ITYOUGH 10
Mbamkombo mba Mbashiada mba Yehova vea Wase U Nena?
I lu nahan i lôhô u mkombo u Mbashiada mba Yehova vee? Aluer u ngu a vande zan mkombo ve ga yô, adooga a cier we iyol u zan. Alaghga u pine wer: ‘Ka nyi ka i er ken mbamkombo mbara? Er nan ve lu hange hange yumu? Gba keng u me zaan ve sha ci u nyi?’ Ken ityough kin, u fa er aluer u ngu nyôron mkombo vea mbagenev ve, u hemba kporom hen Aôndo, shi we iyol you kpa a wase u yô.
1. Mbashiada mba Yehova mba ze mbamkombo sha ci u nyi?
Nenge er orngeren Bibilo ugen a pase er i hii ve i gbe hange hange u se kohol imôngo vea mbagenev yô, a kaa ér: “Me wuese [Yehova] ken mbamkohol mba iorov.” (Pasalmi 26:12) Nahan, kape Mbashiada mba Yehova kpa ka vea za mkombo ve, i saan ve iyol je la. Hanma kasua yô, ka ve kohol kpuaa kpuaa sha ajiir kposo kposo sha tar cii, ve wuese Aôndo, ve wa atsam, shi ve er msen. Shi hanma inyom yô, ka ve er mbamkohol mba vesen, ve civir Aôndo.
2. Ka nyi nahan u za mbamkombo asev ve u hene?
Ka sea za mbamkombo asev yô, se hemba veren ishima sha Mkaanem ma Aôndo, sha u ôron ma ‘wanger wanger, shi pasen inja i ma kpaa.’ (Ôr Nehemia 8:8.) Nahan aluer u ngu zan mbamkombo hanma shighe yô, u lu henen kwagh u Yehova kua aeren a na a doon tsung la. U nguren fan er u doo un ishima yô, u lu hemban soon un cii. Shi u nenge er una na a saan we iyol yô.—Yesaia 48:17, 18.
3. Aluer u ngu zan ikyua a ior lamen a ve shighe u se ze mbamkombo asev yô, vea wase u nena?
Yehova kaa a vese ér se ‘waan hanma wase ikyo sha er ishima ia taver se u tesen dooshima shi eren akaa a dedoo yô; se de bunden mbamkombo asev ga.’ (Mbaheberu 10:24, 25) Aluer u ngu zan mbamkombo asev yô, u lu kohol imôngo vea ior mba ve doo ayol a ve sha mimi, shi ve soo u seer henen kwagh u Aôndo er we nahan yô. U ungwa er ka ve lam sha akaa a ken Bibilo a taver hanma or ishima yô. (Ôr Mbaroma 1:11, 12.) Shi u fa mbagenev mbalun kwav man noov kua kasev mba ve lu nôngon a mbamzeyol, kpa i saan ve iyol sha mimi yô. Se ter atôakyaa a a ne ve Yehova a soo ér se zaan mbamkombo hanma shighe la heen kpuaa di tsô!
HEN KWAGH I ZA SHIMI
Fa er Mbashiada mba Yehova ve eren mbamkombo vev yô, man er i hii ve i doo u u zaan mbamkombo mba shon yô.
4. Mbamkombo mba Mbashiada mba Yehova
Mbakristu mba sha ayange a mbaapostoli la yange ve kohol imôngo hanma shighe, ve civir Yehova. (Mbaroma 16:3-5) Ôr Mbakolose 3:16, maa lam nen sha mpin ne:
-
Mbakristu mba tsuaa mbara yange ve civir Yehova nena?
Nyian ne, Mbashiada kpa mba kohol sha ajiir a ve a civir Aôndo la hanma shighe cii. Wea soo u fan er ve eren mbamkombo vev yô, nenge VIDIO i i lu heen ne. Ne been yô, nenge nen foto u a lu heen, a tese er tiônnongo a nyer mkombo ne, maa lam nen sha mbampin mba ve dondo ne.
-
U nenge wer akaa a i eren hen Iyou i Tartor la zua sha kwagh u u ôr ken Mbakolose 3:16 la nena?
