VEGHER 9
True Religion Can Benefit You Forever!
1. Aluer se ‘kporom hen Aôndo’ yô, kanyi ia eree?
MBA ve civir Yehova yô, ve doo un ishima. Aluer ú civir Yehova yô, una na ú iveren hegen man ken hemen kpaa. Bibilo kaa ér: “Kporom nen hen Aôndo, Un kpaa, Una kporom her a ven.”—Yakobu 4:8.
2. Se kporom hen Aôndo nena, man kwagh ne una bende a mbamsen asev nena?
2 U kporom hen Aôndo yô, saa ú hen Mkaanem nam shi ú dondo ma kpaa. Aluer ú er msen sha ishima i Yehova yô, una ungwa msen wou la shi una er kwagh sha mi kpaa. Orkristu u i yilan ér apostoli Yohane la yange nger nahan wener: “Ka vangertiôr wase u se lu a mi sha ishigh [ki Aôndo] ne: ka sea sôn nyityô kwagh u a lu sha ishima Na vough yô, A ungwa se. Aluer se fa, ngu ungwan hanma kwagh u se sen yô, shi se fa, se mba zuan a mbamsen mba se sen Un la cii.”—1 Yohane 5:14, 15.
3-7. Se zua a kwaghfan u Aôndo la nena, man una wase se nena?
3 Heela tseegh ga, ú kporom hen Aôndo yô, una na ú kwaghfan u nôngon a akaa a á ze ú iyol ken uma ayange ayange la. Bibilo kaa ér: “Aluer kwaghfan una yina mô wen yô, nana̱ sôn Aôndo.”—Yakobu 1:5.
4 Kwaghfan u Aôndo una wase ú nena? Hiihii yô, una wase ú u fan akaa a a lu sha ishima i Yehova ga la. Shi ú hen ú fa ityôkyaa i í ne ve akaa shon a lu sha mi ga la man er ú palegh u eren á la kpaa. Imba mfe la ia kura ú sha mbamzeyol kpishi mba ve lu zan ior iyol wuee la. U tesen ikyav yô, u ungwan kwaghwan u Aôndo a we ér se̱ lu wang sha aeren la wasen u kuran ior mba Aôndo sha yav mbu kwase wan sha ishima i nan ga la man iangev mbi tsaren sha yavaor man ivese i lun a msaanyol shio shin ivese i paven kpaa.
5 Shi kanyi igen kpa kwaghfan u Aôndo a ne la una wase ú u erene? Una wase ú u seer zuan a mtsera ken uma wou. Una wase ú u tsuan akaa a i gbe u ú er la sha mkav, ambaakaa er u nengen sha inyaregh you nahan. Ú fatyô u haren ishima sha akaa a injaa, kpa geman vendan akaa a á lu a ikyoogh ga la.
6 Shi kwaghfan u Aôndo una wase ú ken mlu wou vea mbagenev kpaa. Tsombor wou ua hemba lun ken msaanyol. Ú ya ijende i injaa i tsan gbem a mbagenev, shi ú lu a icivir sha ishigh ki ior mba ve civir Aôndo ga je kpaa.
7 Heela tseegh ga, ú lu a kwaghfan u Aôndo yô, una kôôm mnenge u ú lu a mi sha uma la kpaa. Una wase ú u nôngon a mbamtaver kua ahenge a van a ú zough a mi ken uma la kpaa. Shi ú eren kwagh akuma akuma, ú lu a ishimaveren wer ken hemen yô kwagh a za a doo kpee. Mnenge u nengen ér guda ngu van ken hemen ne una gema a wase ú u zuan a mkpeyol kua ishima i kundu kundu kpaa.—Anzaakaa 14:30; Yesaia 48:17.
