Yesu yange kaa ér gba u Mbakristu cii vea er batisema. (Ôr Mateu 28:19, 20.) Nahan kpa, ka nyi i lu batisema? Man ka nyi i gbe hange hange i or a er ve nana kuma u eren batisema?

1. Ka nyi i lu batisema?

Ishember i “batisema” la, i zua a i ken ishember igen i ken zwa Grika, man inja na yô, ka “u mirin” kwagh shin mnger. Shighe u Yohane er Yesu batisema la, yange mir un shin Ifi u Yordan, been yô, Yesu maa ‘due shin mnger kera.’ (Marku 1:9, 10) Nahan Mbakristu mba mimi kpa ka i er ve batisema sha u mirin ve shin mnger vindi vindi er Yesu nahan.

2. Or ka nana er batisema yô, nan tese ér nyi?

Or ka nana er batisema yô, nan tese ér nan tsegha iyol i nan sha ci u Yehova Aôndo. Or ka nan tsegha iyol i nan nena? Cii man i er or batisema yô, ka nan er msen hen Yehova ken iuv, nan pase un ér nan soo u civir Un gbem sha won. Ka nan tôndo zwa a Yehova ér nana civir un tseegh, shi ka ishima na tseegh nana eren ye. Ka nan ‘nyiman iyol i nan, nan dondon’ atesen a Yesu kua ikyav na la. (Mateu 16:24) Or ka nana tsegha iyol i nan sha ci u Yehova shi nana er batisema yô, kwagh la a wase nan u yan ijende a Yehova kôôsôô kua mbacivir Yehova mbagen kpaa.

3. Ka nyi ka i gba u or a er cii ve nana kuma u a er nan batisema?

Cii ve i er or batisema yô, gba hange hange u nana hen kwagh u Yehova shi nana na un jighjigh. (Ôr Mbaheberu 11:6.) Er nan lu fan kwagh na seer shi jighjigh u nan a lu seer taver la, Yehova una seer doon nan ishima. Nahan a sar nan u pasen ior kwagh na shi kuran atindi a na kpaa. (2 Timoteu 4:2; 1 Yohane 5:3) Ka nana “zenden sha gbenda u doon Yehova,” nana “eren hanma kwagh u a soo” je maa, i gba saren nan u tseghan iyol i nan sha ci u Aôndo shi eren batisema.—Mbakolose 1:9, 10. a

 HEN KWAGH I ZA SHIMI

4. Se fatyô u henen kwagh ken batisema u Yesu la

Ôr Mateu 3:13-17 sha er u seer fan kwagh u batisema u Yesu yô. Maa lam nen sha mbampin mban:

• Shighe u Yesu er batisema la lu anikyundana?

• Yange i er un batisema nena? Yange i haa un mngerem sha icul shinii i mir un shin mnger vindi vindi?

Yesu yange hii u eren icighantom u Aôndo tindi un shin tar ér a va er la shighe u er batisema la. Ôr Luka 3:21-23 man Yohane 6:38, maa lam nen sha mpin ne:

• Ka tom u nyi Yesu yange na uma na cii u eren shighe u er batisema kera laa?

5. Batisema ka kwagh u u fatyô u eren yô

Alaghga sha hiihii la u nenge kwagh u tseghan iyol you shi eren batisema la wer ka kwagh u taver. Kpa aluer u ngu henen kwagh u Yehova seer yô, u va nenge wer u fatyô u eren kwagh u injaa ne. Wea soo u nengen ior mbagen mba yange ve er kwagh ne yô, nenge VIDIO i i lu heen ne.

Ôr Yohane 17:3 man Yakobu 1:5, maa lam nen sha mpin ne:

• Ka nyi ia wase or nana wa agoyol a kuma u eren batisema?

1. Ka se tsegha iyol yase sha ci u Yehova sha u pasen un ser se soo u civir un gbem sha won

2. Shighe u se lu eren batisema la, ka se tesen ken igbar sha ishigh ki ior mba ve lu nengen la cii ser se tsegha iyol yase sha ci u Aôndo

 6. Ka sea eren batisema yô, se hingir u lun ken tsombor u Yehova

Ka sea er batisema yô, se hingir u lun ken tsombor u u lu ken mzough sha tar cii yô. Er se dugh sha ajiir kposo kposo shi mlu wase a kaha nahan kpa, jighjigh u nan wase yô, ngu môm shi se cii se mba dondon atindi a sha kwagh u aeren a wang la. Ôr Pasalmi 25:14 man 1 Peteru 2:17, maa lam nen sha mpin ne:

• Or ka nana eren batisema yô, mlu u nan vea Yehova kua ior mbagen mba ve civir Un la a lu nena?

 KA NYI U HENE?

Yesu yange tese ér gba u Mbakristu vea er batisema. Cii ve or nana er batisema yô, gba u nana na Yehova jighjigh taveraa shi nana kuran atindi a na shi nana tsegha iyol i nan sha ci na kpaa.

Mbampin mba umbur kwagh u i hen yô

• Ka nyi i lu batisema, man er nan i gbe hange hange u or a er batisema?

• Iyoltseghan man batisema zua nena?

• Ka nyi ka i gba u or a er cii ve nana tsegha iyol i nan shi nana er batisema?