I lu nahan or u nan doo u ishima kpishi nan kpe vee? Alaghga u pine hen imba shighe u vihin la wer: ‘Ka sea kpe nahan kwagh wase a lu nena? Se tsa shi se nenge a ior asev mba ve kpe la je kpa?’ Nenge ase mbamlumun mba Bibilo i ne sha mbampin mban mba vea fatyô u surun se ishima la ken ityough kin man ki ki dondo la.

1. Ka sea kpe nahan kwagh wase a lu nena?

Yesu yange tôô ku kar sha mnyam ma or nan lu yaven mem mem yô. Shighe u or lu yaven mem mem yô, nan fe kwagh u a lu zan hemen ape nan lu la ga. Nahan ku ngu er mnyam nahan nena? Or ka nana kpe yô, kwagh kera nyoon nan ga shi ka huan nan kpaa ga. Bibilo kaa ér: ‘Mbakpenev yô, fa ma kwagh ga.’—Ôr Orpasenkwagh 9:5.

2. Ka sea fa mimi sha kwagh u kuugh nahan i wase se nena?

Ior kpishi mba cie ku, shi mba cie mbakpenev kpaa! Nahan kpa, kwagh u Bibilo i tese sha kwagh u kuugh la una sur u ishima kpishi. Yesu yange kaa ér: “Mimi una pase ne, ne kera lu uikyangen ga.” (Yohane 8:32) Ukwaghaôndo mbagen mba tesen ér or ka nana kpe yô, jijingi u nan kpen ga, ka a due a yem, i mase shin iyol tseegh. Kpa Bibilo yô, tese nahan ga. Sha nahan yô, or ka nana kpe je, nan kera ye ican ga. Shi er mbakpenev ve fe kwagh môm ga yô, vea fatyô u bulan se ga. Nahan ityôkyaa ngi i nôngon wer u er kwagh i doo orkpen shin u civir nan ga, shi ityôkyaa ngi i eren msen sha ci u nan kpaa ga.

Ior mbagen ka ve kaa ér vea fatyô u lamen a mbakpenev. Kpa ka mimi ga. Se sember henen ser mbakpenev “fa ma kwagh ga.” Jighilii yô, ior mba ve henen ér mba lamen a ior vev mba ve kpe la, ka azôv ka ve lamen a a ye. Azôv ne ka a er inja er nga ior mba ve kpe la nahan. Nahan aluer se fa mimi sha kwagh u kuugh yô, kwagh la una kura se sha ikyev i azôv. Yehova ta se icin ér mayange se de nôngon ser se lam a mbakpenev ga, sha ci u a fa er aluer se za wa nongo a azôv ve, se nyôr ken zayol yô.—Ôr Duteronomi 18:10-12.

3. Hen fa mlu u mbakpenev jighilii

Hanma ijiir sha tar yô, ior mba a mbamnenge kposo kposo sha kwagh u mlu u mbakpenev. Nahan kpa, ka mbamnenge vev mbara cii ve lu shami ga.

• Ka nyi ior ve ne jighjigh a mi hen ijiir yen sha kwagh u mlu u mbakpeneve?

 4. Mimi u sha kwagh u kuugh la ka a wase se

Ka sea fa mimi u sha kwagh u kuugh la yô, kwagh la a wase se se de u cian mbakpenev. Ôr Orpasenkwagh 9:10, maa lam nen sha mpin ne:

• Mbakpenev vea fatyô u bulan se?

Ka sea na mimi u Bibilo i tese la jighjigh yô, mayange se mba lumun a aie u i kaan ér gba u a civir mbakpenev shin a eren akaa a doon a ve la ga. Ôr Yesaia 8:19 man Mpase 4:11, maa lam nen sha mpin ne:

• U nenge wer ka i lu Yehova ken ishima a or u nan civir orkpen shin nan lu keren iwasen hen orkpen la nena?

5. Mimi u sha kwagh u kuugh la ka a sur se ishima

Ior kpishi i tese ve ér zum u vea kpe yô, a tsaha ve sha akaabo a yange ve er la. Nahan kpa ka sea fa er orkpen môm nan ye ican ga, kua mba yange ve eren akaabo a vihin la je kpaa yô, kwagh la a sur se ishima kpishi. Ôr Mbaroma 6:7, maa lam nen sha mpin ne:

• Bibilo kaa ér or ka nana kpe yô, Aôndo a de nan a asorabo a nan, nahan u hen wer orkpen nana lu yan ican sha ci u akaabo a yange nan er laa?

Ka sea seer fan Yehova yô, se hemban kaven er mayange a eren mbakpenev ican ga yô. Ôr Duteronomi 32:4 man 1 Yohane 4:8, maa lam nen sha mbampin mban:

• Aôndo u a lu a aeren a i ter ken avur ne la una lumun a kwagh u eren ior mba ve kpe la icana?

• U nenge wer mimi u sha kwagh u kuugh la ka kwagh u surun se ishima? Er nan ve u ôr nahana?

 KA NYI U HENE?

Or ka nana kpe yô, kwagh u nan bee. Mbakpenev mba ye ican ga, shi vea fatyô u bulan ior mba ve lu uma la kpaa ga.

Mbampin mba umbur kwagh u i hen yô

• Or ka nana kpe nahan kwagh u nan a lu nena?

• Mimi u se fe sha kwagh u kuugh la ka a wase se nena?

• Mimi u se fe sha kwagh u kuugh la ka a sur se ishima nena?