8. Aluer ú ngu civir Aôndo yô, kanyi ú cia ga?
8 Aluer ú ngu civir Aôndo u mimi ne yô, ú kera lu ken ikyangenev mbi mciem ma mba ve civir un ga ve lu a mi la ga. Er ú fe wer mbakpenev fa ma kwagh hen ape ve lu Yohane 8:32.
shin uwar la ga yô, ú cia mbakpenev ga. Er ú lu a vangertiôr sha ityendezwa i Aôndo a er wener una nder mbakpenev shin ku la yô, ú cia ku ga. Shi er ú fe wer Aôndo hemba agee cii yô, ú kera cia tsav shin ahir ga.—Mbaperapera Vea Ya Dyako u Tar
9-11. Ka unô vea lu ken Paradiso, man ka unô vea lu ker ga?
9 Aluer ú kporom hen Aôndo yô, ú cia kwagh u una va ken hemen la ga. Er se vande nengen nahan, Bibilo tsengaôron kwagh u mbamzeyol kpishi mba se lu nengen a mi nyian ne. Yehova pase se ér akaa ne nga di hila tsô; shi ica ga tsô, Tartor u Aôndo ua gema tar ne ua hingir paradiso.—Luka 21:10, 11, 31; 23:43.
10 Ka mba ve kporom hen Yehova shi ve civir un la tseegh vea lu ken Paradiso ye. Bibilo kaa ér: “Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:10, 11.
11 Mba ve vende u dondon atindi a perapera a Aôndo la sha apera yô, a tim ve gbem sha won. (2 Mbatesalonika 1:8, 9) Vea kera lu ga kuaa. Vea kohol Satan man azôv na ken mtim u tsôron. (Mpase 20:10, 14) Kpa mba ve hen kwagh u Yehova shi ve civir un yô, a saan ve iyol ken Paradiso shin tar.
Mlu u Kpilighyol u ken Hemen!
12. Bibilo ôr sha kwagh u mlu u ken hemen la ér nyi?
12 Yehova ver akaa a injaa a kpilighyol sha ci u mba a doo ve ishima la! Nenge ase kwagh u Mkaanem nam ma ôr sha kwagh u uma u ken Paradiso shin tar la:
-
Kwaghyan una dumbur: “Iyiav mbi̱ ngee shin tar sha ityouv mbi iwoov je kpaa.”—Pasalmi 72:16.
-
Uya mba dedoo: “Vea maa uya man vea tema keregh.”—Yesaia 65:21.
-
Tom u saanyol: “Uicuwan Av kpaa vea ya tom u ave ve zan zan je. Vea kera er tom gbilin ga.”—Yesaia 65:22, 23.
-
Angev mbua kera lu ga: “Ma or u nan tem ker kpaa nana kera kaa er: Kwagh nyoon mo, ga.”—Yesaia 33:24.
-
Iwan ia kera lu ga: “Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.”—Yesaia 35:5, 6.
-
Mnyoon man ijungwen man ku kpa ua kera lu ga: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.
-
Ityav mbia kera lu ga: “[Aôndo] er ityav mbi bee zan zan ar hen ikighir i tar je, A sombo ada, A kever iwange, A nande akekeautya sha usu.”—Pasalmi 46:9.
-
“Mbaperapera vea ya dyako u tar, vea lu ken u gbem.”—Pasalmi 37:29.
13. Ka an tseegh nana fatyô u geman tar ne hingir paradiso, man ka sha ci u nyi?
13 Uumace vea fatyô u eren akaa ne ga, kpa Yehova ngu aa tahav mbu eren nyityô kwagh i̱ a kaa ér una er cii. Ma kwagh môm u una yange un u eren kwagh u a soo u eren je kpa ngu ga. Bibilo kaa ér: “Ma kwagh môm u a hembe Aôndo u eren un yô, ngu ga.”—Luka 1:37.
14. Ú er nan ve ú tser sha gbenda u zan ken uma u tsôron laa?
14 Yehova ngu nan ior cii ian sha ikyev i Mbashiada nav ér ve̱ ‘nyôr hen hunda u hogholoo’ la shi ve̱ yem sha gbenda u zan ken uma u tsôron la. We kpa ma ú lu ken ior mba saan saan mba ve lumun mlehe shon ne. Ma ú er kwaghaôndo u mimi la nahan iveren i Yehova ma i ne ú iember gbem sha won!—Mateu 7:13, 14.