Yesu yange tese mbadondon un kwaghaôndo môm tseegh, ka kwaghaôndo u mimi je la. Ngu er gbenda u zan ken uma u tsôron nahan. Yesu ôr kwagh u gbenda la kaa ér: “Mbazuan a mi mba kpeghee tsô.” (Mateu 7:14) Aôndo lumun a mcivir u a har sha Mkaanem nam ma mimi mara tseegh. Mba ve civir Aôndo sha mimi mbara cii mba a jighjigh u nan môm.—Ôr Yohane 4:23, 24; 14:6; Mbaefese 4:4, 5.

Yesu yange ta icin ér uprofeti mbaaiev vea vihi Kwaghaôndo u Mbakristu. Sha ashe yô, mba er ka mbacivir Aôndo sha mimi nahan. Mba ve ze mbaadua vev senge ér ve mba Mbakristu. Kpa u fatyô u fan kwagh u ambaaior la a lu jim jim yô. U fa nena? Ka Mbakristu mba mimi tseegh ve eren kwaghaôndo u mimi ye, man aeren a ve la aa wase ior u fan kwaghaôndo shon.—Mateu 7:13-23.

Time ase sha akav ataan a u fatyô u fan ve a mi ne:

• Mbacivir Aôndo sha mimi mba tesen icivir sha Bibilo ér ka Mkaanem ma Aôndo. Ka ve nôngo ér vea dondo akaawan a Bibilo. Sha nahan yô, kwaghaôndo u mimi kaha a ukwaghaôndo mba ve har sha mbamhen mba iorov la. (Mateu  15:7-9) Mbacivir Aôndo sha mimi mba eren kwagh u ve tesen ior la.—Ôr Yohane 17:17; 2 Timoteu 3:16, 17.

• Mbadondon Yesu mba mimi mba tesen icivir sha iti i Aôndo, i i yer ér Yehova la. Yesu yange tese icivir sha iti i Aôndo sha u pasen ior iti shon. Yange wase ior sha u ve fa Aôndo shi tese ve u eren msen ér i tsegha iti i Aôndo. (Mateu 6:9) Ka kwaghaôndo u nyi a pasen ior iti i Aôndo ape ú lu laa?—Ôr Yohane 17:26; Mbaromanu 10:13, 14.

• Mbakristu mba mimi mba pasen ior kwagh u Tartor u Aôndo. Aôndo yange tindi Yesu ér a va pase loho u dedoo u Tartor. Ka Tartor u Aôndo tseegh ua sôr mbamzeyol mba uumace ye. Yesu yange za hemen u pasen kwagh u ú zan zan iyange i kar kpen la. (Luka 4:43; 8:1; 23:42, 43) Yange kaa ér mbadondon un vea pase ior kwagh u Tartor u Aôndo. Aluer or va kohol we ér nana pase u kwagh u Tartor u Aôndo nahan, ú hen wer, a̱ shi nan kpa, nan ze kwaghaôndo u nyi?—Ôr Mateu 24:14.

• Mbadondon mba Yesu mba ior i tar u bo ne ga. U fatyô u fan mbadondon mba Yesu sha ci u mba eren pati ga, shi mba we ave sha ayôôso a ior ve eren la ga. (Yohane 17:16; 18:36) Heela tseegh ga, mba dondon aeren man anza a bo a tar ne ga.—Ôr Yakobu 4:4.

• Mbakristu mba mimi doo ayol a ve tsung. Mkaanem ma Aôndo tese ve u nan ior mba ken akuraior cii icivir. Shin er ashighe kpishi ukwaghaôndo mba aiev ka ve sue ityav mbi ityar kposo kposo i nôngon la nahan kpa, mbacivir Aôndo sha mimi yô, mba eren nahan ga. (Mika 4:1-3) Mbakristu mba mimi mba ne shighe ve man akaa a ve sha u wasen mbagenev shi taver ve asema, man ka ve er kwagh ne a iyoltangen shio.—Ôr Yohane 13:34, 35; 1 Yohane 4:20.

Ka kwaghaôndo u han atesen a na cica cii a dugh ken Mkaanem ma Aôndo shi a ne iti i Aôndo civir, shi a pasen ér ka Tartor u Aôndo tseegh ua sôr mbamzeyol mba uumacee? Ka nongo u kwaghaôndo u han u tesen dooshima shi u nôngon ityav ga? U kaa wer nyi?—Ôr 1 Yohane 3:10-12.