U WA iyol i duen kwaghpasen pepe sha iyange i u yar tom ga yô. Kpa u er kekeke, sha ci u wa vôron we iyol. Sar u ape memen pepe kpen kpen! Kpa u er msen sha kwagh ne, maa u kange ishima u due u yem. U za er tom vea anmgbian u kwase u a bee iyol yô, shi ishimataver kua ieren na i kundu kundu la doo ú kpishi. Shi er u lu zenden pasen kwagh sha uya uya la, u umbur er anmgbianev ou mba nomso man mba kasev tar sha won cii kpa ve lu pasen loho shon, shi eren tom a ityakerada i we kpa u lu eren tom a mi la, shi i tsaase ve sha tom u pasen kwagh ne er we kpa i tsaase we la nahan yô. U hidi hen ya yô, taver we iyol kpishi. Doo u tsung er ashen u dugh kwaghpasen yô!

Ka tom u pasen kwagh la je u lu tom u hemban cii u Tartor u Aôndo u lu eren hegen ye. Yesu yange tsengaôron ér a samber a loho u dedoo ne sha gbenda u kpilighyol ken ayange a masejime ne. (Mat. 24:14) Kwaghôron na u profeti ne ngu kuren nena? Ken vegher u sha uhar u takerada ne, se lu timen sha kwagh u mbapasenkwagh, man igbenda ve i pasen kwagh, kua akaa a hange hange a ve eren tom a mi ken kwaghpasen u Mbakristu, u a lu wasen ior umiliôn imôngo tar sha won cii u nengen er Tartor u Aôndo u lu kpôô kpôô la.