Hen Anmgbianev Mba Nomso man Mba Kasev Mba Doon Se Ishima:

Yange i hii duen a ngeren ugen u he u doon tsung u lu a itinekwagh ér, “Kav Jighjigh Ve u Nan” la ken Iyoukura i nan ken won i hiihii i Janawari 1, 2008 la. Hii shighe la je, i gber ngeren u he ne kwa kimbir kimbir, man ngeren mban doo se je gande!

Ior ôr ngeren mban nahan ve kaa ér nyi? Kwase ugen yange ôr ngeren u sha kwagh u Marta la been yô, a nger ér: “M ôr ngeren la nahan, hômom kpishi gadia m ngu er Marta nahan, sha ci u hanma shighe yô, ka i maam iyol u eren a mbavannya doo doo, ka m kumbur sha kpishi, nahan ashighe agen i hungur mo u teman inya, yôôso a ve.” Wankwase ugen u lun anyom 15, yange ôr ngeren u sha kwagh u Eseter la, nahan a kaa ér: “Sha mimi yô, ashighe kpishi ishima ka i hemba lun se sha kwagh u akondo man akaa a hweegh a á za sember duen la. Gba u se wuhan iyol tsembelee, nahan kpa doo u se er hwe a za kar ikyaa inya ga.” Shi a kaa ér: “Ka ieren yase shin inja yase kwagh a gbe Yehova a mi ye.” Ngeren u sha kwagh u apostoli Peteru la yange mgbegha Kwasekristu ugen kaa ér: “Shighe u m lu ôron ngeren ne la, m uve ityough ker je lum er yange m lu ape kwagh shon lu eren la nahan! M lu masen nengen a kwagh u ngeren ne ôr la cii ken ishima.”

Kasev mba se ter sha heen ne kua ior mbagenev kpishi mba ve nger akaa sha u tesen iwuese sha ngeren mban la lumun a kwagh u ngise apostoli Paulu nger ne. A nger ér: “Akaa a i vande ngeren la cii ka sha ci u ityesen yase lu i nger a ye.” (Rom. 15:4) Sha mimi yô, Yehova yange na i nger kwagh u ior mba jighjigh mban ken Bibilo sha er se zua a ityesen i wasen se yô. Se cii, sea hila civir Yehova anyangem kpuaa tseegh, shin sea civir un shighe a lihe kpa se fatyô u henen kwagh hen mbajighjigh mban.

Se mba taver ne ishima ser, nôngo nen kpoghuloo ôr nen takerada ne fele fele je. Henen nen kwagh a mi ken Mcivir u hen Tsombor; ua doo mbayev enev kpishi! Shi shighe u a va hii u henen u ken Mkombo u Bibilo i Henen ken Tiônnongo la kpa, de bundu mkombo ma kasua môm ga! Tôô shighe ôr u kure kure, de er u ayem ayem ga. Gbidyen kwar sha akaa a u lu ôron la tsembelee; henen sha mi zulee. Nôngo u kaven er yange lu ior mba Bibilo i er kwagh ve la ken ishima yô, shi nenge a akaa a yange ve nenge a mi la. Tôô gbenda u yange ve er ma kwagh la kar sha kwagh u a lu we ve alaghga yange ma u er la.

Doo se kpishi er ne zough a takerada ne nahan. U̱ lu u iyua i injaa, we kua tsombor wou cii. Ne doo se ishima kpishi, shi se mba tômon ser i kpe ne iyol kpaa,

Mbahemenev mba Shin Tine mba Mbashiada mba Yehova