1, 2. Tar yange u hii u geman hii sha ayange a Noa la je nena, man Aberam nenge mgem ne nena?

ABERAM yange kende ashe sha, ta ashe za nenge a gôgôyou ugen u taven sha geng, u ken gar u Ur. * Ayôôso lu sha mi gong gong, shi mnyim lu duen sha mi. Lu upristi mba aôndo u uweregh lu nan iniav sha mi er ve vanden nan nahan ye. Nenge ase a Aberam ken ishima you, er a gem ishigh kera, a jingir ityough, a kura icugh sha, a kar a lu yemen yô. Er Aberam lu karen hen atô u ikpelaior hiden ken ya na la, alaghga tsô lu henen sha kwagh u akombo a ior kpishi civir hen gar u Ur la. Mcivir u aiegh u ndôhôrishima ne yange samber sha tar hii sha shighe u Noa la je zan zan va ar sha shighe u Aberam la!

² Noa yange kpe anyom kar ahar maa i mar Aberam. Zum u tertamen Noa due ken tso vea tsombor na shighe u mngerem uma sha tar kera la, a na Yehova Aôndo nagh, nahan Yehova er ikyume due sha abeen. (Gen. 8:20; 9:12-14) Sha shighe la, lu mcivir u mimi tseegh lu sha tar ye. Kpa zum u kov u Noa u sha pue hii u samber sha tar la, mcivir u mimi hii u zan ihyen. Ior gba civir mbaaôndo mba ieev hanma ijiir cii. Tera, ter u Aberam je kpa, lu or u civir akombo, man alaghga je yô, gbaan ieev kpaa.—Yos. 24:2.

3. Er Aberam lu tsan sha won la, lu ieren i nyi i due tseer tseer ken a na, man se fatyô u henen nyi ken kwagh ne?

³ Aberam lu inja kposo. Man er shighe lu karen la, lu hemban lu kposo a ior mba sha ayange na la cii sha ci u jighjigh na u nan la. Ka nahan ve sha ayange a mbaapostoli la icighan jijingi mgbegha apostoli Paulu yila un ér “Ter u . . . mba ve ne jighjigh la” ye! (Ôr Mbaromanu 4:11.) De se nenge kwagh u yange wase Aberam hingir or u nan Aôndo jighjigh kpishi nahan yô. Shi se ayol a ase kpa se fatyô u henen  igbenda kposo kposo i jighjigh wase una seer taver a taver yô.

4, 5. Alaghga Aberam yange hen kwagh u Yehova sha ikyev i ana, man se fatyô u kuren ikyaa ser kwagh lu nahan, sha ci u nyi?

⁴ Aberam hen kwagh u Yehova nena? Ior mba civir Yehova mba mimi lu sha tar sha ayange na la. Shem lu môm ken ve. Er lu waniunda u Noa ga nahan kpa, ashighe kpishi yange a ôron kwagh u ônov mba Noa yô, i vande teren un. Ikyav tese wang ér lu sha ci u Shem lu or u nan jighjigh taveraa. * Zum u Mngerem ma Deemee va sha tar uma kera la, sha shighe ugen la, Noa yila Yehova ér “Aôndo u Shem.” (Gen. 9:26) Shem ungwan imo i Yehova shi mcivir u mimi doo un ishima.

⁵ Aberam yange fa Shemee? Alaghga fa un. Hen ase sha kwagh u Aberam shighe u lu anye la. Nenge ase er yange a doo un u fan er Shem, tertamen na la, tsa sha won je hemba anyom 400 yô! Shem nenge a aferakaa a ior lu eren sha tar cii man Mngerem ma Deemee va sha u la, shi a nenge a Mngerem ma Deemee ma ma tim ior sha tar la, shi a nenge er akuraior hii u lun sha tar shighe u uumace hii u ngeen sha u la, kua ayange a bo a Nimrodi hemba Aôndo ato hen Gôgôyou u Babel la. Orjighjigh Shem nyôr iyol ken ihyembeato la ga, sha nahan yô, shighe u Yehova nzughul zwa u ior mba ve lu maan gôgôyou u taven la, Shem man tsombor na yô, ve za hemen u lamen zwa u ior lamen sha hiihii la, zwa u Noa kpa lamen u la. Aberam kpa lu or u ken tsombor u Shem la. Nahan Aberam yange una naan Shem icivir je ka u henen a hen ga. Shi Aberam yange kohol Shem uma, anyom kar kpishi cii ve Shem mase kpen ye. Sha nahan yô, alaghga Aberam hen kwagh u Yehova hen Shem.

