I lu nahan or ôr u kwagh u ior kpishi ve fe ga vee?— * Bibilo ôr “kwaghmyer” ugen. Ka kwaghmyer sha ci u ior kpishi fa un ga. Mbatyomov mba shaav je kpa yange ve ker u seer fan kwagh la. U soo u fan kwaghmyer shonoo?—

Tsuaa la je, Aôndo gba nomsoor man kwase, ve lu uumace mba hiihii. I yilan nomsoor la ér Adam, kwase la di i yilan un ér Ifa. Aôndo yange na ve ya u doon ashe, i yilan ér Sule u Eden. Adam vea Ifa yange vea ongo imo i Aôndo yô, ve man ônov vev cii ma ve gem tar cii ma u hingir paradiso, er sule la nahan. Shi ma ve lu uma ken Paradiso gbem sha won. Kpa u umbur kwagh u Adam man Ifa yange ve er kpa?—

Adam man Ifa yange ve hemba Aôndo ato, ka nahan ve se lu ken paradiso ga ye. Kpa Aôndo kaa ér una hide a sôr tar ne ua doo ashe, shi hanma or nana lu uma gbem sha won shi a saan nan iyol kpaa. Una er kwagh ne nena? Yange shighe kar kpishi je kpa ior fa kwagh ne ga. Lu kwaghmyer.

Shighe u Yesu va shin tar la, a seer tan ior iwanger sha kwaghmyer ne. Yange kaa ér kwaghmyer la ngu ôron kwagh u Tartor u Aôndo. Yesu kaa a ior ér ve eren msen ér Tator la u̱ va. Tartor la ua va gema tar ne ua hingir paradiso u doon ashe.

Saan we iyol er u fe kwaghmyer ne yôô?— Umbur wer ka mba ve ungwan imo i Yehova la tseegh vea lu uma ken Paradiso ye. Bibilo ôr se akaa kpishi a nomso man kasev mba yange ve ungwan imo i Yehova yô. U soo u fan kwagh vee?— De se time sha kwagh ve, nahan se fa kwagh u se er ve se lu er ve nahan yô.