Timoteu lu wanyenomso u yange i saan un iyol u wasen ior yô. Yange zende wase ior sha ajiir kpishi. Kwagh la na yô, saan un iyol kpishi. U soo u fan er yange hii ve saan un iyol yôô?—

Timoteu vese hen gar ugen, u i yilan ér Lisetera yô. Shighe u lu cuku la, mama na Unise, man mama u mama na Loisi, yange ve hii u tesen un kwagh u Yehova. Timoteu ngur vesen yô, a soo u wasen ior mbagenev ér ve fa Yehova.

Shighe u Timoteu lu wanye la, Paulu kaa a na ér a za vea na vea za pase ior kwagh sha ajiir agen. Timoteu lumun u zan. Yange doo un u za wasen ior.

Timoteu yem zende vea Paulu hen gar  u Tesalonika, ken tar u Masedonia. Ve zende angahar ve yem ica ve za nyôr tso ve, ve mase za nyôron hen ijiir la ye. Mba za nyer yô, ve tese ior kpishi kwagh u Yehova. Kpa ior mbagenev nyoon ishima a ve, shi ve nôngo u vihin ve iyol kpaa. Nahan Paulu man Timoteu mough yem za pase kwagh sha ajiir agen.

Iwer ngi karen yô, Paulu hide tindi Timoteu ken Tesalonika, ér a za nenge er Mbakristu mbara ve lu yô. Lu u Timoteu una taver ishima kpishi ve una hide a za ken gar u cier iyol la ye! Kpa Timoteu hide za ken gar la, sha ci u ishima lu zan un iyol sha kwagh u Mbakristu mba hen gar la. Za hidi yô, va ôr Paulu kwagh u doon. Mbakristu mba ken Tesalonika mbara lu dedoo!

Timoteu er tom vea Paulu anyom kpishi. Paulu nger ken washika na ugen la ér, ka Timoteu je a hembe doon u una za wase atôônanongo ye. Timoteu yange soo Yehova kua ior cii.

U soo ior shi ka u ape wasen ve wer ve fa Yehova kpa?— U er nahan yô, a saan we iyol kpishi, vough er Timoteu nahan!