1. Pase er yange lu Marta ken ishima la, kua kwagh u na ve lu un ken ishima nahan yô.

BARIWEN u lu uwar, u i ii anngô u Marta shimi, i cir iwen igen sha zwa na la lu kwagh u hungur Marta ga. Marta tôô ikyav ken ishima na yuhwa nese nese er iwen la nahan. Lasaru, anngô na u doo un ishima tsung la kpe, kpa lu un er a kpe ga nahan. Ken atô u ayange anyiin, hii sha iyange i Lasaru kera lu ityough ndor ga la je, Marta mem ga sha ci u mbayaren un ku man mba zungwen a na kua mba surun un ishima.

2, 3. (a) Er Marta nenge a Yesu la, alaghga er nena? (b) Mkaanem ma injaam ma Marta ôr la tese se nyi sha kwagh naa?

² Hen shighe ne, orgen za va hen Marta. Or ne lu ijende i Lasaru i sôngo sôngo. Er Marta nenge a Yesu la, ka keng a hemba sôôn un ken ishima cii, gadia sha tar cii, lu Yesu tseegh lu a tahav mbu yange ma war anngô na la ye. Nahan cii kpa, Marta wa zuan a ishimasurun shighe u due za kohol Yesu hen angar u Betani, u lu hen kpe uwoo la. Yesu lam a na kpishi ga, kpa er lam a na kundu kundu shi nenge er mhôônom kôr Yesu a na kpishi yô, a zua a ishimasurun shi ishima taver un. Yesu pine un mbampin mba ve wase un u hemban veren ishima sha kwagh u jighjigh na u nan, kua kwagh u mnder u shin ku u na jighjigh a mi la yô. Iliam ve la na yô, Marta ôr kwagh ugen u hemban lun a inja cii, u lu hiin je due sha zwa na la, ér: “M vande nan jighjigh kera je mer, We U ngu Kristu, Wan u Aôndo u A lu van shin tar ne” la.—Yoh. 11:27.

³ Mkaanem mara tese ér Marta lu kwase u nan jighjigh taveraa. Kwagh u Bibilo i er se sha kwagh na kpuaa la ngu a akaa a injaa kpishi, a wasen u taver jighjigh wase u nan. De se time sha ngeren u ken Bibilo u a hii ôron kwagh u Marta la tsô se nenge er una wase se yô.

4. Anngôôv mba Marta lu ana man ana, man tsombor ne lu a Yesu nena?

⁴ Shighe u Lasaru lu uma shi lu gbong gbong iwer i karen ken ijime kpuaa la, gba u orvannya u hemban cii, Yesu Kristu, una va ve inya. Tsombor u Lasaru man Marta man Maria cii lu imôngo, ve mba  utar mban cii ve lu ngô môm, shi ve vese ijiir i môm, shi ve lu hen ya môm. Mbatimen sha akaa a ken Bibilo mbagenev kaa ér alaghga Marta lu vesen a mba uhar mbagenev mbara, sha ci u ka un yange ngohol mbavannya ye, shi yange a̱ ôron kwagh ve yô, i hii teren un. (Yoh. 11:5) Yange mô ken ve mba utar mbara nana er ivaa kpa, se fatyô u fan ga. Vea er shin vea er ga kpa, ve cii ve lu azende a Yesu a ishima ishima. Shighe u Yesu lu pasen kwagh ken Yudia, ape i hendan a na shi ayôôso lu a na kpoghuloo la, lu hen ya ve tsaan ye. Yange a doo Yesu u lun hen ya ve u bem lu shi ve wasen un her ne je ka u henen a hen ga.

5, 6. (a) Hii nan ve Marta zua a ian i teman inya shighe u Yesu va ve inya la ga? (b) Maria yange zua a ian i ungwan kwaghôron u Yesu shighe u Yesu va hen ya ve la, nahan a er nena?

⁵ Marta lu a tom kpishi u nengen sha mkpeyol u ior mba hen ya na shi eren a mbavannya doo doo. A lu kwase u nôngon kwagh kpoghuloo, u luun a kwagheren ave hanma shighe yô. Shighe u Yesu za ve inya la kpa, kape Marta shir a shir ave ga je la. Fese nahan, a wa iyol i yôron yôugh yôugh sha ci u orvannya na u icivirigh ne, kua mbagenev mba alaghga ve lu a na imôngo la. Sha ayange la, u nengen sha vannya lu kwagh u vesen kpishi. Yange or a va inya yô, i ngohol nan i suse nan zwa, shi i tsua nan akôv shin angahar, i ôô nan angahar, shi i haa nan mkurem ma human doon sha ityou. (Ôr Luka 7:44-47.) Yange i gba u a na nan ijiir i tsan i injaa shi a yôr nan iwer tsembelee.

