ITYOUGH 34
Se Tese Ser Yehova Doo Se Ishima Nena?
U nenge wer Aôndo hemba doon we ishima hegen a shighe u yange u hii u henen Bibilo laa? U soo wer ijende i u ye vea na la i za hemen u taver seer a seere? Aluer ka isharen you la yô, umbur wer Yehova kpa, er a nenge kwagh na a lu doon we seer a seer la, kape we kpa u lu seer doon un ishima shi una lu nengen sha a we je la. Nahan u tese Yehova wer a doo u ishima nena?
1. Se tese Yehova ser a doo se ishima nena?
Ka se tese ser Yehova doo se ishima sha u ungwan imo na. (Ôr 1 Yohane 5:3.) Yehova kighir or ér nana ungwa imo na ga. Kpa a na hanma wase ian i ungwan imo na a ishima yase shin ungwan ga. Er nan ve i lu nahana? Ka sha ci u Yehova soo ér se lu “mbaungwan kwagh a ishima i môm.” (Mbaroma 6:17) Inja na yô, a soo ér u ungwan imo na sha ci u un doo u ishima, i de lu sha ci u gba u u er nahan keng keng ga. I gber vegher u sha 3 man 4 u takeda ne ér ve wase u u tesen Yehova wer a doo u ishima sha u eren kwagh u doon un, geman palegh u eren kwagh u vihin un.
2. Er nan ka i lu se ican u tesen ser Yehova doo se ishima?
‘Atsan a orperapera ngee.’ (Pasalmi 34:19) Se cii se mba nôngon a mbamyen asev. Shi alaghga ashighe agen se nyôr ken ican i inyar shin a er kwagh a vese sha mimi ga, gayô se tagher a mbamzeyol mbagen. Zum u se nyer ken mbamtaver yô, alaghga a taver se u eren kwagh u Yehova a soo yô. Sha ci u alaghga a hemban lun se zange u eren kwagh u a lu u bo la. Nahan kpa, ka wea er kwagh u Yehova a kaa ér u er la sha mimi yô, u tese wer Yehova doo u ishima hemba hanma kwagh cii. Shi u tese wer u ngu civir un sha mimi. Man kwagh ne ka a na yô, un kpa a er kwagh a we sha mimi. Shi mayange una kende u ga.—Ôr Pasalmi 18:25.
HEN KWAGH I ZA SHIMI
Tôv fa er ka wea ungwan imo i Yehova ve i saan un iyol man kwagh u una wase u u eren kwagh ne yô.
3. We kpa Satan wa u aie iyol
Bibilo ôr a vese ken takeda u Yobu ér Satan yange wa Yobu aie iyol kua hanma or u nan soo u civir Yehova cii. Ôr Yobu 1:1, 6–2:10, maa lam nen sha mbampin mban:
-
Satan yange kaa ér Yobu ngu ungwan imo i Yehova sha ci u nyi?—Nenge Yobu 1:9-11.
-
Ka nyi Satan a ôr sha iyol i uumace cii kua we kpaa? —Nenge Yobu 2:4.
Ôr Yobu 27:5b, maa lam nen sha mpin ne:
-
Yobu yange tese ér Yehova doo un ishima sha mimi nena?
4. Na i saan Yehova iyol
Ôr Anzaakaa 27:11, maa lam nen sha mbampin mban:
-
Ka wea eren kwagh sha kwaghfan shi wea ungwan imo i Yehova nahan i lu un nena? Man ka sha ci u nyi?
5. U fatyô u civir Yehova sha mimi
Er Yehova a doo se ishima yô, kwagh la ka a mgbegha se u ôron mbagenev kwagh na. Man ka sea civir un sha mimi yô, se pasen mbagenev kwagh na, ka a taver u eren nahan je kpaa. Nenge VIDIO i i lu heen ne, maa lam nen sha mbampin mba ve dondo ne.
-
I lu nahan taver we u ôron mbagenev kwagh u Yehova?
-
Ken vidio la, ka nyi yange i wase Grayson hemba mcieme?
Akaa a Yehova a soo la ka a doo se ishima shi sea kôr akaa a a ker ihyom la ihyom yô, i hemba lun se ican ga u civir un sha mimi. Ôr Pasalmi 97:10, maa lam nen sha mbampin mban:
-
Sha kwagh u hen yô, ka akaa a nyi nahan a doo Yehova ishima? Man ka akaa a nyi nahan a ker a ihyomo?
-
U er nan ve u hen u soon kwagh u dedoo geman kôron kwaghbo ihyomo?
6. Ka sea ungwan imo i Yehova yô, kwagh la a wase se
Hanma shighe yô, u ungwan imo i Yehova la ka kwagh u hemban doon cii. Ôr Yesaia 48:17, 18, maa lam nen sha mbampin mban:
-
U nenge wer, doo u se na jighjigh ser hanma shighe yô, Yehova ka a fa kwagh u a hembe doon sha ci wase yôô? Er nan ve u ôr nahana?
-
Er u lu henen Bibilo kua kwagh u Yehova, Aôndo u mimi la, kwagh la wase u nena?
IOR MBAGENEV KA VE KAA ÉR: “Aôndo wa ver ver yum, or a fatyô u eren kwagh u doon un ga.”
-
Ka hanma ivur Bibilo u fatyô u ôron sha u tesen or wer, ieren yase ka i na i saan Yehova iyol shin i na ishima i vihi unu?
KA NYI U HENE?
Ka se tese ser Yehova doo se ishima sha u ungwan imo na shi eren kwagh u a kaa ér se ér cii sha mimi aluer ka shighe u i taver se je kpaa.
Mbampin mba umbur kwagh u i hen yô
-
Ka nyi u hen ken ikyav u Yobu laa?
-
U tese wer Yehova doo u ishima nena?
-
Ka nyi ia wase u u za hemen u civir Yehova sha mimi?
SEER HENEN KWAGH
Hen fa er u fatyô u civir Yehova sha mimi shi u eren kwagh sha mimi ken tiônnongo yô.
Seer henen kwagh u mbaaie mba Satan a we uumace iyol yô.
“Yobu Za Hemen u Civir Aôndo sha Mimi” (Kanyi I Lu Loho U Bibilo? vegher 6)
Nenge, er mbayev je kpa vea fatyô u tesen ér Yehova doo ve ishima yô.
Wanye nana fatyô u eren kwagh u Yehova a soo shighe u mbayev mbagenev ve lu kighir nan ér nana er kwagh u bo nena?