ITYOUGH 16
Ka Nyi Yesu Yange Er Shighe u Lu Shin Tar Laa?
Ior kpishi ka ve nenge ér Yesu ka anikyundan u forototo gayô profeti u fan kwagh shin ka or u nan lu nôngon ku yô. Kpa se fatyô u seer henen kwagh na sha u tôvon sha kwagh u uma na shighe u lu shin tar laa? Ken ityough kin se lu timen sha akaa a vesen agen a Yesu yange er, man er akaa shon aa wase u la.
1. Ka tom u nyi yange u hemba gban Yesu kwagha?
Tom u yange u hemba gban Yesu kwagh yô, lu u pasen “loho u dedoo u Tartor u Aôndo.” (Ôr Luka 4:43.) Yange pase loho u dedoo ér Aôndo una ver tartor shin gomoti, u una bee a mbamzeyol mba uumace cii kera yô. a Yesu yange pase ior loho u dedoo ne kpoghuloo, anyom atar man tiôn.—Mateu 9:35.
2. Yesu yange eren uivande sha ci u nyi?
Bibilo pase “ityom i ageegh man akaa a kpilighyol kua uivande mba Aôndo lu eren sha ikyev [i Yesu]” yô. (Aerenakaa 2:22) Aôndo yange na Yesu tahav yange ahumbe, shi koso ior udubu imôngo shi bee ior angev shi nder ior shin ku je kpaa. (Mateu 8:23-27; 14:15-21; Marku 6:56; Luka 7:11-17) Uivande mba Yesu eren la yange ve tese wang ér ka Aôndo a tindi un ye. Shi ve tese ér Yehova ngu a tahav mbu been a mbamzeyol asev cii.
3. Ka nyi se fatyô u henen ken gbenda u Yesu eren kwagh ken uma na laa?
Yesu yange ungwan imo i Yehova hanma shighe cii. (Ôr Yohane 8:29.) Er yange i lu hendan a Yesu nahan cii kpa, a ungwa imo i Ter na zan zan a kar kpen. Yange tese wang ér uumace vea fatyô u civir Aôndo aluer ve tagher a mbamzeyol je kpaa. Sha nahan yô, Yesu ver se “ikyav sha u [se] zaan sha angahar a na vough vough” yô.—1 Peteru 2:21.
HEN KWAGH I ZA SHIMI
Nenge er Yesu pasen ior loho u dedoo shi eren uivande yô.
4. Yesu yange pasen ior loho u dedoo
Yesu yange a zende angahar ukilomita uderi imôngo sha igbenda i lun ihyundu ihyundu, a pasen ior loho u dedoo. Ôr Luka 8:1, maa lam nen sha mbampin mban:
-
Ka ior mba yange ve kohol imôngo u ungwan ityesen i Yesu tseegh yange a pase ve kwagh yee?
-
Ka nyi Yesu yange a er sha er una zua a ior mba una pase ve kwagha?
Aôndo yange tsenga ôron ér Mesiya una pase loho u dedoo. Ôr Yesaia 61:1, 2, maa lam nen sha mbampin mban:
-
Yesu yange kure kwaghôron u profeti ne nena?
-
U nenge wer nyian kpa gba u ior vea ungwa loho u dedoo nee?
5. Yesu yange tese akaa a aa wase ior yô
Yesu yange pasen loho u dedoo u Tartor u Aôndo tseegh ga, kpa a tese ior akaa a aa lu ve a inja yô. Nenge akav agen kpuaa ken Ityesen na i sha Uwo i i fe i wuee la. Ôr Mateu 6:14, 34 man 7:12, maa lam nen sha mbampin mban:
-
Ka kwaghwan u injaa u nyi Yesu yange wa se ken avur nee?
-
U nenge wer akaawan la aa fatyô u wasen ior nyiana?
6. Yesu yange er uivande
Yehova yange na Yesu tahav er uivande kpishi. Wea soo u nengen ikyav i môm yô, ôr Marku 5:25-34 gayô nenge VIDIO i i lu heen ne. Maa lam nen sha mbampin mba ve dondo ne.
-
Kwase u ken vidio u lu uange la, yange na jighjigh ér nyi?
-
Ka nyi i doo u sha kwagh u ivande nee?
Ôr Yohane 5:36, maa lam nen sha mpin ne:
-
Uivande mba Yesu mbara yange ve ‘er shiada’ shin ve tese nyi sha kwagh naa?
U fa kpa?
Akaa a se fe sha kwagh u Yesu la kpishi, i ôr a ken ityakeda i Bibilo i inyiin i i yer ér Ityakeda i Ivangeli la. Ka Mateu man Marku man Luka kua Yohane je la. Hanma or u nan nger takeda u Ivangeli yô, nan ôr akaa agen sha kwagh u Yesu a i ter ken ityakeda i Ivangeli igen la ga yô. Ka sea ôron ityakeda ne cii yô, akaa agen a yange mbagen pase vighe vighe sha kwagh u Yesu, mbagen di pase vighe vighe ga la, a wase se u kaven kwagh u uma na vindi vindi.
-
MATEU
yange lu or u hiihii u ngeren Ivangeli. Takeda na la ôr se kwagh u atesen a Yesu kpishi, hemban je yô, akaa a Yesu tesen ior sha kwagh u Tartor u Aôndo la.
-
MARKU
nger Ivangeli i i hembe lihen ga la. Takeda na ôr akaa kpishi a sagher iyol a yange er yô.
-
LUKA
ôr se er msen lu Yesu kwagh u vesen shi eren kwagh a kasev kundu kundu yô.
-
YOHANE
ôr se akaa kpishi a Yesu yange lam sha mi vea azende a na a kôôsôô kua ior mbagen yô. Kwagh la wase se u fan injaor i Yesu lu yô.
IOR MBAGENEV KA VE KAA ÉR: “Yesu lu di or u dedoo tsô, lu Mesiya ga.”
-
We u nenge nena?
KA NYI U HENE?
Yesu yange pase kwagh u Tartor u Aôndo shi er uivande shi ungwan imo i Yehova sha hanma kwagh cii.
Mbampin mba umbur kwagh u i hen yô
-
Ka tom u nyi yange u hemba gban Yesu kwagh shighe u lu shin tar laa?
-
Uivande mba Yesu eren la tese ér nyi?
-
Ka akaa a injaa a nyi Yesu yange tese?
SEER HENEN KWAGH
Ka itinekwagh i nyi Yesu yange hemban lamen sha mi?
“Tartor u Aôndo—Er i Hii Ve U Gbe Yesu Kwagh Yum Yô” (Iyoukura, Novemba 1, 2014)
Nenge er i hii ve se ne jighjigh ser uivande mba Yesu mbara lu akaa a yange er kpôô kpôô yô.
“Uivande mba Yesu Er La—Ve Tese u Nyi?” (Iyoukura, Julai 15, 2004)
Nenge er orgen yange hen er Yesu waan ior ikyo kpishi ve, kwagh la gema uma na yô.
“Yange M Henen sha Kwagh Wam Tseegh” (Iyoukura, Novemba 1, 2014)
Nenge er i nger akaa a vesen a Yesu er shighe u lu eren tom u pasen kwagh la sha adondo adondo yô.
a Ken ityough 31-33 la, a seer timen sha kwagh u Tartor u Aôndo vighe vighe.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
