Nom vea kwase ka vea mar wan yô, ve ember kpishi, kpa tom u gema u ngee ve. Er i lu hiin yen u maren wan yô, alaghga a kpiligh ne iyol er ne lu vihin shighe wen man agee a en cii sha u nengen sha wan wen yô. Ne faantyô u yaven tsembelee ga shi a lu ne hang ken ishima, nahan a hingir ne haghelaa kpishi. A gba u we kua or u ú vese la cii ne pande akaa agen, sha er ne nenge sha wanikyundan wen, shi ne taver ivese yen yô. Kwaghwan u Bibilo una wase ne u nôngon a mbamtaver mban nena?

KWAGH U BIBILO I KAA YÔ: “Dooshima we ishima.” Shi dooshima “keren kwagh na iyol na tsô ga, nyoon ishima ga.” (1 Mbakorinte 13:4, 5) We kwase, er i lu hiin you maren ne yô, ishima you ia hemba yemen sha kwagh u wan wou. Kpa adooga nomou di una hii u nengen ér u ta un kera, nahan umbur er un kpa ka i sar un u lun a we imôngo yô. Aluer u wa ishima shi u ngu lamen a na kundu kundu yô, una nenge ér un gba u kwagh shi u wa un ken tom u nengen sha wan wen la.

“Ne nomso kpaa, lu nen a kasev enev imôngo sha kwaghfan.” (1 Peteru 3:7) Fa wer kwase wou una hemba eren tom u nengen sha wan u ne mar la. Er kwase wou a mar hegen ne tom ua seer un kpishi, nahan una vôr shin una ure je kpaa. Ashighe agen una vihi ishima a we je kpaa, nahan kpa, kundu ishima, gadia “or u nan nyoon ishima fefa ga yô, nan hemba or u ageegh.” (Anzaakaa 16:32) Er kwagh sha mkav shi na un iwasen i i gbe u ú na un la. —Anzaakaa 14:29.

KWAGH U NE FATYÔ U EREN YÔ:

• Ne uter: Wase nen kasev enev u nengen sha wanikyundan, a lu tugh je kpaa. Pande u vihin shighe sha akaa a a lu hange hange ga la, sha er u seer zuan a shighe u wasen kwase wou kua wan wou yô

• Ne ungô: Aluer nom kaa ér nana wase ne u nengen sha wanikyundan yô, lumun nen iwasen la. Nana er sha ishima yen ga kpa, de puun nen nan ga, kundu nen ishima, tese nen nan

KWAGH U BIBILO I KAA YÔ: “Ve hingir iyôgh i môm.” (Genese 2:24) Shin er ne seer or hen tsombor wen nahan kpa, umbur wer we vea or u ú vese la ne mba “iyôgh i môm” her. Nôngo nen tsung ivese yen i doo.

Kasev, wuese nen iwasen i noov ve ne ne la. Aluer ne wuese ve yô, a ‘kpe ve iyol.’ (Anzaakaa 12:18) We nom, kaa a kwase wou wer a doo u ishima kpishi, shi a gba u kwagh kpaa. Wuese un sha tom u a lu eren sha ci u tsombor la.—Anzaakaa 31:10, 28.

“Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.” (1 Mbakorinte 10:24) Hanma shighe yô, eren kwagh u una hemba lun or u ú vese la a inja yô. Zuan nen a shighe u teman lamen shi wuese ayol a en shi keghen ato zum u mô wen nan lu lamen yô. De vende u yaven a nomou shin kwase wou ga. Wa mbamgbe nav ikyo. Bibilo kaa ér: “De vende nen ayol a en ga, saa di alaghga né zua zwa ayol a en.” (1 Mbakorinte 7:3-5) Lam nen sha kwagh ne sha mimi ne uhar tseegh. Aluer ne mba a ishima i wan shi ne kav mlu u hanmô wen yô, ivese yen ia seer doon.

KWAGH U NE FATYÔ U EREN YÔ:

• Zuan nen a shighe u lun imôngo ne uhar tseegh

• Eren akaa a kiriki a tesen kwase wou shin nomou wer u soo un. U fatyô u ngeren un anloho tiônôô shin eren un iyua sha ankwagh u kpuaa

KWAGH U BIBILO I KAA YÔ: “Hii iyev je u kav icighanruamabera u a fatyô u tesen we u zan ken myom” la. (2 Timoteu 3:15) Hen nen sha kwagh u ne er sha u tesen wan wen yô. A due a ityough ki fan kwagh ken uya je. Shighe u wan wou nan lu ken uya la je, nana fatyô u kaven ikyenge yen, shi shighe u ne lu ngoron shin sen yô, nan kpa nana tsuwe ken uya. Ôron un takerada er a lu cuku la je. Aluer a kav kwagh u ú lu ôron ken takerada la ga je kpa, una va vese yô, un kpa una soo takerada u ôron kpishi.

De nengen wer wan wou u sha ikyum ndahar gande u ôron un kwagh u Aôndo ga. Eren msen hen Yehova, un kpa a̱ ungwan. (Duteronomi 11:19) Shighe u ú lu numben a na je kpa, ôron un akaa a Aôndo a gbe yô. (Pasalmi 78:3, 4) Una nguren vesen yô, una gba nengen er Yehova a doo u ishima kpishi yô, nahan un kpa una hen u lun a na kôôsôô.

KWAGH U Ú FATYÔ U EREN YÔ:

• Sôn Yehova wer a na u kwaghfan u tese wan wou

• Kimbir wan wou u sha ikyum akaa a u soo wer a fa la, sha er una hii u henen a er a lu cuku la je yô