ITYOUGH 38
Tese Wer Uma u Aôndo a Ne Se Ne Gba U Kwagh
Akaa a dedoo nga kpishi a se er ve a saan se iyol yô. Ka sea tagher a mbamzeyol ken uma wase je kpa, akaa agen ka a lu a se er ve a fatyô u saan se iyol yô. Se tese Yehova ser uma u a ne se ne gba se kwagh nena? Man ityôkyaa i vesen i i gbe u se er kwagh nahan yô, ka nyi?
1. Er nan i doo u se tese ser uma gba se kwagha?
Doo u uma una gba se kwagh sha ci u ka Yehova, Ter wase u se doo un ishima la, a ne se iyua i uma ne ye. Ka un a lu “imbor i uma” ye, sha ci u a gba akaauma cii. (Pasalmi 36:9) “Ka un iyol na a ne ior cii uma man iôôn kua akaa cii ye.” (Aerenakaa 17:25, 28) Yehova na se akaa a aa wase se ve se za hemen u lun uma yô. Kpa ka cii la ga, a er akaa agen kpaa a aa na a kpe se iyol yô.—Ôr Aerenakaa 14:17.
2. Se tese Yehova ser uma u a ne se ne gba se kwagh nena?
Hii shighe u ngôu wa iyav ou la je, Yehova lu nengen sha a we. Davidi yange er msen, u Yehova a ne i nger ken Bibilo yô. Or u civir Aôndo ne kaa ér: ‘Ashe a Ou nenge ijenawambe yam.’ (Pasalmi 139:16) Uma wou gba Yehova kwagh tsung. (Ôr Mateu 10:29-31.) Aluer or wua orgen shin nan wua iyol i nan sha apera yô, kwagh la a lu kwagh u vihin Yehova tsung je. a (Ekesodu 20:13) Shi aluer se mba eren akaa a aa vihi se iyol shin se mba eren akaa a tesen ér se wa uma u mbagenev ikyo ga yô, kwagh la una vihi Yehova kpen kpen. Ka sea wa uma wase kua uma u mbagen ikyo yô, se tese ser uma u Aôndo a ne se la gba se kwagh kpishi.
HEN KWAGH I ZA SHIMI
Hen igbenda igen i u fatyô u tesen wer uma u Aôndo a ne se ne gba u kwagh yô.
3. Ver ishima sha iyol you
Mbakristu mba ve tsegh ayol a ve sha ci u Yehova yô, mba civir un a uma ve cii. Ka inja er ka ve gema ayol a ve, ve na Aôndo nagh a mi nahan. Ôr Mbaroma 12:1, 2, maa lam nen sha mbampin mban:
-
Ka nyi i gbe u ia mgbegha u u nengen sha iyol youwe?
-
Ka sha igbenda i nyi nahan u fatyô u eren kwagh nee?
4. Palegh akaa a aa na u hingir u za vihin iyol shin kpen la
Bibilo taver se ishima ér se palegh akaa a aa na se hingir u za vihin iyol la. Nenge VIDIO i i lu heen ne sha er u fa akaa agen a u er ve u palegh iyol vihin yô.
Ôr Anzaakaa 22:3, maa lam nen sha igbenda i we man mbagenev ne fatyô u palegh iyol vihin . . .
-
hen ya wou yô.
-
hen ijiirtom you yô.
-
shighe u ne lu eren anumbe yô.
-
shighe u u lu nahan kwagh iyol you shin orgen nan tee u yô.
5. Wa uma u wan u ken uya ikyo
Davidi yange pase er uma u wan u ken uya u a lu vesen a vese la kpa a gbe Yehova kwagh yô. Ôr Pasalmi 139:13-17, maa lam nen sha mpin ne:
-
Hen ishigh ki Yehova yô, uma u or hiin shighe u i we iyav mbu nan la shinii ka shighe u i mar nan laa?
Atindi a Yehova yange wa Mbaiserael sha ayange a tsuaa la, yange a kura ungô kua mbayev vev mba ken uya la cii. Ôr Ekesodu 21:22, 23, maa lam nen sha mbampin mban:
-
Yehova yange a nenge or u nan wua wan u ken uya abu la nena?
-
Aluer or er kwagh ne sha apera nahan u hen wer a lu un ken ishima nena? b
-
We u nenge gbenda u Aôndo a nengen kwagh ne la nena?
Kwase u uma a gbe nan kwagh je kpa, alaghga shighe ugen nana nenge ér gba u nana vihi iyav keng ve a wase nan ye. Ôr Yesaia 41:10, maa lam nen sha mbampin mban:
-
Aluer i hingir a kwase hang ér nana vihi iyav yô, ka hen an i doo u nana ker iwasene? Er nan ve u ôr nahana?
IOR MBAGENEV KA VE KAA ÉR: “Kwase ngu a ian i tsuan u vihin iyav shin vihin ga, sha ci u ka iyol i nan.”
-
Er nan u ne jighjigh wer uma u ngô kua u wan u nan u ken uya la cii gba Yehova kwagha?
KA NYI U HENE?
Bibilo tese se ér uma u Yehova a ne se ne a doo se ishima, se wa un ikyo shi se kuran un kpaa. Kwagh ne saa sha uma wase tseegh ga, kpa kua uma u ior mbagenev kpaa.
Mbampin mba umbur kwagh u i hen yô
-
Er nan ve uma u ior a gbe Yehova kwagha?
-
Or ka nana wua or sha apera nahan i lu Yehova nena?
-
Er nan ve uma u Yehova a ne u ne a doo u we?
SEER HENEN KWAGH
Se wuese Yehova sha uma u a ne se ne nena?
Zua a mlumun sha mpin ne, Aôndo una de kwase u yange nan vihi iyav yô kwaghbo?
“Ka Nyi Bibilo i Ôr sha Kwagh u Iyav mbu Vihini?” (Ngeren u sha Intanet)
Hen fa er i doo u gbenda u Aôndo a nengen uma la ua wase se u tsuan anumbe a aa na se vihi iyol ga yô.
“Doo u Se Er ‘Anumbe A a Cieryol’ Yôô?” (Awake!, Oktoba 8, 2000)
Aluer or soo u wuan iyol i nan di ye? Nenge er Bibilo ia fatyô u wasen nan yô.
“Aluer Ka Lun Mo Ape Wuan Iyol Yam Nahan Bibilo ia Fatyô u Wasen Mo Kpa?” (Ngeren u sha Intanet)
a Mba asema a vihin ve la kwagh ve gba Yehova ishima kpishi. (Pasalmi 34:18) A fa er ashighe agen akaa ka a er or a vihin nan tsung je, i lu nan ape wuan iyol i nan yô, shi a soo u wasen nan kpaa. Wea soo u fan er Yehova ka a wase ior mba ve soo u wuan iyol ve yô, ôr ngeren u a lu a itinekwagh ér “I Want to Die—Can the Bible Help Me When I Have Suicidal Thoughts?” (Aluer Ka Lun Mo Ape Wuan Iyol Yam Nahan Bibilo ia Fatyô u Wasen Mo Kpa?) u a lu hen vegher u Seer Henen Kwagh u ityough kin la.
b Kpa doo u mba yange ve vihi iyav la, vea na iyol ve ibo a za kar ikyaa inya ga, Yehova una fatyô u den ve a kwaghbo. Wea soo u seer fan yô, nenge ngeren u a lu a itinekwagh ér “What Does the Bible Say About Abortion?” (Ka Nyi Bibilo i Ôr sha Kwagh u Iyav mbu Vihini?) u a lu hen vegher u Seer Henen Kwagh u ityough kin la.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