6. (a) Aberam yange tese ér un fa ityôkyaa i Aôndo tim tar sha Mngerem ma Deemee mara nena? (b) Uma u Aberam man Sarai lu nena?

⁶ Shin er se fatyô u pasen vough er Aberam hen kwagh u Yehova ga nahan kpa, se fa keng ser yange fa ityôkyaa i Yehova va a Mngerem ma Deemee sha tar yô, nahan kange ishima ér una zende vea Aôndo er Noa kpa zende vea Na nahan. Ka nahan ve, Aberam venda akombo a civir shi lu kposo a ior mba ken gar u Ur la ye, shi alaghga je yô, lu inja kposo a mba hen tsombor na kpaa. Nahan kpa, Aberam va zua a  kwase u injaa kpishi. Yange vôso Sarai, kwase u lu kposo a ior mbagenev yô, man lu sha ci u mdoom nam tseegh ga, kpa lu sha ci u lu kwase u nan Yehova jighjigh taveraa. * Er ve lu a wan ga nahan kpa, ikyav tese ér yange saan ve iyol u icivir Yehova imôngo. Shi ve yese Loti, wan u anngô u Aberam.

7. Gba u mbadondon Yesu vea dondo ikyav i Aberam la nena?

⁷ Shighe môm kpa, Aberam undu Yehova yem za civir akombo a ior civir ken Ur la ga. Un vea Sarai cii yange ve lu kposo a ior mba hen ityô ve mba ve civir akombo la. Se kpa gba u se lu nahan ve, jighjigh wase una seer taver ye. Gba u se lu kposo a ior mbagenev. Yesu yange kaa ér mbadondon un vea “lu ior i tar ne ga,” sha nahan yô, tar ua kôr ve ihyom. (Ôr Yohane 15:19.) Aluer mba hen tsombor wou shin ityô you, soo kwagh wou ga sha ci u we u ngu civir Yehova yum yô, umbur wer u ngu tswen ga. U ngu dondon ikyav i dedoo i Aberam man Sarai mba ve kpa ve civir Yehova sha mimi la.

8, 9. (a) Ka nyi yange i er Aberam, i yange hungur a mi mayange ga? (b) Yehova yange kaa a Aberam ér nyi?

⁸ Iyange igen yô, kwagh er Aberam u yange hungur a mi mayange ga yô. A zua a loho hen Yehova Aôndo! Bibilo pase se vighe vighe er Aberam zua a loho ne ga, kpa i kaa ér “Aôndo u iengem” ande hen a na. (Ôr Aerenakaa 7:2, 3.) Alaghga tsô lu sha ikyev i ortyom u Aôndo tindi un yô, Aberam pande nenge a iengem i Tor u Hemban sha Won cii la ye. Se kera lan er yange a saan Aberam iyol u nengen er Aôndo u uma la a lu kposo a mbaaôndo mba aiev mba ior mba sha ayange na la civir la ga.

⁹ Yehova yange tindi loho hen Aberam kaa a na ér nyi? A kaa ér: “Due ken tar wou kera, man hen ityô you kpaa, yem hen tar u Me tese u yô.” Yehova yange pase Aberam ijiir i soo ér a̱ za lu her la ga, a gba kaan tsô ér una tese un tar la. Kpa cii man a tese un yô, gba u Aberam una undu ijiir na kua ior nav. Man sha ayange a tsuaa la, tsombor gba ior mba hen veghertar u Aberam la kwagh kpen kpen. Sha nahan yô, or yange nana undu ior mba nan, nana yem a za lu ken tar ugen ica yô, i nenge ér kwagh hemba nan; hen mbagenev je yô, mlu u nan la vihi hemba ku!

