Nenge wanye u cuku u a lu ken foto heen ne. Ngu tswen nahan cier un iyol, shin cier un iyol ga? I lu nahan cier we iyol shighe u ú lu we tswen vee?— Hanma or cii ka nana lu tswen yô, shighe ugen i cier nan iyol. Bibilo ôr kwagh u azende a Yehova a yange lu tswen ve cier a iyol yô. Môm ken ve yô lu Eliya. De se fa kwagh na.

Eliya lu ken tar u Iserael ica i gba cii, i mase maren Yesu ye. Ahaba, u lu tor u Mbaiserael sha shighe u Eliya la, civir Yehova, u a lu Aôndo u mimi la ga. Ahaba vea kwase na Yesebel cii ve civir Baal, u lu Aôndo u mimi ga la. Nahan ior mbagenev kpishi ken tar u Iserael kpa hingir u civir Baal. Yesebel, kwase u Tor Ahaba la yange wa ifer kpishi, nahan soo u wuan ior mba ve civir Yehova la cica cii, kua Eliya kpaa! U fa kwagh u Eliya yange er kpa?—

 Eliya yevese. Yange yem ken taakyôngo ica, za yer ken bar. U hen wer ka nyi yange i na ve yevese za yere?— Een, yange cier un iyol. Kpa kwagh la yange ma cier Eliya iyol ga. Sha ci u nyi? Sha ci u yange fa ér Yehova una wase un. Yehova vande tesen Eliya tahav nav cii kwagh ne er ye. Eliya yange er msen hen Yehova kwagen la nahan, Yehova ungwa msen na la, a tindi usu sen sha, va er kwagh u Eliya soo la. Nahan shighe u Yesebel soo u wuan Eliya la kpa, Eliya ma fa je ér Yehova shi una wase un!

Shighe u Eliya lu ken bar la, Yehova lam a na shi pine un ér: ‘Ka nyi u eren heene?’ Eliya kaa a na ér: ‘Ka mo tseegh m lu civir we sha mimi her ye. M ngu mo tswen, shi ka cier mo iyol er a va wuam nahan.’ Eliya yange hen ér i wua mbacivir Yehova mbagenev cica cii bee. Kpa Yehova kaa a Eliya ér: ‘Ka mimi ga. Ior mbagenev 7,000 mba civir mo her. Nahan taver ishima. M ngu a ityom kpishi i m soo mer er yô!’ U hen wer Eliya yange ungwa kwagh la nahan doo unu?—

U hen nyi sha kwagh u yange er Eliya laa?— Mayange de nengen wer u ngu tswen ga, shi i de cier we iyol kpaa ga. U ngu a azende a soon Yehova kua we kpaa. Shi Yehova ngu a tahav kpishi, nahan una wasen we hanma shighe cii. U fa wer u ngu tswen ga nahan saan we iyol kpa?—