⁶ Marta man Maria ve lu wan agoyol sha mve u Yesu ne. Er ior kpishi ve ne jighjigh ér kwaghhenen hemba doon Maria a anngô na Marta nahan kpa, cii man mve u Yesu yô, lu wasen Marta, u eren akaa. Kpa Yesu va nyer yô, kera lu nahan ga. Yesu nenge ér ka shighe u i doo u una tese mba hen ya la kwagh je la, shi yange tese ve kpaa! Yesu lu er mbahemenev mba ukwaghaôndo mba sha shighe na la nahan ga, lu or u nan kasev icivir shi keghen iyol u tesen ve kwagh u Tartor u Aôndo, u u lu itinekwagh i kwaghpasen na la. Maria soo ér ian ne i karen un ga cii, nahan a tema hen angahar a Yesu, ishima na cii lu sha akaa a Yesu lu ôron la.

7, 8. Ka nyi yange i na ve ishima hii u nyian Marta, man yange wa ishima wa shio nena?

⁷ Nenge ase er hen shighe ne nahan, ishima yange ia hii u nyian Marta yô. Iwer i yange gba u una yôr kua akaa agen a gba u una er sha ci u mbavannya nav la cii na yô, ishima nyian un shi akaa za un iyol kpishi. Er Marta lu zenden sha hulugh hulugh eren akaa la, nenge anngô na u kwase tema a tema, lu eren kwagh môm môm ga, nahan a kenger un ishe i bo, shin a kura icur sha, a sondo ijuu? Yange una er nahan kpa, i̱ de kpiligh se iyol ga. Lu kwagh u una fatyô u eren zegetom u yôron iorvannya la tswen ga!

 ⁸ Marta wa ishima wa shio. Tsô a tôndo Yesu iliam sha zwa, a kende gagher a kaa ér: “Tere, anngôm undum, m ngu gilim sha tswen, nahan kpaa U shi U wa ikyo je gaa? Yô, kaa un a̱ va wasem!” (Luka 10:40) Mkaanem man tese ér yange vanger var un ker kpishi. Nahan a kaa a Yesu ér a wa Maria kwagh, a ôr un a za er kwagh u ashen a lu eren la.

9, 10. (a) Yesu yange ôr a Marta ér nyi? (b) Er nan se fe ser, Yesu lu kaan a Marta ér a er tom u yôron la za kar ikyaa inya ga?

⁹ Kwagh u Yesu ôr a Marta la yange una kpiligh un iyol, vough er zan zan nyian kpa ior kpishi ka vea ôr ivur la ve i kpiligh ve iyol nahan. A kende teghelee, a kaa a na ér: “Marta, Marta, ishima ngi nyian we, akaa nga zan we iyol kposo kposo. Kpa kwagh u kwagh a gbe sha mi yô, ngu môm tseegh; Maria yô, tsuwa ci u dedoo u mayange á kera tsuwe un her a na kera ga yô.” (Luka 10:41, 42) Yesu ôr nahan ver ishigh ér nyi? Lu kaan ér Marta hemba veren ishima sha akaa a iyolough a akaa a Aôndo shinii? Lu kôôm un ér a er tom u yôron la za kar ikyaa inyaa?

¹⁰ Ei. Yesu yange fa wang er awashima u Marta lu u dedoo shi lu tesen dooshima yô. Shi Yesu nenge ér u eren kwaghyan mgbeghaa sha ci u iorvannya la je kpa ka kwaghbo ga. Yange vande zan “zegeiniongo” i Mateu er un ayange a karen ken ijime la a ishima i gbar gbar. (Luka 5:29) Zayol lu sha iwer i Marta lu eren la ga, kpa lu kwagh u yange hemba gban un ishima la zayol lu sha mi ye. Yange ver ishima sha iwer i a wa ave u yôron yôugh yôugh la je kwagh u hemba lun u hange hange la hungur un. Lu nyi i hemba lun hange hangee?

11, 12. Yesu yange kôôm Maria sha imo i legh legh nena?

¹¹ Yesu, Wan u Yehova Aôndo u ishima ishima la za hen ya u Marta sha u za tesen ior mimi. Kwagh ne hemba lun hange hange a akaa agen cii, kua iwer i Marta i doo un tsung man akaa agen a yange lu gilim sha eren la cii. Er Marta yem eren akaa agen man ian i vesen i teman ungwan kwagh u una taver jighjigh na u nan la lu karen un yô, ka keng yange a doo Yesu ga, kpa a de ér Marta a er kwagh u a nenge i doo un la. * Marta di kpa yange ma fa ér gba u una kighir Maria ér a de ian i henen kwagh hen Yesu la i kar un ga.

