ITYOUGH 27
Ku u Yesu la Ua Fatyô u Yiman Se Nena?
Ka se er isholibo shi se ya ican shi se kpe sha ci u Adam man Ifa, yange ve hemba Aôndo ato. a Nahan kpa, kwagh hemba se a hemba ga. Yehova ker gbenda u una yima se sha ikyev i isholibo man ku yô, man a er kwagh ne sha ikyev i Wan na, Yesu Kristu. Bibilo tese ér Yesu yange kpe, na nagh ku paan se. Ipaan ka kwagh u ka i kimbi sha u i pase or u i kôr nan yô. Kwagh u Yesu yange kimbi yô, lu uma na u vough la. (Ôr Mateu 20:28.) Yesu yange bugh se gbenda u hiden zuan a kwagh u Adam man Ifa ta kera la shighe u de i wua un, kera za hemen u lun uma shin tar ga la. Shi Yesu yange tese er se doo un ishima kpishi shi Yehova kpa se doo un ishima tsung yô. Ityough kin kia wase u u seer lun a iwuese sha ku u Yesu la.
1. Ku u Yesu la ua fatyô u wasen se nyian nena?
Er se lu mbaasorabo yô, ka se er akaa kpishi a vihin Yehova. Nahan kpa, aluer se vaa afanyô sha mimi shi se zamber a Yehova ser a de se a asorabo ase la ken iti i Yesu Kristu shi se nôngo sha afatyô wase se kera kimbir a ga yô, se fatyô u yan ijende a na kôôsôô. (1 Yohane 2:1) Bibilo kaa ér: “Kristu yange kpe sha ci u asorabo kwa môm maa kure hanma kwagh, orperapera môm kpe sha ci u mbaerenakaabo, sha er una za a ven hen Aôndo yô.”—1 Peteru 3:18.
2. Ku u Yesu la ua va wase se ken hemen nena?
Yehova yange tindi Yesu va na nagh sha uma na, u lu a isholibo shio la “sha u hanma or u nan ne [Yesu] jighjigh cii nana̱ de timin ga, kpa nana̱ zua a uma u tsôron” yô. (Yohane 3:16) Doo se kpishi er Yesu yange er kwagh ne yô, sha ci u ica a kera gba ga tsô Yehova una bee a akaa a vihin a ihyembeato i Adam la i ve a mi la cii. Nahan aluer se na nagh ku Yesu kura jighjigh yô, se zua a ian i lun uma gbem sha won ken Paradiso shin tar shi a saan se iyol!—Yesaia 65:21-23.
HEN KWAGH I ZA SHIMI
Seer fan er i hii ve Yesu yange va kpe yô, shi fa er ku na la ua fatyô u wasen we yô.
3. Ku u Yesu la yima se sha ikyev i isholibo man ku
Nenge VIDIO i i lu heen ne, maa lam nen sha mpin u a dondo ne.
-
Adam yange hembe Aôndo ato yô, lu nyi i kar unu?
Ôr Mbaroma 5:12, maa lam nen sha mpin ne:
-
Isholibo i Adam la i bende a we nena?
Ôr Yohane 3:16, maa lam nen sha mpin ne:
-
Yehova yange tindi Wan na shin tar ér a va er nyi?
-
Adam yange lu a mshi môm ga, kpa hembe Aôndo ato yô, ihyembeato la nyôr a uumace ken isholibo man ku
-
Yesu yange lu or u lu a mshi shio, shi ungwan imo i Aôndo yô, nahan kwagh ne bugh uumace ian i va lun uma gbem sha won a mshi shio
4. Ku u Yesu la ua fatyô u wasen ior cii
Nenge VIDIO i i lu heen ne, maa lam nen sha mpin u a dondo ne.
-
Ku u or môm ua fatyô u wasen ior cii nena?
Ôr 1 Timoteu 2:5, 6, maa lam nen sha mpin ne:
-
Yange i gba Adam lu a mshi shio, nahan kpa va er isholibo, maa nyôr a uumace ken isholibo man ku. Yesu kpa lu or u lu a mshi shio yô. Nahan ku na la hingir “ipaan i kuman vough” nena?
5. Ipaan ka iyua i Yehova a ne u yô
Azende a Yehova ka a nenge ipaan ér ka iyua i Yehova a ne hanma ve yô. Ikyav i tesen yô, ôr Mbagalatia 2:20, maa lam nen sha mpin ne:
-
Apostoli Paulu yange tese ér un nenge ipaan ér ka iyua i i ne un yô nena?
Shighe u Adam er isholibo la, i kure un ijir ér un vea mbayev mba una va mar la cii vea kpe. Kpa Yehova tindi Wan na va kpe sha er u fatyô u va lun uma gbem sha won yô.
U nguren ôron avur a Bibilo aa lu heen ne yô, hen er yange a lu Yehova ken ishima shighe u Wan na lu yan ican la yô. Ôr Yohane 19:1-7, 16-18, maa lam nen sha mpin ne:
-
U nenge kwagh u Yehova man Yesu yange ve er sha ci wou la nena?
ALAGHGA ORGEN NANA PINE ÉR: “Or môm nana fatyô u kpen sha ci u ior cii nena?”
-
We u na mlumun sha mpin la wer nyi?
KA NYI U HENE?
Er Yesu yange kpe yô, Yehova una fatyô u den se a asorabo ase shi se va lu uma gbem sha won.
Mbampin mba umbur kwagh u i hen yô
-
Er nan ve Yesu yange kpe?
-
Uma u Yesu u lu a isholibo shin mshi shio la lu ipaan i kuman vough nena?
-
Ku u Yesu la ua fatyô u wasen we nena?
SEER HENEN KWAGH
Hen fa er i hii ve i yer uma u Yesu u lu a isholibo ga la ér ipaan yô.
“Naagh Ku Yesu Hingir ‘Ipaan sha Ci u Ior Kpishi Nena’?” (Ngeren u sha Intanet)
Hen fa kwagh u i gbe u se er ve a yima se yô.
Yehova una fatyô u den se asorabo a vesen je kpaa?
“Mbampin mba Bibilo I Ne Mlumun sha Mi La” (Iyoukura, Mei 1, 2013)
Nenge er orgen yange hen kwagh u nagh ku Kristu ve kwagh la wase un gema uma na yô.
a Isholibo saa sha u eren kwagh u bo tseegh ga. Isholibo kua akaa agen a i mar se a mi a vihin la cii.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