10. Alaghga yange a taver Aberam man Sarai u undun ya ve u hen gar u Ur la sha ci u nyi?

¹⁰ Yange a taver Aberam u mough undun ijiir na kpen kpen. Ikyav tese ér, Ur lu gar u lun yôughyôugh shi ngeen a ior. (Nenge ngeren u kiriki u a lu a itinekwagh ér, “ Gar u Aberam man Sarai Mough Undu La.”) Akaa a i zough a mi shin inya hen ijiir la tese ér, uya mba injaav  lu hen gar u Ur sha ayange la; uya mban mbagenev lu a ayou a lun arum 12 shin hemba nahan sha ci u mba hen tsombor kua mbashiren tsombor shon, shi i maa ayou ne i ningir i tser, tembe lu ken atô. Uya mban lu a mngerem kua ahungwa man ajiir a haan ihyôghonough. Shi umbur wer, Aberam man Sarai lu iyev ga; alaghga hen shighe ne lu anyom akunduatargber kar, Sarai di alaghga lu akunduatar kar. Er noov mba injaav ve soon ér i kpe kasev vev iyol yô, Aberam kpa yange una soo ér Sarai a tema i kpe un iyol je ka u henen a hen ga. Nenge ase er yange vea tema vea lu lamen sha kwagh u Aôndo kaa ér ve er ne, henen sha akaa kposo kposo shi pinen ayol a ve mbampin kposo kposo yô. Yange a saan Aberam iyol kpishi zum u Sarai lumun u eren kwagh u Aôndo kaa la. Sarai lumun u undun mkpeyol u hen ya ve la yemen tar ugen vough er Aberam kpa lumun u eren nahan.

11, 12. (a) Yange gba u Aberam vea tsombor na vea wa ago iyol, shi vea nenge sha akaa a nyi nahan cii man vea mase moughon hen gar u Uru? (b) U hen wer iyange i Aberam mough zende vea tsombor na la lu nena?

¹¹ Er Aberam man Sarai lumun u eren kwagh u Aôndo kaa la yô, ve lu a tom u eren vese. Zegetom lu ve inya u wan ikyav shi sôron akaa veren sha inja. Er ve lu yemen ape ve fa kpaa ga yô, lu nyi man nyi gba u vea tôô, lu nyi di gba u vea unduu? Kpa kwagh u hemban cii je yô, lu ior vev. Vea undu Tera, ter u Aberam u bee iyol la a ana? Yange ve nenge ér hemba doon u vea yem a na, nahan ve tôô un, lu a ve zan zan va kar kpen. Alaghga tsô yange doo Tera kpishi u moughon a ve ityô, sha ci u Bibilo kaa ér lu Tera mough a tsombor na due ken gar u Ur ye. Ikyav tese ér, yange de u civir akombo. Wan u anmgbian u Aberam, Loti kpa mough a ve imôngo.—Gen. 11:31.

¹² Iyange i moughon zende la nyôr ve. Nenge ase a mbazendev mba Aberam ken ishima you, er ve til ken won u gar u Ur, ve per akpamnger u i kaha i ningir gar ne sha u kuran un la yô. Ve kange urakumi man ujaki ikyav gumeen, ve kohol uzendenya vev, tsombor la kua ior mba shiren u cii wa iyol i moughon hegen; maa ve iyol kpishi. * Alaghga hen shighe ne ior cii haa ashe sha Aberam mba keghen ér a na zwa yô, vea mough. Ne zwa yô, ve mough, ve due ken gar u Ur kera, man lu u vea kera tsa a hide hen gar la ga.

13. Mbacivir Yehova kpishi nyian kpa tange iyol ga er Aberam man Sarai nahan nena?

¹³ Nyian ne kpa, mbacivir Yehova mbagenev kpishi mough yem sha ajiir agen a kwagh a hembe gban sha mba pasen kwagh u Tartor yô. Mbagenev hen zwa ugen sha er vea seer eren tom ve u pasen kwagh yô. Shin ve hii u pasen kwagh sha igbenda igen i ve lu a vande karen ga, shin i i taver ve yô. Ambaakaa la nahan cii ka i gba u or a tange iyol ga ve, nana fatyô u eren ye, sha ci u ka i gba u nana de akaa agen  a kar nan. Imba ieren i tangen iyol ga ngila nahan, i̱ doo kpen kpen, shi mba ve lu eren nahan la mba dondon ikyav i Aberam man Sarai la! Aluer se tese jighjigh u nan imba la nahan yô, se fa ser Yehova una na se injar a hemba kwagh u se er sha ci na la ica je. Ka hungur un u nan mba ve lu a jighjigh la injar ga. (Heb. 6:10; 11:6) Yange na Aberam injar kpa?