¹² Nahan Yesu kôôm Marta sha imo i legh legh, a yila un a shi a kimbir sha u a gba shimi yô, maa a pase un er ityôkyaa i lu i ‘ishima  a nyian un shi akaa a za un iyol kposo kposo’ ga yô. Yange una er kwaghyan akuma akuma, una lu ikyagh i môm shin mkam mhar kpa ma yina ga, hemban je yô hen shighe u Yesu lu tesen ve kwagh u Yehova ne. Sha nahan yô, ityôkyaa lu i Yesu una kôôm Maria sha ci u a “tsuwa ci u dedoo,” sha u keghen ato a na yum ga!

13. Ka nyi se hen sha kwagh u Yesu ôr a Marta laa?

¹³ Se fatyô u henen akaa kpishi ken kwagh ne. Mayange je se de nen ser, ma kwagh ugen a ya se ishima, se hungur er se lu “mbaibanave ken jijingi” ga. (Mat. 5:3) Doo u se naan ior kwagh mgbeghaa, shi se eren kwagh sha gbashima er Marta nahan, kpa mayange doo u ‘ishima a nyian se shi akaa a za se iyol kposo kposo’ sha ci u mbaavannya je se undu kwagh u a hembe lun hange hange la ga. Ityôkyaa i vesen i se kohol vea mba ve civir Yehova a vese imôngo la yô, ka  sha u yôron ve iwer yôugh yôugh, shin ve yôron se yôugh yôugh ga, kpa ka sha u taver ayol a ase asema shi nan ayol ase uyua mba sha mrumun u sha mhôôn. (Ôr Mbaromanu 1:11, 12.) Shighe u se tem imôngo yô, sea na ior kwaghyan una lu yôugh yôugh ga kpa, mtem la una taver se ishima.

14. Ka nyi i tese ér Marta ver ikyav i dedoo sha u lumun kwaghwana?

¹⁴ Marta yange lumun kwaghwan u Yesu wa un sha imo i legh legh la shi hen kwagh sha mi kpa? Yange lumun yum. Apostoli Yohane ôr kwagh u anngô u Marta u nomso la sha gbenda u sagher iyol. A hii kwaghôron na la nahan ér: “Marta man anngô na u kwase kua Lasaru ve doo Yesu ishima.” (Yoh. 11:5) Yesu yange za ken angar u Betani, er se pase sha heen nahan, iwer kar imôngo hen shighe ne. Kwagh ne tese wang ér Marta yange de iliam a Yesu ga; yange wa kwagh ishima a Yesu sha kwagh u wasen un, u Yesu ôr a na kundu kundu la ga. Yange lumun mkôôm la. Sha ikyaa ne kpa, a ver se ikyav i doon tsung sha kwagh u jighjigh u nan, gadia hanmô wase cii ashighe agen ka i gba u a wa kôôm nan daalaa.

15, 16. (a) Marta yange er nena shighe u anngô na gba angev laa? (b) Mhen u Marta man Maria lu a mi la saa ve dang sha ci u nyi?

¹⁵ Shighe u anngô u Marta lu dedoo ga la, Marta yange una nenge sha a na sha gbashima je ka u henen a hen ga. Nahan kpa, kwaghnyoon u Lasaru lu hemban gban a gba kera. Ken ayange a Lasaru lu dedoo ga la cii, anngôr a na lu nengen sha a na sue sue. Nenge ase er Marta yange una lu kenger anngô na u kungu ashe ikyôr la sha ishi ngegh ngegh, umbur ayange a ve luun imôngo saan saan la kua mbamzeyol mba ve tagher a mi la kpaa yô!

¹⁶ Ashe nga veren ikyôr sha inja i kwaghnyoon la una hemba Lasaru yô, Marta man Maria tindi ér i za kaa Yesu. Yesu lu pasen kwagh hen ijiir igen, man ijiir la gba ica a ya ve je kuma zende u ayange ahar nahan. Loho ve lu tiônôô, ér: “Tere, un u a doo U ishima la gba angev.” (Yoh. 11:1, 3) Yange ve fa er anngô ve doo Yesu ishima yô, nahan ve na jighjigh ér una er hanma kwagh u a fetyô cii sha u waren ijende na ne. Ve lu henen ér Yesu una va nyôr a kohol Lasaru umaa? Yange vea lu henen nahan yô, saa ve dang. Lasaru kpe.

