U hen wer ka ican u eren kwagh u dedoo?— Ior kpishi hen ér ka ican. Bibilo kaa ér yange lu wanyenomso ugen u i yilan un ér Yoshia la ican kpishi u eren kwagh u dedoo. Kpa yange ya ijende a ior mba dedoo mba ve wase un yô. De se seer fan kwagh u Yoshia kua azende a na la.

Baba u Yoshia yange lu Amon, tor u Yuda. Amon yange wa ifer kpishi shi civir akombo kpaa. Baba u Yoshia kpen yô, Yoshia hingir tor sha tar u Yuda. Man lu anyom anigheni tseegh hen shighe la! U hen wer Yoshia yange wa ifer er baba na nahanaa?— Ei, yange wa ifer ga!

Er Yoshia lu wanye u cuku nahan kpa, yange soo ér una ungwan imo i Yehova. Nahan a ya ijende a ior mba Yehova doo ve ishima la tseegh. Ior mban wase Yoshia u eren kwagh u dedoo. Ka unô yange Yoshia ya ijende a ve?

Ijende i Yoshia igen lu Sefania. Sefania lu profeti, u yange ta ior mba ken tar u  Yuda icin ér ve de u civir akombo, gayô kwaghbo una tser ve yô. Yoshia ungwa kwagh u Sefania ôr la, nahan civir Yehova, lu akombo ga.

Yoshia yange ya ijende a Yeremia kpaa. Yoshia man Yeremia cii yange ve nôngo u lun anyom kwaghmôm, shi ve lu hen ijiir i môm shighe u ve lu mbayev la. Yange ve ya ijende taveraa je, Yoshia va kpe kpa Yeremia dugh icam sha ku na, a ôr er Yoshia a undu un i vihi un kpishi yô. Yeremia man Yoshia yange ve wase ayol a ve u eren kwagh u dedoo shi ungwan imo i Yehova.

Ka nyi u fatyô u henen sha ieren i Yoshia nee?— Shighe u Yoshia lu wanye u cuku la je kpa, yange soo u eren kwagh u dedoo. Yange fa ér gba u una ya ijende a ior mba Yehova a doo ve ishima yô. Nahan we kpa ya ijende a ior mba Yehova a doo ve ishima, mba vea wase ú u eren kwagh u dedoo yô!