14, 15. Zende u Aberam vea ior nav mough hen gar u Ur yem ken Haran la, lu nena, man alaghga lu nyi i na ve Aberam haa afo hen gar u Haran, lu her shighe wa karenee?

¹⁴ Kure kure tsô zende ne hii u hoghol Aberam vea ior nav. Tôô ase wer, u nenge a Aberam man Sarai er ve lu yemen zende ve ne yô; ve tema sha urakumi mba yemen, kpa ka ve za hungwa ve gba zenden angahar lamen, man iliam ve la ngi nungwan sha ayôôso a amem a ve har sha ikyor i ve kange ikyav a mi sha urakumi la. Kure kure tsô, ior mba Aberam mba ve fe kwagh u zende ga la je kpa, zende ne hii u hoghol ve, ve fa u haan afo shi moughon, shi wasen Tera u bee iyol la sha u a tema sha rakumi shin jaki i kpe un iyol yô. Ve ver ishigh yemen vegher u ken imbusutarimese la; ve lu zenden sha kpe u Ifi u Uferati la. Ayange lu karen, ukasua lu been, kpa zende ne lu a kure ga.

¹⁵ Aberam vea mbazendev nav zende kuma ukilomita 960 nahan,  ken masejime yô, ve za ar hen atumbe a Haran, gar u lun yôughyôugh u lu hen akahar a gbenda u mbakasuav mba sha ityoughkitaregh karen her yemen shin ityôtar yô. Alaghga tume Tera iyol hen shighe ne kpishi, kera lu kwagh u una za hemen a zende ne ga. Nahan tsombor la haa afo hen ijiir ne, lu her shighe kar.

16, 17. (a) Ka ikyuryan i nyi yange i seer taver Aberam ishima? (b) Yehova ver Aberam doo doo shighe u haa afo hen gar u Haran la nena?

¹⁶ Shighe kar yô, Tera kpe, lu anyom 205. (Gen. 11:32) Nahan kpa, Aberam zua a msurshima kpishi, gadia Yehova shi lam a na. Yehova kimbir kwagh u yange vande ôron Aberam ken gar u Ur la, shi seer ôron un kwagh u ityendezwa i er a na la. Yange gba u Aberam una hingir “ikyurior i vesen,” shi akuraior a sha won cii a zua a iveren ker a na. (Ôr Genese 12:2, 3.) Ikyuryan i Yehova ya a Aberaham la, seer taver un ishima, tsô shi a mough a gba yemen.

¹⁷ Nahan kpa, kwa ne yô, lu u vea wa ikyav a hemba ave a tse, gadia Yehova ver Aberam doo doo shighe u haa afo hen Haran la. Bibilo ôr kwagh u “inyarev vev mbi ve kohol cii, kua ior mba ve zua a mi ken Haran” la. (Gen. 12:5) U Aberam a̱ hingir ikyurior yô, gba u una lu a akaa kpishi shi mbashiren un tom kpaa vea ngee, una lu a ior sha ave kpishi. Ka hanma shighe cii, Yehova a geman mbacivir un ve hingir mbainyarev ga, kpa ne ve hanma kwagh u kwagh a gbe ve a mi sha u vea er ishima na cii yô. Aberam zough a akaa ne cii yô, a mough vea mbazendev nav ve gba yemen ken tar u ve fa u ga yô.

18. (a) Lu hanma shighe Aberam ar sha iyange injaa i í er kwagh u i ken yiase u ior mba Aôndo shin tar laa? (b) Ka akaa a vesen agen a nyi yange va er sha iyange i Nisan 14 ken anyom a ken hemene? (Nenge ngeren u kiriki u a lu a itinekwagh ér, “ Werayange u Injaa u ken Bibilo” la.)