17. Ka nyi yange i kpiligh Marta iyoloo, man yange er nena shighe u ungwa ér Yesu mgbôghom a gar laa?

¹⁷ Marta man Maria zungwe ku u anngô ve imôngo, ve lu wan ago a iin Lasaru shi ngohol mba van ku kpishi mba hen gar u Betani kua ikyasen la cii. Je kpa ve lu a ungwa anshuu sha kwagh u Yesu ga. Er Yesu lu van ga yô, alaghga yange a hemba kpiligh Marta iyol cii. Lasaru kpe ka tse ayange anyiin yô, Marta va mase ungwan ér Yesu mgbôghom a gar. Er Marta lu kwase u moughon sha kwagh fefa yô,  hen shighe u mzungu ve ne je kpa, a mough a kar a kar, a u ôron Maria shio, a za ayem a za kohol Yesu.—Ôr Yohane 11:18-20.

18, 19. Marta yange ôr kwagh u ishimaverenkeghen i nyi, man jighjigh na u nan la kpiligh iyol sha ci u nyi?

¹⁸ Marta nengen a Ter na yô, a ôr un kwagh u ishima lu zan un iyol sha mi vea Maria ayange imôngo yô, ér: “Tere, Wea lu heen yô, anngôm ma a kpe ga.” Kpa Marta lu a jighjigh u nan her kua ishimaverenkeghen ér Yesu una er kwagh sha kwagh la. Tsô a kaa ér: “Kpa m fa hegen kpaa nyityô kwagh i U sôn Aôndo yô, Aôndo Una na U je.” Her ave ave je maa Yesu ôr un kwagh u seer taver jighjigh na u nan la, ér: “Anngôu una nder.”—Yoh. 11:21-23.

¹⁹ Marta hen ér Yesu ngu ôron kwagh u mnder u shin ku u ken hemen, nahan a kaa a Yesu ér: “M fa, una nder sha mnder u sha iyange i masetyô la.” (Yoh. 11:24) Jighjigh u Marta lu a mi sha kwagh u mnder u shin ku la kpiligh iyol kpishi. Mbayuda mba hemen kwaghaôndo, mba i yilan ve ér Mbasadushi la venda ér mnder u shin ku  ngu ga, shin er Ruamabera u Aôndo tese wang ér kwagh ngu nahan je kpaa. (Dan. 12:13; Mar. 12:18) Nahan kpa, Marta fa ér Yesu tese kwagh u mnder u a va nder ior shin ku la, je shi a nder ior mbagenev shin ku kpaa, kpa ior mba nder ve la kpe ayange kar er Lasaru nahan cii man i nder ve ga. Yange fa kwagh u Yesu una er ga.

20. Pase inja i mkaanem ma Yesu ma hungur a mi mayange ga, ma i nger ken Yohane 11:25-27 la, man shi inja i kwagh u Marta ôr la kpaa.

²⁰ Yesu maa ôr kwagh u mayange a hungur a mi ga yô, ér: “Mo M ngu mnder man uma kpaa.” Sha mimi yô, Yehova Aôndo na Wan na tahav mbu nderen uumace mba ve kpe la cii shin ku. Yesu hide pine Marta ér: “U na kwagh ne jighjigh kpa?” Maa a na mlumun u se vande ôron kwagh sha mi ken mhii u ityough kin la. Yange na jighjigh ér Yesu ka Kristu, shin Mesiya, shi ka Wan u Yehova Aôndo, shi a na jighjigh ér ka un uprofeti vande ôron kwagh na ér ngu van shin tar ye.—Yoh. 5:28, 29; ôr Yohane 11:25-27.

21, 22. (a) Yesu yange nenge ior lu zungwen nahan tese er ishima lu un ker nena? (b) Pase er yange i nder Lasaru shin ku yô.

²¹ Imba jighjigh u nan u Marta la gba Yehova Aôndo kua Wan na Yesu Kristu kwagh je he? Kwagh u Yesu er sha ashe a Marta la na mlumun u a hembe wanger cii yô. A hile ayem a za yila anngô na u kwase la. Hidi yô, a nenge mhôônom kôr Yesu kpishi, er lu lamen a Maria kua ior kpishi mba ve lu zungwen a na imôngo la. A nenge Yesu haa mliam ashe, gadia ishimavihin i ku ka u va or a mi la na yô ure kpishi sha ishigh ki iorov cii. A ungwa Yesu kaa ér, i tôô iwen i sha zwa u uwar u anngô na kera.—Yoh. 11:28-39.

