga. Yesu tsengaôron kwagh ne ér: “Mba ken ya u or vea gema vea lu mbaihyomov mba nan je.” (Mateu 10:36) Adooga ior mba hen tsombor wou man ahuraior a ou, a kwagh wou a gbe a ishima la fa er Mkaanem ma Aôndo ma er akaa a mimi a doon tsung ga. Shin mba cian kwagh u mbagenev vea ôr la. Nahan kpa, Ruamabera kaa ér: “Mcie u cian or ka a va a kwaghhônon, kpa or u nan suur sha TER yô, nana tema doo doo.” (Anzaakaa 29:25) Aluer u de u henen Icighanruamabera sha u i doo ior a we yô, ieren you ne ia doo Aôndo kpa? Mayange ga! Nahan kpa, ka sea tese jighjigh u nan u mimi yô, Aôndo a wase se. “Se mba mbahirenjime sha u za saan ishe ga, kpa se mba mbananjighjigh sha er uma una war yô.”—Mbaheberu 10:39.

Umbur ase kwagh u Dumas, u se vande ôron kwagh na la. Sha hiihii la, kwase na naha un tar sha ci u jighjigh na la. Kpa ken masejime yô, a kohol orya na ve hingir u henen Mkaanem ma Aôndo imôngo. Kape we kpa, aluer u taver ishima u eren kwagh u vough ve, alaghga u urugh ahuraior a ou kua ior ou vea dondo u je la. Ashighe kpishi, ka í “kera lu sha kwaghôron” u or u lun a jighjigh u nan u mimi la kpee ga, kpa ka í lu “mlu u wang” man ‘mcie u cian Aôndo’ u nan la ka a “urugh” or u hen tsombor u nan u nan lumun a kwagh u nan lu henen ken Ruamabera ga la nan hingir u fan Aôndo ye.—1 Peteru 3:1, 2.

Satan ngu a bume ior ve hen ér ve mba gbilin ga, nahan ian ngi ve i henen Ruamabera ga. Una soo ér mbamtaver mba uma ne, er akaa a nyian we ishima man mbamzeyol mba inyar nahan ve “imbishi kwaghôron” u ken a we la, sha er jighjigh wou una “ume atam ga” yô. (Marku 4:19) Venda mnenge u kpeegh ne! Ruamabera  kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Aluer u za hemen u henen kwagh u Aôndo man u Yesu u a lu Mesiya la yô, u zua a uma u tsôron ken Paradiso!

Hen sha kwagh u Mose, u lu or u ken ya u tor u Igipiti la. Yange una soo yô, ma ker inyaregh man itiduen kua tahav. Nahan kpa, lu Mose “guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.” Er nan ve er nahana? “A taver ishima er ngu nengen a u i nengen a Na ga la nahan.” (Mbaheberu 11:24, 25, 27) Sha kpôô yô, Mose na Aôndo jighjigh taveraa. Kwagh u Aôndo hemba gban un ishima a u keren mtsera na iyol na la, nahan Aôndo ver un doo doo. Aluer we kpa u er nahan yô, Aôndo una ver u doo doo.

Alaghga Satan una nôngo u meen we sha igbenda kposo kposo. Kpa ityôkyaa ngi i u gba ken to na ga. Mkaanem ma Aôndo taver se ishima ér: “Hendan nen a diabolo tsô una yevese ne.” (Yakobu 4:7) U hendan a na nena?

Za hemen u henen Icighanruamabera. Ôron Mkaanem ma Aôndo ayange ayange. Hen atesen a Mkaanem ma Aôndo. Dondo a. U er nahan yô, u “tôô . . . ikyav mbi utyav mbi Aôndo cii,” man ka mbi mbia wase u ú nôngo kwagh a Satan ye.—Mbaefese 6:13.

Kohol imôngo a ior mba ve lu a jighjigh u nan u mimi la. Tôv ior mba ve ôron Icighanruamabera, ve henen un shi ve eren kwagh u i er ker la ityô. Ambaaior la nga ‘we ayol a ve ikyo, nga taver ayol a ve asema u lun a dooshima man aeren a dedoo’ kpaa.—Mbaheberu 10:24, 25.

Kporom hen Yehova. Eren msen wer Aôndo a̱ wase u, shi na un jighjigh kpaa. Mayange i de hungur we er Aôndo a soo u wasen we ga. “Gema nen ishima i nyian yen la cii, haa nen sha a [Aôndo], gadia ka Un A lu koson ne ye.” (1 Peteru 5:6, 7) “Aôndo yô, ka u jighjigh, Una lumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.”—1 Mbakorinte 10:13.

Satan lahan Aôndo, kaan ér ma or u nana tagher a mtev u sha ican ve nana za hemen u civir Aôndo je kpa nan ngu ga. Kpa u ngu a ian i tesen wer Satan ka oraie! Aôndo kaa ér: “Lu orfankwagh, na i saan mo iyol, sha er me gema me kaa imo a or u a laham yô.” (Anzaakaa 27:11) Kange ishima wer ú tese er ú lu a jighjigh u nan u mimi yô!