ITYOUGH 11
Ior mba Yange Ve Nger Kwagh u Yesu La
U nenge a ior mba shon ken foto ne kpa?—Ka Mateu man Marku man Luka man Yohane man Peteru man Yakobu man Yuda kua Paulu. Ior mban cii lu uma sha shighe u Yesu lu shin tar la, shi ve nger kwagh na kpaa. De se seer fan kwagh ve.
Ka nyi u fe sha kwagh u ior mbana?
Iorov utar ken a ve lu mbaapostoli, mba ve pasen kwagh vea Yesu imôngo yô. U fa iorov mba utar mba shon kpa?—Ka Mateu man Yohane kua Peteru. Apostoli Mateu man Yohane yange ve fa Yesu dedoo, nahan hanmô ve nan nger takerada sha kwagh u Yesu. Apostoli Yohane shi nger takerada ugen, mba yer u ér Mpase, shi a nger uwashika mbagenev utar, mba yer ve ér, Yohane u Hiihii man Yohane u sha Uhar man Yohane u sha Utar. Apostoli Peteru nger uwashika uhar ken Bibilo. Mba yer ve ér, Peteru u Hiihii man Peteru u sha Uhar. Ken washika u Peteru u sha Uhar la, Peteru nger kwagh sha kwagh u imo i Yehova i yange i due sha, i ôr kwagh a Yesu shin tar yô. Imo la kaa ér: ‘Ngun ka wan wam u doon mo ishima, u a er kwagh u doon mo yum yô.’
Ior mbagenev mba ve lu ken foto ne la kpa ve tese se kwagh u Yesu ken ityakerada i ve nger yô. U môm ken a ve ka Marku. Se hen ser yange lu hen ape i kôr Yesu la, nahan nenge hanma kwagh u er hen shighe la yô. Ugen di ka Luka. Un lu ortwer shi se hen ser yange hingir Orkristu shighe u Yesu kpe kera la.
Mbangeren Bibilo mbagenev uhar mba u nengen a ve ken foto heen ne, lu anmgbianev mba Yesu mba kiriki. U fa ati a ve kpa?—Ka Yakobu man Yuda. Sha hiihii la ve na Yesu jighjigh ga. Shi ve henen ér Yesu ngu ityough vough ga. Kpa shighe karen yô, ve na Yesu jighjigh shi ve hingir Mbakristu.
Orngeren Bibilo u ú mase nengen a na ken foto heen ne ka Paulu. Shighe u lu Orkristu ga la, i yilan un ér Saulu. Yange soo Mbakristu ga shi naan ve ican kpishi. U fa kwagh u na ve Paulu soo u hingir Orkristu kpa?— Sha iyange igen la, Paulu lu yemen sha gbenda, nahan ica i gbe ga yô, a ungwa orgen ôr kwagh a na sha aôndo shaala je. Or shon lu Yesu! A Pine Paulu ér: ‘Hii nan ve u eren mba ve nem jighjigh la icana?’ Kwagh ne eren Paulu yô, a gema inja, a hingir Orkristu. Paulu nger ityakerada i Bibilo 14, hii sha Mbaromanu zan zan kighir sha Mbaheberu.
Se mba ôron Bibilo hanma iyange, shin se mba ôron ga?—Aluer se mba ôron Bibilo yô, se fa akaa kpishi sha Kwagh u Yesu. U soo wer u seer fan kwagh u Yesuu?—
