ITYOUGH 6
Ka Ishimaverenkeghen i Nyi I_ Lu sha ci u Mbakpeneve?
1. Ka loho u dedoo u nyi u lu sha kwagh u mbakpeneve?
Shighe u Yesu za ar ken gar u Betani ikyua a Yerusalem la, huror na Lasaru kpe kuma ayange anyiin. Yesu za hen uwar u Lasaru vea Marta man Maria, anmgbianev mba kasev mba orkpen la. Ica i gbe ga yô, ikpelaior va kohol her. Sha kpôô yô, yange a saan Marta man Maria iyol shighe u Yesu nder Lasaru shin ku la je a gande!—Ôr Yohane 11:20-24, 38-44.
Marta yange vande fan loho u dedoo u sha kwagh u mbakpenev la. Yange fa ér Yehova ngu va nderen mbakpenev, vea hide a lu uma shin tar yô.—Ô Yobu 14:14, 15.
2. Mlu u mbakpenev ngu nena?
Aôndo kaa a Adam ér: “U ngu vuulevu, nahan ú shi ú hide ú hingir vuulevu.”—GENESIS 3:19.
I er uumace sha vuulevu. (Genese 2:7; 3:19) Se mba a jijingi ken a vese ga. Se mba inyam man awambe, nahan kwagh môm dugh ken a vese za lu ape gen shighe u se kpe ga. Ka sea kpe yô, mhirinim asem kpa ma kpe, nahan mbamhen asev cii ve saa ishe. Sha nahan yô, shighe u i nder Lasaru shin ku la, a ôr ma kwagh u yange kpe ve er un ga, sha ci u mbakpenev fa ma kwagh ga.—Ôr Pasalmi 146:4; Orpasenkwagh 9:5, 6, 10.
Aôndo tsahan ior ken usu shighe u ve kpe yôô? Er Bibilo i tese ér mbakpenev fa ma kwagh ga yô, ityesen i igyamusu la ka ityesen i aiegh je ka ashe tugh ga, man ngi vihin a vihi Aôndo iti. Ieren i nanden or ken usu la i ndôhôr Aôndo ishima je gande.—Ôr Yeremia 7:31.
3. Mbakpenev vea fatyô u lamen a vesee?
Mbakpenev mba lamen ga, shi mba ongo ga. (Pasalmi 115:17) Mbatyomov mbagenev hingir mbatyomov mba eren afer, nahan alaghga vea lam a or, vea bume nan ér ve mba jijingi u ma orkpen. (2 Peteru 2:4) Yehova soo ér cuku tsô kpa se de nôngon ser se lam a mbakpenev ga.—Ôr Duteronomi 18:10, 11.
4. Ka unô a va nder ve shin ku?
A va nder ior umiliôn imôngo mba ve lu shin iwar la vea hide a lu uma shin tar ne. Mbagenev ken mba yange ve fa Aôndo ga, shi ve eren akaabo la je kpa a nder ve.—Ôr Luka 23:43; Aerenakaa 24:15.
Mba a nder ve mbara vea zua a ian i henen mimi sha kwagh u Aôndo shi tesen ér ve na Yesu jighjigh sha u ungwan imo na. (Mpase 20:11-13) Mba a nder ve man vea er akaa a dedoo la, vea lu uma sha tar gbem sha won.—Ôr Yohane 5:28, 29.
5. Mnder u shin ku wase se u fan nyi sha kwagh u Yehova?
Ka er Aôndo a tindi Wan na a va ne uma na sha ci wase ve, i lu u a va nder mbakpenev shin ku ye. Sha nahan yô, mnder u shin ku la ka gbenda u Yehova a tese se dooshima man mlumun u sha mhôôn yô. Shighe u mbakpenev vea hide a lu uma la, ka an a hemba doon we u nengen a nanaa?—Ôr Yohane 3:16; Mbaromanu 6:23.
