ITYOUGH 13
Er Kwaghaôndo u Aiegh a Lu Tsumen a Ior sha Kwagh u Aôndo Yô
Aôndo ka dooshima. Nahan kpa, ukwaghaôndo mba ve senge ér mba tesen kwagh u Aôndo shi eren akaa ken iti na la, ve er afer a vihin kpishi. Er nan kwagh a lu nahana? Ka sha ci u ukwaghaôndo mbara ka mbaaiev. Aeren a ve man atesen a ve la ka a na ior ve lumun a mbaaie mba i we Aôndo iyol la. Mba tsumen a ior sha kwagh u Aôndo nena? Kwagh la ka a na i lu Aôndo nena? Man una va er nyi sha kwagh shono?
1. Kwaghaôndo u aiegh ngu tsumen a ior sha atesen a na nena?
Kwaghaôndo u aiegh “venda mimi u sha kwagh u Aôndo, ve gema ve lumun aie.” (Mbaroma 1:25) Ikyav i tesen yô, ukwaghaôndo kpishi tese ior vev iti i Aôndo ga. Nahan kpa, Bibilo kaa ér gba u a yilan Aôndo sha iti na. (Mbaroma 10:13, 14) Kwagh ka una er u vihin yô, mbahemenev mba kwaghaôndo mbagen ve kaa ér ka Aôndo a ne ve kwagh shon a er ye. Kpa ka mimi ga. Ka Aôndo a ne akaabo a eren ior ga. (Ôr Yakobu 1:13.) Kpa kwagh er vihi yô, mbaaie mbara na ior kera soo kwagh u Aôndo ga.
2. Kwaghaôndo u aiegh ngu tsumen a ior sha aeren a na nena?
Kwaghaôndo u aiegh eren a ior dedoo er Yehova nahan ga. Bibilo ôr kwagh u kwaghaôndo u aiegh ér “asorabo a na ta tihi je tav ar sha aôndo.” (Mpase 18:5) Ken anyom uderi imôngo a a kar ne, ukwaghaôndo wa ave sha akaa a patii shi sue ityav shi ve lumun shin ve na i wua ior ngee je gande u ôron. Mbahemenev mba kwaghaôndo mbagenev soo u lun mbainyarev, nahan mba we ior vev kpandegh. Kwagh ne tese ér ve fa Aôndo cuku ga, nahan mba sha ian i ôron ior kwagh na kpaa ga.—Ôr 1 Yohane 4:8.
3. Aôndo nengen kwaghaôndo u aiegh nena?
Aluer akaa a kwaghaôndo u aiegh a eren la vihi u yô, u hen wer Yehova yô a lu un ken ishima nena? Uumace doo Aôndo ishima, nahan ishima ka i vihi un a mbahemenev mba kwaghaôndo mba ve tesen ior kwagh na shami ga, shi ve nzughul a mbadondon ve la. A tôndo zwa ér una va tim kwaghaôndo u aiegh shi “a kera nenge a na mayange ga.” (Mpase 18:21) Ica a gba ga tsô Aôndo una tim kwaghaôndo u aiegh cii kera.—Mpase 18:8.
HEN KWAGH I ZA SHIMI
Seer fan er Aôndo a nengen kwaghaôndo u aiegh la. Seer fan akaa a kwaghaôndo u aiegh a er yô, shi hen fa er i hii ve i doo u u de wer akaa ne a yange u u fan Yehova ga yô.
4. Ka ukwaghaôndo cii Aôndo a lumun a mi ga
Ior kpishi na jighjigh ér ukwaghaôndo cii ka igbenda kposo kposo i zan a ior hen Aôndo. Kpa ka mimi? Ôr Mateu 7:13, 14, maa lam nen sha mpin ne:
-
Ka nyi Bibilo i ôr sha kwagh u gbenda u zan ken uma laa?
Nenge VIDIO i i lu heen ne, maa lam nen sha mpin u a dondo ne.
-
Bibilo kaa ér ukwaghaôndo mba kpishi mba Aôndo a lumun a ve yôô?
