ITYOUGH 09
Kporom hen Aôndo sha u Eren Msen hen a Na
Ashighe agen ka u soo wer ma i tese u kwagh u u er yôô? U ngu a mbampin mba u soo u zuan a mlumun sha mi yôô? U soo wer i sur u ishima shin i ôr u kwagh u ishima ia gba u shimi yôô? U soo wer u lu kôôsôô vea Yehova? Msen una wase u sha akaa la cii. Kpa u er msen nena ve a lu sha inja? Aôndo ongo hanma msen ciilii? Ka nyi i gbe u u er ve Aôndo una ungwa mbamsen ouwe? De se nenge.
1. Gba u se eren msen hen ana, man ka atôakaa a nyi nahan se fatyô u eren msen sha mini?
Yesu tese se ér ka hen Ter wase u sha la tseegh i gbe u se eren msen ye. Yesu iyol na yange eren msen hen Yehova. A tese ér: “Gba keng u ne eren msen sha gbenda ne nahan: ‘Ter wase u sha . . . ’ ” (Mateu 6:9) Ka sea eren msen hen Yehova yô, se hemba lun vea na kangenaa.
Se fatyô u eren msen sha hanma zayol wase cii. Nahan kpa, cii man Aôndo a ungwa msen wase yô, saa kwagh u se er msen sha mi la a lu u sha ishima na. “Nyityôkwagh i se sôn Aôndo man i lu i sha ishima na cii yô, ngu a ungwa se.” (1 Yohane 5:14) Yesu tese ikyav sha akaa a i doo u se eren msen sha mi yô. (Ôr Mateu 6:9-13.) Se fatyô u eren msen sha mbamzeyol asev, shi gba u se umbur u sughun Aôndo sha akaa a a er sha ci wase la, shi se sônon un ser a wase mbagenev.
2. Gba u se eren msen nena?
Bibilo kaa a vese ér se ‘pase asema a ase sha ishigh ki Aôndo.’ (Pasalmi 62:8) Gba u se eren msen sha gbashima man sha mimi. Se fatyô u eren msen duen sha, shin eren ving ving, shi eren hanma shighe man hanma ijiir cii. Yehova soo ér sea eren msen yô, saa se gure inya shin se tema inya shin se tile sha ga. Kwagh u vesen yô, a soo ér se eren msen han a Na sha icivir.
3. Aôndo ongo mbamsen asev nena?
Aôndo ongo mbamsen asev sha igbenda kposo kposo. Yehova na se Bibilo, nahan ka ker se zuan a mbamlumun sha mbampin asev ye. Aluer or ngu ôron Bibilo yô, nana lu “orlanenkwagh” je kpa, Bibilo ia ‘na nana hingir orfankwagh.’ (Pasalmi 19:7; ôr Yakobu 1:5.) Yehova una fatyô u nan se bem shighe u se nyer ken zayol yô. Shi una na mbacivir un vea wase se shighe u i gbe u a wase se yô.
HEN KWAGH I ZA SHIMI
Nenge er u fatyô u eren mbamsen mba sha ishima i Aôndo sha u ôron un er i lu u ken ishima la jighilii yô, shi nenge er msen una wase u yô.
4. Akaa a Aôndo a soo ér se eren ve una ungwa mbamsen asev yô
Ka nyi ka i na ve Aôndo a ungwa mbamsen asev shin a ungwa ga? Nenge VIDIO i i lu heen ne.
Yehova soo ér se eren msen hen a na. Ôr Pasalmi 65:2, maa lam nen sha mbampin mban:
-
U nenge wer Aôndo “u [A] ongo msen” la soo ér we u eren msen hen a naa? U nenge nahan sha ci u nyi, shin u nenge nahan ga sha ci u nyi?
Aluer se soo ser Aôndo a ungwan mbamsen asev yô, saa se nôngo sha afatyô wase cii se kuran atindi a na. Ôr Mika 3:4 kua 1 Peteru 3:12, maa lam nen sha mpin ne:
-
Ka nyi i gbe keng u se eren ve Yehova una ungwa mbamsen aseva?
