1. Sha kwagh u mciviraôndo yô, kanyi i gbe u ior vea tsua?

YESU yange kaa ér: “U nan lu nongo a Mo ga yô, nan ngu ihom a Mo.” (Mateu 12:30) Sea lu nongo a Yehova ga yô, se mba nongo a Satan. Ior kpishi hen ér ve mba civir Aôndo sha ishima na, kpa Bibilo kaa ér Satan ngu “tsughun tar cii.” (Mpase 12:9) Ior umiliôn imôngo na jighjigh ér ve mba civir Aôndo, kpa gema ka Satan Diabolo jighilii ve civir ye! Gba u ior vea tsua kwagh u ve soo u eren la ainge: Gba keng u saa vea civir, a̱ lu Yehova, “Aôndo u mimi” la ga yô, a lu Satan, “ter u aie” la.—Pasalmi 31:5; Yohane 8:44.

2. Ka gbenda môm u nyi Satan ka a nôngo u tagher ior u civir Yehova?

² U tsuan u civir Yehova la ka kwagh u sha kwaghfan shi ka kwagh u una na Aôndo a lumun a or yô. Kpa antior u nan civir Aôndo cii ka i doo Satan a nan ga; ka a nzughur a mba ve civir Aôndo la. Gbenda môm u a eren kwagh ne yô, ka sha u van nan a aheen shin tôvacan, sha ikyev i ahuraior man mba hen tsombor môm je kpaa. Yesu lu ta icin wener: “Mba ken ya u or vea gema vea lu mbaihomov mba nan je.”—Mateu 10:36.

3. Aluer tsombor wou shin ma huror wou hendan a mcivir u ú civir Aôndo la nahan, ú er nena?

³ Aluer kwagh la er ú nahan, ú er nena? Ior kpishi fa e̱r gbenda u mcivir ve la ú lu  ú sha mi ga yô, kpa uwer ka u gba ve u den mcivir ve shon la. Ka ve hen ér aluer ve er nahan yô a lu u heen tsombor ve. Imbakwagh la nahan i̱ gba iliamaa? Aluer ú kav wer mba hen tsombor wou mba man icimbiv mbi bov nahan, ú ta ve icin wer ve̱ de, ga yô, mbia va bula ve gaa? Ú nyôr a nyôr nongo a ve u̱ man icimbiv mbira ga, shin ú nyôrô?

4. Kanyi kwagh yange Yosua ôr a Mbaiserael sha kwagh u mciviraôndo sha ayange na laa?

⁴ Yosua yange taver Mbaiserael ishima ér ve̱ de aeren a kwaghaôndo man a uter vev mbatsev la. Yange kaa ér: “Nahan yô, cia nen TER, er nen Un tom sha ishima i môm man sha mimi kpaa; de nen mbaaôndo mba uter enev lu civir ve Ifi yande la kua ken Igipiti la, civir nen TER.” (Yosua 24:14) Yange Yosua ta ikyaa a Aôndo, nahan Yehova na un iveren. Aluer se kpa se ta ikyaa a Yehova yô, una ver se doo doo.—2 Samuel 22:26.

5. Hii nan ve i gbe u se haa iyangenev mbi ahiriv kera ciili?

⁵ U dughun ave sha kwagh u kwaghaôndo u aiegh kera la tese ér ka u se vihi iyangenev mbi ahiriv mbi se lu a mi la cii, e̱r bende man akpagher man ikunya-ahir man ugur man ambaakaa la nahan. Ka hange hange u se er nahan sha ci u ka u tesen ér se har sha Yehova se tôô ave sha je la.

6. Mbakristu mba tsuaa mbara yange ve er nyi a ityakerada ve i ahir laa?

⁶ Nenge ase kwagh u Mbakristu mba tsuaa mbara yange ve er zum u ve tsua u eren kwaghaôndo u mimi la. Bibilo kaa ér: “Mbagenev kpishi ken mbaerenahir, ve kohol ityakerada ve, ve va nande sha ishigh ki ior cii.”—Aerenakaa 19:19.

