De se tôô ser se mba ken gar u Yeriko. Gar ne lu ken tar u Kanaan, ape ior civir Yehova ga la. Kwase ugen u i yilan un ér Rahabi yô, lu ken gar la.

Shighe u Rahabi lu wanyekwase la, a ungwa kwagh u Mose yange pav Zegemnger u Nyian, due a Mbaiserael ken tar u Igipiti kera la. Shi yange ungwa er Yehova wase ve ve hemba mbaihyomov vev ityav yô. Kwa ne yô, Rahabi ungwa ér Mbaiserael haa afo ikyua a gar u Yeriko!

Sha iyange igen aikighe yô, Mbaiserael za va iorov uhar va nyôr ken gar u Yeriko, ér vea tôv vea fa akaa a ken gar la. Nahan ve nyôr hen ya u Rahabi. Rahabi maa kaa a ve ér ve lu ken iyou na. Tugh mbu il yô, tor u Yeriko ungwa ér ior mbagenev va u va fan kwagh u gar na, mba hen ya u Rahabi. Tsô tor la tindi ior ér ve za va a ve. Rahabi yer ior mba ve soo u fan akaa a ken gar la, maa a kaa a ior mba tor tindi ve la ér: ‘Nomsombaiorov mbara ve ve her a mo, kpa ve due ken gar ve yem. Ne zenda ve ijime hegen yô, ne kohol ve.’ U fa kwagh u yange na ve Rahabi yer ior mba ve za ér vea za fa akaa a ken gar u Yeriko la kpa?— Ka sha ci u yange na Yehova jighjigh shi a fa ér Yehova una gema tar u Kaanaan una na Mbaiserael.

Cii man ior mba ve za ér vea za fa akaa a ken gar u Yeriko la due hen ya u Rahabi yem yô, ve kaa a Rahabi ér mba va timin gar u Yeriko, kpa ve tôndo zwa a na ér una war a tsombor na. U fa kwagh u yange ve kaa a na ér a er kpa?— Yange ve kaa a na ér: ‘Ngohol kor u mou u nyian ne zer sha windou u iyou you ne. Aluer u er nahan yô, hanma or u nan kohol hen ya wou cii nana war.’ Rahabi er kwagh u ior mba yange yer ve la kaa ér a er la vough. U fa kwagh u yange za hemen kpa?—

Ayange nga kar kpuaa yô, Mbaiserael va ningir gar la ving ving tser. Hanma iyange ve va ningir nahan kwa môm. Ve er nahan zan zan ayange ataratar. Kpa sha iyange i sha utaankaruhar la yô, ve ningir gar la kwa taankaruhar, maa ve ger amo taver taver. Yehova maa er fensi u gar la yôhôr cica cii haa inya. Kpa iyou i i zer mou u nyian sha windou la yô, i̱ yôhôr  ga! U nenge a iyou shon ken foto ne kpa?— I war Rahabi vea tsombor na!

Kwagh u Rahabi er la tese u nyi?— Yange na Yehova jighjigh sha ci u akaa a kpilighyol a yange ungwa ér Yehova er la. We kpa u ngu henen akaa a kpilighyol a Yehova kpishi. U na Yehova jighjigh er Rahabi nahan kpa?— Se fa, u na un jighjigh!