1. Kanyi kwagh i gbe u se er ve a lu sha ishima i Aôndo?

CII man se̱ lu ken mlu u kundu kundu u sha dooshima vea Aôndo yô, a gba u se dugh ave ase sha kwagh u kwaghaôndo u aiegh kera. Se gema se er kwaghaôndo u mimi kpee. Ior umiliôn imôngo tar sha won cii mba eren kwagh la nyian.

2. Ka hana a fatyô u zuan a Mbashiada mba Yehova, man tom ve kanyi?

² Er Bibilo tsengaôron nahan, mbacivir sha mimi mbara ka “zegeikpelaior” i i “due ken hanma ikurior man hanma nongo man hanma nongoior man hanma zwa” la. (Mpase 7:9) Mbashiada mba Yehova umiliôn imôngo mba ken ityar i kuman er 235 nahan, mbá wasen mbagenev u henen kwagh u igbenda i sha dooshima i Yehova man akaa a á soo la kpaa.

3. Ka ana Mbashiada ve civiri, man ka imba mcivir u nyi ve palegha?

³ Mbashiada kav e̱r i lu Yehova tseegh a kom u a civir un yô. Mba vende u guren ieev inya shin ufoto mba kwaghaôndo la. (1 Yohane 5:21) Mba civir mbakpenev sha u za tsan ku ga, shin uiniongo mba ve samber a jighjigh u nan u ukwaghaôndo mbaaiev man “ityesen i ujijingi mba bov” la kpaa ga. (1 Timoteu 4:1) Nahan cii kpa, u surun yô, ka ve sur mba ve zungwen mbara asema sha u pasen awashima u Aôndo a we u va nderen mbakpenev sha u ve̱ lu shin tar u paradiso la.—Yohane 5:28, 29; Aerenakaa 24:15.

4. Mtil u ior i Aôndo sha kwagh u ahir ngu nena?

⁴ Mbashiada mba ave sha kwagh u ahir shin ishor shin tsav ga, gadia ve fa e̱r akaa ne a dugh hen Diabolo yô. Mba haren sha ahir sha u a̱ kura ve ga—ka Yehova ve suur sha a na ye.—Anzaakaa 18:10.

5. Ka sha nyi gbenda Mbashiada mba Yehova ve lu “ior i tar ne ga”?

⁵ Yange Yesu kaa wener mbahenen nav vea lu “ior i tar ne ga.” (Yohane 17:16) Yesu iyol na kpa yange venda u wan uwegh ken pati u sha ayange na la. (Yohane 6:15) Kape Mbashiada kpa ve nyer pati ga shi ve soon tar ve i hembe ú mbagenev ga shi ve kpelan hemen ken tar u ngun kpaa ga je la. Nahan cii kpa, mba te kpandegh shi mba kor atindi a tar u ve lu ker cii.—Yohane 15:19; Mbaromanu 13:1, 7.

6. Ka akaawan a nyi mbacivir Aôndo ve dondon sha kwagh u ivesegh man ivese i pavene?

⁶ Er Mbashiada ve dondon hemen u gomoti yô, ka ve ver ishima sha e̱r vea nger ivese ve sha tindi vough yô. (Titu 3:1) Mbá dondon hemen u Aôndo, nahan mba palegh ivese i ikpela ukase la. (1 Timoteu 3:2) Heela tseegh ga, er mbacivir Aôndo ve eren sha akaawan a Bibilo ken uuma vev yô, ka i taver u ivese ve gban paven nahan tsô la.

7. Mbashiada mba tesen dooshima hen ayol a ve nena?

⁷ Mbashiada doo ayol a ve. Imba dooshima ne, kua mdoo u Aôndo a doo ve ishima la, na ve mbá ken mzough u anmgbianev u lun gungur môm, shin er ve lu ken ijô man akuraior wue wue nahan kpaa. Aahe ka una er shin kwagh ka una gba sha iwasen yô, Mbashiada ve za u za wasen mbagenev fese je. Mbashiada ka ve tese dooshima ken mlu u uma ve la.—Yohane 13:35.

8. Ka aeren a bo a nyi ior i̱ Aôndo i̱ palegha?

⁸ Ior i Yehova ka i̱ nôngo tsung sha u lun jighjigh, lun inja wang. Mba palegh iv man aie man idya man ihundugh ki msôrough man kpenga u eren sha anyighe la. Noov mba gbidi kasev vev ga. Cii man mbagenev yange ve hingir Mbashiada yô, ve vanden eren akaa ne, kpa sha iwasen i Yehova yô, ve de. Yange i “ôô” ve ve hingir wang sha ishigh ki Aôndo.—1 Mbakorinte 6:9-11.