²² Er Marta lu kwase u ôron kwagh sha mimi hanma shighe yô, a venda ér anngô na kpe ayange kar anyiin hegen, nahan una hii u human. Tsô Yesu umbur un ér: “M vande kaan we Mer: Aluer wea na jighjigh yô, ú nenge icivir i Aôndo gaa?” Marta na jighjigh, nahan a nenge a icivir i Yehova Aôndo. Her ave ave je maa Yehova Aôndo na Wan na tahav, a nder Lasaru hide lu uma! A̱ shi nan kpa, Marta umbur akaa ne ken ishima gbem ku na: myer u Yesu yila genger genger ér: “Lasaru, due ken won!” la; kua iov i ve lu ungwan hiin hiin er Lasaru mough shin uwar a tsar u orkpen u i kange un iyol kpene kpene, va a mi nahan kure kure va due hen zwa u bariwen la; man mne u Yesu na zwa ér: “Sagh nen un, a̱ yem” la; shi ka keng yange una za hemen u umbur er un man Maria yange ve ember kpishi, ve yevese ve za ta sha anngô ve, ve kuve un yô. (Ôr Yohane 11:40-44.) Marta zua a mmem sha ican i tôô ken ishima sha ci u ku u anngô na la!

23. Ka nyi Yehova man Yesu ve soo u eren sha ci wouwe, man ka nyi i gbe u ú ere?

²³ Kwagh ne tese ér mnder u shin ku la ka kwagh u se tômon a tôm ser i va lu nahan ga; ka kwagh u sagher iyol u Bibilo i tese jim jim, u yange er sha ayange a tsuaa la mimi yô. (Yobu 14:14, 15) Doo  Yehova man Wan na u nan mba ve ne jighjigh la injar, er yange ve er a Marta man Maria kua Lasaru nahan. We kpa ve ver u injar, aluer u na jighjigh taveraa yô, u zua a mi.

24. Bibilo mase ôron kwagh u Marta ér nyi?

²⁴ Bibilo shi ôr kwagh ter Marta ijiir igen kpaa. Lu ken mhii u kasua u Yesu mase lun uma shin tar ne la. Er Yesu fa atsan a una tagher a mi ken kasua la yô, a shi a za hen ya u ijende na ken wangar u Betani. Lu u una moughon her yô, una zende ukilomita 3 una va ken Yerusalem. Yesu lu yan kwaghyan vea Lasaru imôngo hen ya u Shimon, orimande, man ka hen ijiir ne kpa se zough a kwagh u Bibilo i mase ôron sha kwagh u Marta ne ye, ér: “Marta lu duen a kwaghyan.”—Yoh. 12:2.

25. Kasev mba lun er Marta nahan mba ve lu ken atôônanongo kposo kposo nyian la, nga atôônanongo ne a inja kpishi sha ci u nyi?

²⁵ Nenge er Marta lu kwase u nôngon kwagh kpoghuloo sha wono! Hen ape Bibilo i hii teren un la je, ngu eren tom; shi hen ape Bibilo i mase ôron kwagh ne kpa ngu eren tom, nôngon sha afatyô na cii ér una nenge sha ugbayol mba iorvannya nav. Nyian kpa, atôônanongo a mbadondon Kristu nga a ambaukase er Marta nahan, ka kasev mba ve taver ishima kpoghuloo shi ve ne ior kwagh mgbeghaa, mba ve tesen hanma shighe ér ve na Yehova jighjigh sha u eren un tom sha gbashima shi wasen mbagenev yô. Marta yange za hemen u tesen jighjigh na u nan nahan vough kpa? Ikyav tese nahan. Sha nahan yô, yange una va tagher a mbamtaver ken hemen je kpa, jighjigh na la una wase un u wan ishima.

26. Jighjigh u nan u Marta la yange wase un u eren nyi?

²⁶ Ayange nga kar kpeghee yô, gba u Marta una zungwe ku swendegh, u i wua Yesu, Ortesen un u doon un ishima la. Shi mbaatsereghev mbawuan ior, mba ve wua Yesu la shi bum ér saa vea wua Lasaru keng, sha ci u i nder un shin ku yô, ior kpishi hingir u nan Yesu jighjigh. (Ôr Yohane 12:9-11.) Se fa keng ser, ku yange ua va pav Marta a anngôôv nav ken masejime. Kpa se fa shighe, shin gbenda u yange ku pav un a ve ga, kpa se fa tsô ser: er Marta lu a jighjigh u nan u mimi yô, kwagh la wase un u taver ishima zan zan mkur. Ka nahan ve, i doo u Mbakristu mba sha ayange ne vea kav Marta sha jighjigh u nan u lu a mi la ye.