Ka wea eren ivese yô, u hii tsombor u he. Er mbamaren ou ve doo u ishima shi u ne ve icivir hanma shighe nahan kpa, gba u or u ú vese la nana hemba gban we kwagh hegen a hanma orgen sha tar cii. Alaghga a taver ior ou mbagenev u lumun a kwagh ne. Kpa akaawan a Bibilo aa wase ne u lun a mnenge u vough, sha er ne za hemen u lun ken bem a ior enev, er ne lu nôngon kpoghuloo ner ivese yen i za i doo la.

KWAGH U BIBILO I KAA YÔ: “Civir teru man ngôu.” (Mbaefese 6:2) Wea gande kera kpa, gba u ú naan mbamaren ou icivir hanma shighe. Fa wer, er nomou shin kwase wou kpa a lu wan u or yô, gba u una ta mbamaren nav kera ga. “Dooshima we ishima . . . gbe iwuhe ga,” nahan mayange ishima i de ze u iyol sha mlu u kwase wou shin nomou vea mbamaren nav ga.—1 Mbakorinte 13:4; Mbagalatia 5:26.

KWAGH U Ú FATYÔ U EREN YÔ:

• Palegh u ôron akaa geseghee, amba er “Ior ou ka ve shi puun mo,” shin “M eren kwagh sha ishima i ngô u sha won ga” la

• Nôngo nenge a kwagh u kwase wou shin nomou a lu ôron la

KWAGH U BIBILO I KAA YÔ: “Or ka nan undu ter u nan kua ngô u nan, nan var ken kwase u nan, ve hingir iyôgh i môm.” (Genese 2:24) Shighe u ne er ivese yô, alaghga mbamaren enev vea nenge ér mba ityough sha a ven her, shi alaghga vea soo u wan ave sha akaa a ken ivese yen hemban er ma i lu la.

Ka we vea or u ú vese la ne gba zwa môm sha akaa a i doo u ne wa mbamaren enev ker man a i doo ne wa ve ker ga la, shi ne pase ve vea fa ye. U fatyô u ôron ve kwagh u a lu la jighilii, kpa i de lu sha icihi ga. (Anzaakaa 15:1) Iyol i hiden a mi ijime man ishima i legh legh, kua ishimawan ia wase ne u lun ken bem vea ior enev shi ‘kundun asema ayol a en sha dooshima.’—Mbaefese 4:2.

KWAHG U Ú FATYÔ U EREN YÔ:

• Aluer u nenge wer ior mba nomou shin kwase wou ka ve soo u wan ave sha ivese yen yum yô, lam sha kwagh shon vea na, sha shighe u i lu hang ga yô

• Gba nen zwa môm er i doo u ne nenge sha mbamzeyol mban yô