-
Ken vidio shin foto u u nenge la, ka nyi igen u nenge a mi i doon we sha kwagh u mbamkombo?
Ôr 2 Mbakorinte 9:7, maa lam nen sha mpin ne:
-
Er nan ve Mbashiada mba Yehova ve kaan a ior ér ve er iyua ken mbamkombo vev ga?
Nenge akaa a i gbe u a hen ken mkombo u a lu van la, vea or u nan henen Bibilo a we la.
-
Ka nyi nahan ken akaa shon, u nenge wer i hemba doon shin ia hemba wasen we?
U fa kpa?
Wea soo u fan ajiir man ashighe a se nyôron mbamkombo asev sha tar cii la yô, za sha jw.org/tiv.
-
Ka se ungwa akaaôron ken mbamkombo asev shi i tese igbenda i pasen kwagh kua uvidio se nenge. Mbamkombo asev cii, ka i hii sha icam man msen, shi i kure sha icam man msen
-
Ka i na ior ian sha aaven agen ken mbamkombo mban ér ve kpa ve lam
-
Hanma or cii nana fatyô u van mbamkombo asev—wea lu kwav shin wanye shin organden kpaa, shi u fatyô u van vea tsombor wou cii
-
Mbamkombo asev ka kwagh u sha inyar ga. Mbashiada mba Yehova mba kaan a ior ér ve kimbi inyaregh cii vea nyôr mkombo ga, shi mba zenden a gbande ér i er iyua kpaa ga
5. Saa u nôngo kwagh kpoghuloo ve u zaan mbamkombo ye
Ikyav i tesen yô, nenge kwagh u tsombor u Yesu eren ne. Hanma inyom yô, yange ve mough hen Nasareti ve za ken Yerusalem angahar. Ve zende je i kuma er ukilomita 100 nahan, sha gbenda u karen sha iwo. Ôr Luka 2:39-42, maa lam nen sha mbampin mban:
-
U nenge wer yange ve nôngo kwagh kpoghuloo sha u zan zende u ken Yerusalem laa?
-
Er nan ve i gbe u alaghga saa u nôngo kwagh kpoghuloo ve u zaan mbamkombo?
-
U nenge wer doo u u zaan mbamkombo sha ashighe a i taver je kpaa? Sha ci u nyi?
Bibilo kaa ér u kohol imôngo vea mbagenev civir Yehova la ka kwagh u hange hange. Ôr Mbaheberu 10:24, 25, maa lam nen sha mpin ne:
-
Gba u se zaan mbamkombo hanma shighe sha ci u nyi?
IOR MBAGENEV KA VE KAA ÉR: “Saa u kohol imôngo vea mbagenev keng ga. Aluer u ngu henen Bibilo hen ya wou tseegh kpa kuma.”
-
Ka an ken Bibilo yange nan eren kwagh u a wase se u kaven kwagh u Yehova a soo laa?
KA NYI U HENE?
Aluer u ngu zan mkombo yô, u seer fan kwagh u Yehova, shi u hemba yan ijende vea na kangenaa, shi u za hemen u kohol a mbagenev imôngo, civir un.
Mbampin mba umbur kwagh u i hen yô
-
Yehova kaa ér se kohol imôngo sha ci u nyi?
-
Ka nyi nahan u za mbamkombo mba Mbashiada mba Yehova ve u hene?
-
U nenge wer mbamkombo mbara vea fatyô u wasen we sha gbenda ugen kpaa?
SEER HENEN KWAGH
Aluer ka cier we iyol u zan mkombo di ye? Nenge er yange cier orgen iyol nahan kpa, va hingir u soon mbamkombo yô.
Nenge er yange mbamkombo doo gumor ugen yô, kua kwagh u er ve za hemen u zan mbamkombo la kpaa.
Fa er mbagenev ve nengen kwagh u zan mbamkombo la yô.
“Er Nan Ve Se Zan Mbamkombo ken Iyou i Tartor?” (Ngeren u sha Intanet)
Nenge er orgen u ngise lu ken annongo u mbawan tswam yange za mkombo u Mbashiada mba Yehova, maa de uma la yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