¹⁸ Ayange nga kar yô, ve za ar hen Karkemishi, ape ior peren Ifi u Uferati la. Alaghga tsô lu hen ishiva ne, Aberam ar sha iyange i injaa i í er kwagh u i ken yiase u ior mba Aôndo shin tar la ye. Ikyav tese wang ér lu sha iyange i sha 14 i uwer u i va gema yilan u ér Nisan, ken inyom i 1943 C.S.Y. (Cii man Shighe u Yesu) la, Aberam per Ifi u Uferati vea ior nav ye. (Eks. 12:40-43) Tar u Yehova tôndo zwa a Aberam ér una tese un la di gema lu vegher u ken imbusutariyan la. Lu sha iyange la, Aôndo hii u kuren ikyuryan na a Aberam ye.

19. Yehova tôndo zwa a Aberam ér nyi, man alaghga ityendezwa ne umbur Aberam nyi?

 ¹⁹ Aberam vea ior nav penda ishigh gba yemen ken imbusutariyan i tar u i tese un la, zan zan ve za ar hen uzegembaikyonov mba hen More, ikyua a gar u Shekem, maa ve tile. Yehova shi lam a Aberam hen ijiir la. Kwa ne Yehova tôndo zwa a Aberam ér una na vor na tar la. Aberam yange hide hen sha kwaghôron u profeti u Yehova ôr ken Eden sha kwagh u “vor,” u ua va yima uumace cii laa? (Gen. 3:15; 12:7) Adooga lu nahan. Alaghga Aberam hii u kaven kpuaa kpuaa er un kpa un lu ken mba Yehova una er tom a ve sha u kuren awashima Na u vesen, u lu a mi sha hiihii la yô.

20. Aberam yange wuese ian i icivirigh i Yehova na un la nena?

²⁰ Aberam yange wuese ian i icivirigh i Yehova na un la tsung. Er Mbakanaan lu ken tar la her yô, alaghga shighe u Aberam lu zenden ker la, lu zenden sha kwaghfan. Yange tile hen ajiir agen ken tar la, ta atse a nan Yehova nagh, hiihii yô lu ikyua a uzegembaikyonov mba hen More shi va er nahan ikyua a Betel. A̱ shi nan kpa, yange yila sha iti i Yehova, sugh un kigh kigh er lu gbidyen kwar sha kwagh u tsombor na, henen er ua va lu ken hemen yô. Shi adooga pase Mbakanaan mba ve wa ndor a na mbara kwagh u Yehova. (Ôr Genese 12:7, 8.) Nahan kpa, Aberam va tagher a mbamtaver mba vesen mba karen jighjigh na. Kpa Aberam er kwagh sha kwaghfan, mayange yem henen sha akaa a nan mkpeyol a yange undu ken gar u Ur la ga. Aberam ver ishima sha akaa a ken hemen. Mbaheberu 11:10 ôr kwagh na ér: “A lu keghen gar u a lu a imagh, u Aôndo A lu Orkaren man Ormaan un la.”

21. Mfe wase sha kwagh u Tartor u Aôndo la hemba u Aberam lu a mi la nena, man kwagh ne mgbegha u u eren nyi?

²¹ Se mba se civir Yehova nyian se hemba fan kwagh u Tartor u Aôndo u ú lu gar shon u i ter ken Mbaheberu la a Aberam. Se fa ser Tartor la ngu hemen sha hegen shi ica a gba ga tsô ua tim botar ne kera, shi se fa ser, Yesu Kristu ua lu vor u yange i tôndo zwa a Aberam la, ngu hemen ken Tartor la hegen. Se mba a ian i icivirigh i va nengen a Aberam shighe u a nder un shin ku la! Hen shighe la una nenge er awashima u Yehova u ngise un kav cuku tseegh la a kur sha mi vough yô! We u soo u nengen er Yehova una kure hanma ityendezwa na vough kpa? Yô, za hemen u dondon ikyav i Aberam la. De tangen iyol u civir Yehova ga, shi ungwan imo na shi wuese hanma tom u a ne u cii. Er u lu dondon jighjigh u Aberam la yô, we kpa “Ter u . . . mba ve ne jighjigh la cii” una lu teru!