Shighe u Yehova hii veren tsombor u uumace la je, a wa mbayev sha ikyev i mbamaren. (Mbakolose 3:20) Er u lu ormaren yô, ka we i gbe u ú tese wan wou u lun a Yehova kôôsôô shi va lun or u injaa ye. (2 Timoteu 1:5; 3:15) Gba u ú fa ishima i wan wou u kwase shin u nomso. Kpa gba hange hange u hii veren ve ikyav i vea dondo yô. Aluer u koso Mkaanem ma Yehova ken ishima you yô, u hemba tesen wan wou kwagh tsembelee.—Pasalmi 40:8.

KWAGH U BIBILO I KAA YÔ: “Lu tsev tsev sha u ungwan kwagh kpa . . . gema . . . ngôôr a kwaghôron.” (Yakobu 1:19) Nôngo mbayev ou ve nenge ér u soo wer ve lamen a we gbar gbar. Gba u vea fa ér zum u ve soo u lamen a we yô, we kpa u kegh iyol u ungwan kwagh u ve soo u ôron la. Kundu ishima a ve sha er vea fatyô u pasen we ishima ve wang yô. (Yakobu 3:18) Aluer ve fa ér vea ôr u kwagh kpa u zôhô shin u na ve ibo yô, vea soo u ôron we jighilii ga. Waan ishima a mbayev ou, shi pasen ve hanma shighe wer ve doo u ishima.—Mateu 3:17; 1 Mbakorinte 8:1.

KWAGH U Ú FATYÔ U EREN YÔ:

• Shighe u wan wou a soo u ôron we kwagh yô, kegh ato a na

• Lamen vea mbayev ou hanma shighe cii, i de lu hen shighe u ne tagher a zayol tseegh ga

KWAGH U BIBILO I KAA YÔ: “U nan ver ishima sha Kwaghôron yô, nan zua a kwaghdoon.” (Anzaakaa 16:20) Ashighe agen yô, a gba u ú ungwa kwagh u mbayev ou ve lu ôron la tsura. Mbayev kpishi ka ve soo u ôron kwagh seer, shin yeren kwagh u a lu ve ken ishima jim jim yô. “Or u nan kaa imo je er nan lu a ungwa ga yô, á hingir lanegh ku nan man kwagh u kunya kpaa.” (Anzaakaa 18:13) De vihin ishima a ve fefa ga.—Anzaakaa 19:11.

KWAGH U Ú FATYÔ U EREN YÔ:

• Kange ishima wer, wan wou nana lu ôron nyityôkwagh kpa, u tôndo nan iliam sha zwa, shin u vihi ishima ga

• Umbur er we kpa yange i lu u ken ishima shighe u ú lu er ve nahan la, man akaa a yange u nengen wer ka a injaa la

KWAGH U BIBILO I KAA YÔ: “Wan wam, ungwan ityesen i teru, tindi u ngôu kpaa, de te un kera ga.” (Anzaakaa 1:8) Yehova na ter man ngô cii tahav sha mbayev vev. Nahan gba u ne tese mbayev enev u nan ne icivir shi ungwan imo yen. (Mbaefese 6:1-3) Mbamaren ka vea ‘zua, vea lu ishima i môm’ ga yô, mbayev ve fa. (1 Mbakorinte 1:10) Aluer u lumun a mnenge u nomou shin kwase wou ga kpa, de gbe nen anyiman sha ato a mbayev enev ga, sha ci u kwagh la una na ne kera lu a icivir sha ishigh vev ga.

KWAGH U Ú FATYÔ U EREN YÔ:

• Lam nen shi gba nen zwa môm sha gbenda u ne tsahan ônov enev yô

• Aluer gbenda u ú soo wer ne yese ônov enev la kaha a mnenge u kwase wou shin nomou yô, nôngo kav mnenge na la

KWAGH U BIBILO I KAA YÔ: “Tese wanye gbenda u nana za yô.” (Anzaakaa 22:6) Ne gba teman tsô maa mbayev enev vea kar a fa kwagh u ne soo u tesen ve la ga. A gba u ne tsua gbenda u tesen ve, man er ne tsaha ve la kpaa. (Pasalmi 127:4; Anzaakaa 29:17) U kôôm mbayev la saa sha u gbidyen ve shin nan ve mtsaha tseegh ga, kpa gba u ú wasen ve u kaven ityôkyaa i i ne ve i we ma tindi yô. (Anzaakaa 28:7) Shi tesen ve u soon Mkaanem ma Yehova shi kaven akaawan a na. (Pasalmi 1:2) Kwagh ne una na yô, imo ve i ken ishima ia lu wang.—Mbaheberu 5:14.

KWAGH U NE FATYÔ U EREN YÔ:

• Nôngo mbayev enev ve nenge Aôndo ér ngu Or kpôô kpôô, u vea fatyô u suur sha a na yô

• Wase ve ve fa akaa a aa fatyô u vihin aeren a ve la, er akaa a sha Intanet, shin ajiir a sha Intanet a i lamen a ior her la nahan. Tese nen ve ve fa u palegh ior mba meen mbayev yaven a ve la