Yehova soo ér se “eren kwagh u mimi.” (Mika 6:8) Gba hange hange u ne eren kwagh u mimi ken ivese yen, sha ci u mimi una lu hen atô wen ga yô, ne fatyô u nan ayol a en jighjigh ga. Saa ne na ayol a en jighjigh ve ne doo ayol a en ye.

Nyian ne, ka i taver kpishi u nom man kwase ve na ayol a ve jighjigh. Akaa nga ahar a i gbe u ne er keng ve ne kura ivese yen yô.

KWAGH U BIBILO I KAA YÔ: “Fa akaa a a hembe lun a inja yô.” (Mbafilipi 1:10) Ivese you kpa ka kwagh ugen u a hembe lun a inja ken uma wou yô. Nahan doo u ia gba u kwagh tsung.

Yehova soo ér we u hemba veren ishima sha nomou shin kwase wou, shi ne “tema saan saan.” (Orpasenkwagh 9:9) A ta icin gbang gbang ér mayange u de kenden or u ú vese la ga, kpa hanmô wen nana keren kwagh u nana er ve a saan orgen la iyol yô. (1 Mbakorinte 10:24) Eren kwagh a nomou shin kwase wou sha gbenda u una nenge ér u soo un shi un gba u kwagh kpishi yô.

KWAGH U Ú FATYÔ U EREN YÔ:

• Luun vea nomou shin kwase wou hanma shighe cii, de veren ishima sha akaa agen i hemban or u ú vese la ga

• Waan or u ú vese la ken mbamhen ou man akaa a u soo u eren cii

KWAGH U BIBILO I KAA YÔ: “Hanma or u nana kenger kwase sha u nana tôm un yô, nan er idya a na ken ishima je ve.” (Mateu 5:28) Aluer or ngu zeren henen sha kwagh u eren idya yô, nan ngu eren kwagh a nom shin kwase u nan sha mimi ga.

Yehova kaa ér gba u ú “kuran ishima you.” (Anzaakaa 4:23; Yeremia 17:9) Kpa saa u kura ashe a ou ve u fatyô u eren kwagh ne ye. (Mateu 5:29, 30) Dondo ikyav i tertamen Yobu, u yange ya ikyur a ashe na ér mayange una kenger sha kwase ugen ga la. (Yobu 31:1) Kange ishima wer mayange u nenge ufoto mba jimbagh ga. Shi kange ishima wer u hia a orgen ga.

KWAGH U Ú FATYÔ U EREN YÔ:

• Tese mbagenev wang wer ka kwase wou shin nomou tseegh u var a na ye

• Waan mbamnenge mba nomou shin kwase wou ikyo, shi aluer ishima za un iyol sha mlu wou vea ma orgen yô, fese je pav ijende la