5. Kwaghaôndo u aiegh eren a ior sha dooshima er Aôndo nahan ga
Ukwaghaôndo tsume a ior sha igbenda kpishi. Gbenda môm u hemban vihin u a er kwagh ne yô, ka u suen ior ér ve nôngo ityav. Wea soo u nengen ikyav i môm yô, Nenge VIDIO i i lu heen ne. Maa lam nen sha mbampin mba ve dondo ne.
-
Ka nyi mbaadua kpishi yange ve er shighe u i lu nôngon Ityav mbi Tar Cii Mbi sha Uhar laa?
-
U nenge akaa a yange ve er la nena?
Ôr Yohane 13:34, 35 man 17:16. Maa lam nen sha mbampin mban:
-
Yehova ka una nenge ukwaghaôndo vea suen ior ér ve nôngo ityav nahan i lu un ken ishima nena?
-
Ka kwaghaôndo u aiegh a lu eren aferakaa kpishi ye. Ka sha nyi igbenda nahan u nenge ukwaghaôndo mban ve eren kwagh a ior sha dooshima er Aôndo nahan ga?
Kwaghaôndo u aiegh eren a ior sha dooshima er Aôndo nahan ga
6. Aôndo soo ér una wase ior ve due ken kwaghaôndo u aiegh kera
Ôr Mpase 18:4, a maa lam nen sha mpin ne:
-
Er u fe wer Aôndo soo u yiman ior mba kwaghaôndo u aiegh a tsum a ve la yô, ka u nena?
7. Za hemen u henen kwagh u Aôndo u mimi la
Doo u u de wer akaabo a kwaghaôndo u aiegh a ôron shi a eren la, a yange u u civir Aôndo? Tôô ase wer, wanye venda u ungwan imo i ter u nan, maa nan due hen ya kera, nan ngu za eren dang. Ter u wan la lumun a ieren na la ga. Aluer i na ter u wan la ibo sha akaa a dang a wan u nan a lu za eren la nahan, a lu shami?
-
Aluer se na Yehova ibo shi se de u henen kwagh na sha ci u akaa a kwaghaôndo u aiegh a lu eren la nahan, a lu shami?
IOR MBAGENEV KA VE KAA ÉR: “De pasen mo kwagh u Aôndo ga, ka kwaghaôndo a ne ve mbamzeyol ve ngee kpishi nahan ye.”
-
We kpa kape ka i lu u laa?
-
Doo u se de ser akaa a kwaghaôndo u aiegh a eren la a yange se u civir Yehova ga sha ci u nyi?
KA NYI U HENE?
Kwaghaôndo u aiegh ngu tsumen a ior sha atesen a na kua akaa a vihin a a eren la. Aôndo una va tim kwaghaôndo u aiegh kera.
Mbampin mba umbur kwagh u i hen yô
-
U nenge atesen a kwaghaôndo u aiegh kua aeren a na nena?
-
Yehova nengen kwaghaôndo u aiegh nena?
-
Ka nyi Aôndo una va er a kwaghaôndo u aiegh?
SEER HENEN KWAGH
Nenge igbenda ihiar i ukwaghaôndo kpishi ve lu vihin Aôndo ishima yô.
Er nan ve Yehova a soo ér se kohol imôngo se civir unu?
“Saa Or a Lu ken Ma Nongo u Kwaghaôndo?” (Ngeren u sha Intanet)
Ishima yange i za fada ugen iyol sha kwagh u adua na. Kpa kwagh la yange un u henen mimi u sha kwagh u Aôndo ga.
Ukwaghaôndo wa Aôndo aie iyol ica gba hegen, man kwagh ne na ior nenge ér Aôndo wa tswam shi kwagh wase gba un ishima ga. Zua a iwanger sha mbaaie mban utar.
“Mbaaie mba Ka Ve Na i Lu Inja Er Ior Doo Aôndo Ishima Ga La” (Iyoukura, Novemba 1, 2013)
a Wea soo u fan er i hii ve se fe ser kwase u i yer un ér Zegebabilon la tile sha ityough ki kwaghaôndo u aiegh yô, nenge Ngeren u Seer Tan Iwanger u sha 1 la.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