Ka a nôngon ityav yô, ior mba ken hanma vegher cii ve eren msen ér ma ve hemba. U hen wer mimi je Aôndo una ungwa mbamsen mbara?
5. Gba u se eren msen sha akaa a a lu se ken ishima la jighilii
I tese mbagenev ér, vea eren msen yô, ve kimbir msen u i nger shin takeda yô, shin ve eren msen ken zwa u ve fe ga yô. Kpa kape Aôndo a soo ér se eren msen hen a na laa? Ôr Mateu 6:7, maa lam nen sha mpin ne:
-
U er nan ve u palegh u eren msen ‘kimbir kwagh môm gbeme’?
Hanma iyange yô, u fatyô u henen sha ma kwagh u doon ugen kposo u a er u ken uma wou yô. Nahan sugh Yehova sha kwagh shon. Er nahan hanma iyange i̱ kuma kasua jimin, tsô u nenge er u er msen sha akaa kposo kposo ataankarahar kpa ú kimbir msen ga yô.
Ter u fan kwagh ka nan soo ér wan u nan a̱ pase nan er i lu nan ken ishima la jighilii. Yehova kpa soo ér se eren msen hen a na sha akaa a a lu se ken ishima la jighilii
6. Msen ka iyua i doon tsung i Aôndo a ne se yô
Ka sha nyi gbenda nahan msen una fatyô u nan se agee sha ashighe a doon man a doon ga? Nenge VIDIO i i lu heen ne.
Bibilo kaa ér aluer se mba eren msen yô, kwagh la una wase se u zuan a bem u ken ishima. Ôr Mbafilipi 4:6, 7, maa lam nen sha mbampin mban:
-
Er msen a been a mbamzeyol asev hanma shighe ga nahan kpa, msen wasen se nena?
-
Ka akaa a nyi nahan u soo u eren msen sha mini?
U fa kpa?
Ishember i “amen” la inja na yô ér, “i̱ lu nahan” shin “kpee je.” I ndera eren msen kuren sha “amen” ka kwagh u nyian a mi ga, hii sha ayange a i ngeren Bibilo la je.—1 Kroniku 16:36.
7. Luun a shighe u eren msen
Alaghga ashighe agen se tume ityough u eren akaa a ase maa a hungur se u eren msen. Msen yange lu Yesu kwagh u vesen nan je? Ôr Mateu 14:23 kua Marku 1:35, maa lam nen sha mbampin mban:
-
Ka nyi Yesu yange a er sha er una zua a shighe u eren msene?
-
Ka hanma shighe nahan u fatyô u keren ian eren msene?
IOR MBAGENEV KA VE KAA ÉR: “Msen ngu a iwasen keng ga; ngu a na ishima i pever we tseegh tsô.”
-
We u kaa wer nyi?
KA NYI U HENE?
Ka sea eren msen hen Yehova Aôndo sha mimi yô, se hemba kporom ikyua a na, shi se zua a bem kua agee a i gbe u se lu a mi ve se er kwagh u doon Un la.
Mbampin mba umbur kwagh u i hen yô
-
Gba u se eren msen hen ana?
-
Gba u se eren msen nena?
-
Ka sha igbenda i nyi nahan msen a wasen se?
SEER HENEN KWAGH
Zua a mbamlumun sha mbampin mba ior kpishi ve pinen sha kwagh u msen yô.
“Akaa Ataankarahar a i Gbe u U Fa sha Kwagh u Msen Yô” (Iyoukura, Oktoba 1, 2010)
Fa atôakyaa a vesen a a ne ve i gbe u se eren msen yô, man er u er ve u hemba fan u eren msen yô.
Nenge Or u Bibilo i tese ér gba u se eren msen hen a nan yô.
Ken vidio i atsam a ase ne, ver ishima nenge aluer kwagh gba sha kwagh u ijiir shin shighe u se er msen yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
