ITYOUGH 08
U Fatyô u Lun Ijende i Yehova
Yehova soo ér we u seer fan un. Sha ci u nyi? Sha ci u a nenge ér aluer u ngu fan aeren a na man igbenda i un eren kwagh la kua awashima na seer a seer yô, a hemba doon we u lun ijende na cii. Kpa u fatyô u lun ijende i Aôndo mimi? (Ôr Pasalmi 25:14.) U er nan ve u ya ijende a naa? Bibilo na mlumun sha mbampin mbara, shi i̱ pase er i hii ve i doo u Yehova una hemba lun Ijende you i sôngo sôngo yô.
1. Ka nyi Yehova a kaa ér we u ere?
“Kporom nen hen Aôndo, nahan un kpa una kporom hen a ven.” (Yakobu 4:8) Inja na yô, Yehova ngu kaan a we ér we u ya ijende a na. Alaghga a taver mbagenev u nan jighjigh ér or a fatyô u lun ijende i Aôndo, sha ci u mba nengen a na ga. Nahan kpa, Yehova pase hanma kwagh sha kwagh u aeren a na ken Bibilo, u i gbe u se fa ve se kporom ikyua a na yô. Nahan ka sea ôron Bibilo yô, kwagh na a doon se i seer a seer, shin er mayange je se lu a nenge a na ga nahan kpaa.
2. Doo u Yehova una hemba lun Ijende you i sôngo sôngo sha ci u nyi?
Yehova soo u hemba er ior ve soo u la ica je. A soo ér i saan we iyol, shi hanma shighe u kwagh a ze u iyol yô, we u lam a na. U fatyô u ‘geman ishimanyian you cii, haan sha a na, sha ci u kwagh wou gba un ishima.’ (1 Peteru 5:7) Yehova ka a kegh iyol u wasen azende a na shi surun ve ishima shi ungwan mbamsen vev hanma shighe cii.—Ôr Pasalmi 94:18, 19.
3. Ka nyi Yehova a soo ér se eren ve se lu azende a na?
Ior cii doo Yehova ishima, ‘kpa ka mbaperapera ve lu azende a Na’ ye. (Anzaakaa 3:32, NWT) Yehova soo ér azende a na a eren akaa a un lumun a mi yô, kpa ve gema ve palegh akaa a un vende la. Mbagenev nenge ér vea fatyô u eren akaa a Yehova a lumun a mi la cica cii ga, shi a a vende la kpa, vea fatyô u palegh a cii ga. Nahan kpa, Yehova zungwen se mhôônom. Ka a ngohol hanma or u nan soo Un sha mimi shi nan nôngon sha afatyô u nan cii ér nana er kwagh u doon Un yô.—Pasalmi 147:11; Aerenakaa 10:34, 35.
HEN KWAGH I ZA SHIMI
Seer fan kwagh u u er ve u lu ijende i Yehova yô, shi nenge er i hii ve i doo u Yehova una hemba lun Ijende you i sôngo sôngo yô.
4. Aberaham yange lu ijende i Yehova
Kwagh u Aberaham (u iti na igen i lu Aberam) u Bibilo i ôr la, wase se u fan inja i u lun ijende i Aôndo la. Ôr kwagh u Aberaham ken Genese 12:1-4. Maa lam nen sha mbampin mban:
-
Yehova yange ôr a Aberaham ér a̱ er nyi?
-
Yehova yange tôndo zwa a na ér nyi?
-
Yehova yange tese Aberaham akaa a a soo ér a er la nahan, Aberaham er nena?
5. Kwagh u Yehova a soo ér azende a na a̱ er yô
Se cii, akaa nga a ka se soo ser azende a ase a eren yô.
-
Ka nyi akaa nahan u soo wer azende a ou a eren sha ci wouwe?
Ôr 1 Yohane 5:3, maa lam nen sha mpin ne:
-
Ka nyi Yehova a soo ér azende a na a̱ erene?
Cii ve se̱ lu mba ungwan imo i Yehova yô, saa se sôr inja shin se de aeren a ase a doon ga la. Ôr Yesaia 48:17, 18, maa lam nen sha mpin ne:
-
Yehova soo ér azende a na a̱ sôr inja sha ci u nyi?
6. Kwagh u Yehova a eren sha ci u azende a na yô
Yehova wasen azende a na u nôngon a mbamzeyol vev. Nenge VIDIO i i lu heen ne, maa lam nen sha mpin ne.
-
Yehova yange wase kwase u ken vidio la nena ve ishima de u nan un ibo, shi nenge ér un gba kwagha?
Ôr Yesaia 41:10, 13, maa lam nen sha mbampin mban:
-
Ka nyi Yehova a tôndo zwa u eren sha ci u hanma ijende naa?
-
U nenge wer Yehova una lu Ijende i dedoo? Sha ci u nyi?
7. Saa u lamen a Yehova shi u ungwan imo na ve u lu ijende na ye
Ior ka vea ya ijende shi vea lamen ayol a ve yô, ve hemba lun kôôsôô. Ôr Pasalmi 86:6, 11, maa lam nen sha mbampin mban:
-
Se lam a Yehova nena?
-
Yehova lamen a vese nena?
IOR MBAGENEV KA VE KAA ÉR: “Or a fatyô u lun ijende i Aôndo ga.”
-
Ka ivur Bibilo i han nahan u ôr sha u tesen wer or a fatyô u lun ijende i Yehova?
KA NYI U HENE?
Yehova soo u lun Ijende you, shi una wase u u ya ijende a na.
Mbampin mba umbur kwagh u i hen yô
-
Yehova wasen azende a na nena?
-
Yehova ôr a azende a na ér a sôr inja sha ci u nyi?
-
U nenge wer Yehova ka a soo ér azende a na a er kwagh i hemba agee a ve ken inyaa? U nenge nahan sha ci u nyi, shin u nenge nahan ga sha ci u nyi?
SEER HENEN KWAGH
Aluer u ya ijende a Aôndo yô, kwagh la una wase u nena?
“Yehova Ka Aôndo U I Doo u Se Fa Un Yô” (Iyoukura, Febewari 15, 2003)
Nenge kwagh u u er ve u ya ijende a Aôndo yô.
Fa er i hii ve kwase ugen a nenge ér un ya ijende a Yehova nahan hemba saan un iyol yô.
Ungwa er agumaior a pase mnenge ve sha kwagh u Yehova yô.