9. Takerada ugen ôr kwagh u ukwaghaôndo mbaaleluya mba ken Afrika mbara ér nyi?

⁹ Ukwaghaôndo kpishi mba sengen ér ve  mbá mbà mimi. Ka ve tese uwegh sha akaa a vesen a ve er la sha u suen ishenge ve la. U tesen ikyav yô, takerada ugen ôr kwagh u ucôôci mba i yer ken Afrika ér mbaaleluya la nahan ér: “Nongo u [Mbakristu mba hev] ne kar ngohol tom u mbaahiriv shin mbasôronakombo yange ve eren la . . . . Ka ve senge ér ve mba tsengeôron kwagh u ken hemen shi mba eren uivande kpaa. Uprofeti mba ken a ve ka ve naan ior mbampase mba sha mnenge shi ve pasen mnyam kpaa. Ka ve yar tom a icighan mnger man icighan mkure man mtwem man uikyenduru man akaa a human doon sha u been ior angev shi yangen angev kpaa.”

10, 11. Hii nan ve akaa a i kpenen yilan ainge ér uivande la a tese ér ma kwaghaôndo due ka hen Aôndo ga?

¹⁰ Mba ve ze mbaadua mban ka ve kaa ér uivande mba ve eren la ka ikyav i tesen ér iveren i Aôndo ngi sha kwaghaôndo ve je la. Kpa ka akaa a i kpenen yilan ér uivande la a tesen ér Yehova lumun a ma kwaghaôndo ga. Satan ka a na mbacivir sha aie mbara agee u eren “akaa a kpilighyol sha uivande.” (2 Mbatesalonika 2:9) Heela tseegh ga, Bibilo yange i tsengakaan ér lù u uiyua mba sha ivande mba yange Aôndo na, e̱r u ôron akaaôron a profeti man u lamen ijô shin mfe u kahan kposo la cii a “kar a mi kera.”—1 Mbakorinte 13:8.

¹¹ Yesu ta icin ér: “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô. Sha iyange la ior kpishi vea kaa a Mo er: Tere! Tere! Ka ken iti You man se lu ôron kwaghôron u profeti gaa? Man ka ken iti You se lu dughun ujijingi mba bov gaa? Man shi ka ken iti You se lu eren akaa a ageegh kpishi kpaa gaa? Tsô Me kaa a ve Mer: Mayange je M ngu a fa ne ga, yem nen heen kera, ne mbavendanatindi mban.”—Mateu 7:21-23.

12. Ka unô vea nyôr Tartor u sha?

¹² Nahan yô, ka an nana nyôr Tartor u sha? Ka mba ve eren ishima i Yehova la.

13. Kanyi tom Aôndo a kaa a ior nav ér ve̱ er ainge, man ka unô ve eren ú?

¹³ Kanyi Aôndo a soo ér ior nav ve̱ er ainge? Yesu yange kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii.” (Mateu 24:14) Ka tom u Mbashiada mba Yehova ve eren a ishimataver je ne.

14. Kanyi i lu Tartor u Aôndo, man ka an nana hemen ken Tartor shono?

¹⁴ Mbashiada mba Yehova yôô kwagh u Tartor u Aôndo “tser tar” jimin cii, ér ka ú ú lu gomoti u sha u una va hemen tar ne ken perapera ye. Mba tesen ér Yehova kôr Kristu Yesu Tor u Tartor la, vea iorov 144,000 mba hemen vea na mba i tsough ve ken uumace yô.—Daniel 7:14, 18; Mpase 14:1, 4.

15. Kanyi Tartor la ua va tim kera?

¹⁵ Mbashiada ka ve bugh Bibilo ve tese ior sha u ve̱ fa e̱r Tartor u Aôndo ú lu va timin tar u Satan ne kera cii yô. Kwaghaôndo u aiegh una bee kera cii, a ityesen na i lahan Aôndo geman nan Diabolo icivir la! (Mpase 18:8) Shi ugomoti mba uumace, mba ve hendan a Aôndo la kpaa vea kera lu ga!—Daniel 2:44.

16. Ka unô vea lu sha ikyev i Kristu Yesu, man vea lu hana?

¹⁶ Heela tseegh ga, Mbashiada mba Yehova mba pasen ken igbar ér Kristu Yesu una va a mbamtsera mba dedoo hen mba ve eren kwagh u Aôndo a soo la cii. Vea lu shin tar sha ikyev i hemen na. Bibilo er ityendezwa ér: “Una yima oribanave zum u nana vaa yô, man icanor kua or u nan lu a orwasen ga kpaa. Mhôônom maa kôr un a mbaatsanev man mbaibanave, una yima uuma mba mbaibanave kpaa.”—Pasalmi 72:12, 13.

17. Ka unô i lu ve tseegh ve pasen kwagh u Tartor u Aôndo?

¹⁷ Ma nongoior ugen ngu u ú eren ishima i Aôndo sha u pasen loho u dedoo u Tartor ne ga. Ka Mbashiada mba Yehova tseegh ve pasen ior kwagh u Tartor u Aôndo ken igbar sha tar cii ye.