ITYOUGH 31
Ka Nyi I Lu Tartor u Aôndo?
Itinekwagh i vesen i Bibilo i ôr kwagh sha mi yô, ka Tartor u Aôndo. Yehova una kure awashima na u geman tar ne hingir paradiso la sha ikyev i Tartor shon. Ka nyi i lu Tartor laa? Er nan se fe ser ngu hemen hegene? Ka nyi Tartor la u hila ere? Man ka nyi ua va er ken hemene? A na mlumun sha mbampin mban ken ityough kin kua ken mtom ma mhar ma ma dondo la.
1. Ka nyi i lu Tartor u Aôndo, man ka an nan lu Tor u Tartor shono?
Tartor la ka gomoti u Yehova Aôndo a ver yô. Ka Yesu Kristu a lu Tor u Tartor shon ye, ngu hemen sha. (Mateu 4:17; Yohane 18:36) Bibilo kaa ér, Yesu “una tema Tor . . . gbem sha won.” (Luka 1:32, 33) Er Yesu a lu Tor u Tartor u Aôndo yô, una hemen hanma or cii sha tar.
2. Ka unô vea hemen vea Yesu?
Yesu ngu hemen tswen ga. Ior mba ken “hanma ipyaven man hanma zwa man hanma nongoior man hanma ikyurior cii, . . . ka u vea tema tor sha tar.” (Mpase 5:9, 10) Ka iorov ume vea hemen vea Kristu? Hii shighe u Yesu va shin tar la je, ior umiliôn imôngo hingir mbadondon un. Nahan kpa, ka mbadondon Yesu 144,000 tseegh vea yem sha, vea za hemen vea na ye. (Ôr Mpase 14:1-4.) Mbakristu mbagen cii vea lu shin tar, Tartor la ua lu hemen ve.—Pasalmi 37:29.
3. Tartor u Aôndo hemba doon a ugomoti mba uumace sha ci u nyi?
Uumace mba ve hemen la ka vea nôngo ér vea er akaa a dedoo je kpa, mba lun a tahav mbu eren hanma kwagh u ve soo ga. Shi ka ve va kar kera nahan mbahemenev mbagen mba kwagh u ior a gbe ve ishima ga yô, ve kar ve tema. Nahan kpa, Yesu u a lu Orhemen u Tartor u Aôndo la yô, mayange orgen nana kar a tema sha ityough nagh ga. Aôndo ‘ver tartor ugen u ua gba mayange ga yô.’ (Daniel 2:44) Yesu una hemen tar cii, shi mayange ior mbagen vea hemba doon un ishima a mbagen ga. Eren kwagh a ior kundu kundu man sha dooshima kua sha mimi. Shi una tese mbagen kpaa u eren kwagh a ior kundu kundu man sha dooshima kua sha mimi.—Ôr Yesaia 11:9.
HEN KWAGH I ZA SHIMI
Hen fa er i hii ve Tartor u Aôndo u hembe doon a hanma gomoti u uumace cii yô.
4. Tartor u Aôndo ua hemen tar cii
Yesu Kristu ngu a tahav mbu hemen hemba hanma tor ugen cii. Ôr Mateu 28:18, maa lam nen sha mpin ne:
-
Tahav mbu Yesu hemba mbu uumace mba ve hemen la nena?
Ugomoti mba uumace yô, ka i musan mbahemenev shi ka ve hemen sha ma ipyaventar tseegh. Nahan kpa Tartor u Aôndo di ye? Ôr Daniel 7:14, maa lam nen sha mbampin mban:
-
Er i lu “timin [Tartor u Aôndo] kera mayange ga” yô, kwagh la doo sha ci u nyi?
-
Er i lu u Tartor u Aôndo ua hemen tar cii yô, kwagh la doo sha ci u nyi?
5. Gba u a kar a ugomoti mba uumace kera
Er nan i gbe u Tartor u Aôndo ua kar a ugomoti mba uumace kera, ua kar a hemene? Nenge VIDIO i i lu heen ne, maa lam nen sha mpin ua dondo ne.
-
Ka nyi hemen u uumace u ve a mini?
Ôr Orpasenkwagh 8:9, maa lam nen sha mbampin mban:
-
U nenge wer Tartor u Aôndo u kar a ugomoti mba uumace kera, u kar u hemene? Er nan u ôr nahana?
6. Tartor u Aôndo ngu a mbahemenev mba ve fe mlu wase yô
Yesu u a lu Tor wase la yange vande lun orumace, nahan una fatyô u “zungwen a vese sha mbamyen asev.” (Mbaheberu 4:15) Nomso man kasev mbajighjigh mba 144,000 mba ve lu za hemen vea Yesu la kpa Yehova tsua ve “ken hanma ipyaven man hanma zwa man hanma nongoior man hanma ikyurior cii.”—Mpase 5:9.
-
Ka wea hen er Yesu man mba vea hemen vea na la cii ve fe mlu wase kua mbamzeyol asev nahan, kwagh la a sur u ishima kpa? Er nan u ôr nahana?
Yehova tsua nomso man kasev mba ken akuraior kposo kposo ér ve za hemen vea Yesu
7. Atindi a Tartor u Aôndo hemba doon a atindi a hanma gomoti u uumace cii
Ugomoti ka ve wa atindi sha u a kura ior vev shi a lu ve a inja yô. Tartor u Aôndo kpa ngu a atindi a i gbe u ior mba u lu hemen ve la vea kuran yô. Ôr 1 Mbakorinte 6:9-11, maa lam nen sha mbampin mban:
-
Shighe u hanma or nana lu kuran atindi a Aôndo la, u hen wer tar ua lu nena? a
-
U nenge wer Yehova ngu a ian i wan atindi ér ior mba Tartor la u lu hemen ve cii ve kurana? Er nan ve u ôr nahana?
-
Ka nyi i tese ér ior mba ve kuran atindi ne ga kpa vea fatyô u geman inja?—Nenge ivur 11.
Ugomoti ka ve wa atindi sha u a kura shi a wase ior vev. Tartor u Aôndo ngu a atindi a hemban doon cii sha u wasen ior mba u lu hemen ve la shi kuran ve
ALAGHGA ORGEN NANA PINE ÉR: “Ka nyi i lu Tartor u Aôndo?”
-
We u na mlumun wer nyi?
KA NYI U HENE?
Tartor u Aôndo ka gomoti u sha, u una hemen tar cii yô.
Mbampin mba umbur kwagh u i hen yô
-
Ka unô vea hemen ken Tartor u Aôndo?
-
Tartor u Aôndo hemba hanma gomoti u uumace cii nena?
-
Ka nyi Yehova a soo ér mba Tartor la ua hemen ve cii ve erene?
SEER HENEN KWAGH
Nenge er Yesu yange pase ape Tartor la u lu yô.
“Tartor u Aôndo Ka Kwagh u ken Ishima Youwee?” (Ngeren u sha Intanet)
Er nan Mbashiada mba Yehova ve nenge ér hemba doon u suur sha Tartor u Aôndo a u suur sha hemen u orumace?
Time sha kwagh u Bibilo i pase sha kwagh u iorov mba 144,000 mba Yehova a tsough ve ér ve za hemen vea Yesu la.
Ka nyi yange i wase kwase ugen u lu ken purusu yô, na jighjigh ér ka Tartor u Aôndo tseegh ua bee a ieren i mimi ga sha tara?
“M Mase Kaven Er i Hii Ve Ieren i Mimi Ga i Ngee Yô” (Awake!, Novemba 2011)
a Se va time sha atindi ne agen ken Vegher u sha 3 la.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
