Yehova ngu lôhôn ior mba ken akuraior cii ér ve kporom ikyua a na ken msen. (Pasalmi 65:2) Kpa ka hanma msen cii Aôndo a ongo ga. U tesen ikyav yô, aluer or ngu nzughul a kwase u nan yô, Aôndo una venda mbamsen mba nan. (1 Peteru 3:7) Shighe u Mbaiserael nômbo ikyôr u eren akaabo la, Aôndo ungwa mbamsen vev ga. (Yesaia 1:15) Sha mimi yô, ian i se lu a mi i eren msen hen Aôndo la ka ian i civirigh. Nahan cii kpa, mba ve er asorabo a vesen je kpa, aluer ve gema ishima yô, Aôndo una ungwa mbamsen vev.—Ôr Yesaia 1:15; 55:7.

Msen ka gbenda ugen u se civir Aôndo yô, nahan yô, gba u se eren msen hen Un u a gbe se la tseegh, ka Yehova je la. (Mateu 4:10; 6:9) Shi, er se yen yô, gba u se eren msen ken iti i Yesu, gadia yange kpe sha ci u asorabo a ase. (Yohane 14:6) Yehova soo ér se kôr mbamsen ken ityou se kimbir shin se nger ve shin takerada se ôron ga. Kpa a soo ér se eren mbamsen ken mkaanem asem, er i lu se ken ishima la.—Ôr Mateu 6:7; Mbafilipi 4:6, 7.

Mbamsen mba se eren ken ishima la je kpa, Orgban se una fatyô ungwan ve. (1 Samuel 1:12, 13) A kaa a vese ér se eren msen sha hanma ian cii, er shighe u se nder pepe man shighe u se soo u yaven tugh nahan, kua shighe u se soo u yan kwagh man shighe u se tagher a mbamzeyol kpaa.—Ôr Pasalmi 55:22; Mateu 15:36.

Ka zange u kporom ikyua a Aôndo ga sha ci u se mba hen atô u ior mba ve ne Aôndo jighjigh ga, shi kwagh kpa a gbe ve sha ityendezwa na i van a bem shin tar la cuku ga yô. (2 Timoteu 3:1, 4; 2 Peteru 3:3, 13) Sha nahan yô, gba u se kohol a mbananjighjigh a vese imôngo, se taver ayol ase asema.—Ôr Mbaheberu 10:24, 25.

 Aluer u ngu kohol imôngo a ior mba Aôndo a doo ve ishima la yô, u fatyô u kporom ikyua a Aôndo. Mbamkombo mba Mbashiada mba Yehova ve eren la ka aan a dedoo a jighjigh u nan u mbagenev una wase u yô.—Ôr Mbaromanu 1:11, 12.

U fatyô u kporom ikyua a Yehova sha u gbidyen kwar sha kwagh u ú hen ken Mkaanem nam la. Hen sha ityom na man kwaghwan na man uityendezwa nav. Aluer u ngu eren msen shi u ngu gbidyen kwar sha Mkaanem ma Aôndo yô, kwagh ne una wase u u fa er dooshima u Aôndo man kwaghfan na a lu kwagh u injaa kpishi yô.—Ôr Yosua 1:8; Pasalmi 1:1-3.

Saa u na Aôndo jighjigh ve u kporom ikyua a na ye. Kpa jighjigh u nan ngu er ma kwagh u uma u i gbe u a koson un nahan. Nahan gba u hanma shighe yô, u koson jighjigh wou u nan la sha u hiden henen sha atôakyaa a a ne ve u ne jighjigh la.—Ôr Mateu 4:4; Mbaheberu 11:1, 6.

Yehova we mba a doo ve ishima la ikyo. Ngu a kura ve sha nyityôkwagh i ia fatyô u vihin jighjigh ve u nan man ishimaverenkeghen ve i va lun uma gbem sha won la kpaa. (Pasalmi 91:1, 2, 7-10) Te se icin sha akaa a aa fatyô u vihin mkpeyol wase man msaanyol wase la. Yehova tesen se gbenda u hemban doon u se eren akaa ken uma wase yô.—Ôr Pasalmi 73:27, 28; Yakobu 4:4, 8.