7. Aluer azôv cier se yô, se er nyi?

⁷ Ior mbagenev mba yange ve vande lun uwegh ken akaa a mbatsav man ishor i kpehen, shin ahir a eren man ve hii u civir Yehova yô, alaghga azôv a nzughur a ve. Aluer mba eren a we nahan yô, er msen yila Yehova sha iti zever zever. Una wase ú.—Anzaakaa 18:10; Yakobu 4:7.

8. Mbakristu mbá nengen akombo man ieev man ufoto mba i yaren tom a mi ken kwaghaôndo u aiegh la nena?

⁸ Ior mba ve civir Yehova cii ka u vea er akombo shin vea lu a ieev ga keng je, shin ufoto mba ken kwaghaôndo u aiegh kpaa ga. “Ka sha jighjigh u nan” Mbakristu mba mimi ve “lu zenden ye, ka sha mnenge a nenge ga.” (2 Mbakorinte 5:7) Mba ne tindi u Aôndo a we ér or a̱ de luun a ma eev ken mciviraôndo ga la icivir.—Ekesodu 20:4, 5.

9. Kanyi kwaghwan Bibilo i̱ we sha kwagh u̱ or hingir orfankwagh laa?

⁹ Bibilo kaa ér: “Zende a mbafankwagh imôngo, nahan we kpaa ú hingir orfankwagh.” (Anzaakaa 13:20) Aluer se soo u lun mbafankwagh yô, gba u se zenden vea Mbashiada mba Yehova shin se nyôr nongo a ve. Ka ve ve lu zan sha gbenda u uma la ye.—Mateu 7:14.

10. Mbashiada mba Yehova vea fatyô u wasen we u civir Aôndo nena?

¹⁰ Kwagh u ior gba Mbashiada ishima kpishi. Tom ve ka u wasen mbaasemaamimi sha u ve̱ kav mimi u Bibilo u a ze a or ken uma u tsôron la. Vea fatyô u wasen we sha u henen Bibilo a we gbilin. Vea fatyô u nan mlumun sha mbampin ou shi vea wase ú sha er ú dondo atindiakaa a Bibilo ken uma wou yô.—Yohane 17:3.

11. Mbamkombo mba Mbakristu vea wase ú nena?

¹¹ Ú fatyô u zuan a mfe seer sha kwagh u igbenda i Yehova ken mbamkombo vev mba ashighe kpishi ka ve zua ken Iyou i Tartor la. Á nyôôso isharen i̱ ú lu a mi u eren kwaghaôndo u mimi la. Shi ú zua a ityesen sha er ú hii ve ú wase mbagenev u henen mimi u Bibilo yô.—Mbaheberu 10:24, 25.

12. Msen una wase ú u civir Aôndo nena?

¹² Ú nguren henen ishima i Yehova man awashima na yô, alaghga ú seer lun a iwuese sha igbenda na i sha dooshima la. Shi ú seer vesen ken isharen you i i sar ú u eren  ishima na geman palegh kwagh u a vihin un ishima la. Umbur wer ú fatyô u kporom hen Yehova ken msen, sônon un wer a̱ wase ú sha er ú er kwagh u sha mi ú gema ú palegh kwagh u kpeegh yô.—1 Mbakorinte 6:9, 10; Mbafilipi 4:6.

13. Ú na á saan Yehova iyol nena?

¹³ Á zaan deghôô, ú nguren vesen ken jijingi yô, ú nenge er i gbe hange hange u ú tsegha iyol you sha ci u Yehova, á er ú batisema ú hingir Orshiada na yô. Ú nyôr nongo a ior i Yehova yô, ú na a saan un iyol. (Anzaakaa 27:11) Ú lu ken ior mba i saan ve iyol, mba Aôndo a ôr kwagh ve nahan la, ér: “Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam.”—2 Mbakorinte 6:16.