U NGU pasen kwagh sha uya uya. Ica gbe ga yô, u ungwa mato u dasenda ngu eren imo ken ica. Kpa imo la ngi taver seer seer. U za hiin wer u lam a orya ugen yô, mato u dasenda va due, maa anmgbian u u dugh kwaghpasen vea na la hingir kera ke kera. Ordasenda ugen maa due va pine ér: “Ka ne ne lu zende sha uya uya pasen ior Bibilo ye ga? Ior mba yilan ne ijir hen a vese!” Ne gema ne lam a ordasenda la sha icivir, shi ne pase un er ne lu Mbashiada mba Yehova yô. Maa nyi i ere?

Yiase ia hemba pasen. Ken anyom a karen ne, gomoti u tar u u lu ker la er kwagh a Mbashiada mba Yehova nena? Gomoti u tar shon na hanma or ian i eren kwaghaôndo u nan soo yôô? Aluer a na ian yô, alaghga ka iniôngon i anmgbianev ou mba nomso man mba kasev mba ken mcivir u Yehova, mba yange ve er tom kpoghuloo sha u ‘palegh Loho u Dedoo iyol shi timin u’ sha tindi la. (Fil. 1:7) Hanma ijiir i u lu cii, aluer u ngu henen sha kwagh u ajir a Mbashiada mba Yehova ve hembe yô, kwagh la una seer taver jighjigh wou u nan. Ken vegher u sha 4 ne, se nenge sha kwagh u ajir a vesen agen, a Mbashiada mba Yehova ve hembe yô. Ajir a se hemban la ka ikyav i vesen, i tesen ér Tartor u Aôndo la ka gomoti kpôô kpôô, sha ci u se tseegh ma se fetyô u hemban ajir a tamen imba la nahan ga!