ITYOUGH 39
Er Aôndo a Nengen Awambe La
Awambe ka kwagh u injaa kpishi. A awambe shio yô, or wase môm ma nan lu uma ga. Ka Aôndo a gbe se ye, nahan ka un i gbe u una ôr se kwagh u se er a awambe kua kwagh u i doo u se er a mi ga ye. Nahan ka nyi a ôr sha kwagh u awambe? Or a fatyô u yan shin tan awambe? Man u tsua kwagh u injaa sha ikyaa ne nena?
1. Yehova nengen awambe nena?
Yehova yange kaa a mbacivir un mba sha ayange a i ngeren Bibilo la ér: ‘Uma u hanma inyam yô, ka awambe a i a lu uma u i ye.’ (Levitiku 17:14) Hen Yehova yô, awambe tile sha ityough ki uma. Nahan er uma a lu icighankwagh u Yehova a ne se yô, awambe kpa ka icighankwagh.
2. Ka nyi Aôndo a vende ér i de eren a awambe ga?
Yange mngerem ma deemee ma ve ma karen kera yô, Yehova maa wa mbacivir un tindi ér ve de ye awambe ga. (Ôr Genese 9:4 man Levitiku 17:10.) Shi va kimbir tindi ne shighe u mbahemenev mba shin itine wa Mbakristu kwagh ér ve ‘za hemen u nyaghen Awambe’ la.—Ôr Aerenakaa 15:28, 29.
Inja i u nyaghen awambe la ér nyi? Aluer ortwer kaa a we ér u de me msôrom ga yô, we kpa u ma ga. Kpa u lumun u yan kwaghyan u i nongo msôrom shami shin u lumun wer i ta u maa? Mayange ga cii. Kape tindi u Aôndo a we sha kwagh u awambe la kpa i lu je la. Gba u se ya awambe shin se ya inyam i i sôngo ga ze. Shin se ya kwaghyan u i nongo awambe shami ga.
Kpa hide sha gbaa u sôron twer a awambe di ye? Akaa agen a i eren a awambe sha u sôron twer la, tindi u Aôndo venda a. Ikyav i tesen yô, tindi u Aôndo venda u tan awambe jimin shin mzeram ma awambem ma vesen er ma nyian man ma pupuu man ma i yer ér platelets la kua ma i yer ér plasma la kpaa. Kpa alaghga igbenda i sôron twer igen yô, ia per tindi u Aôndo keng ga. U tesen ikyav yô, mbagenev ka ve er tom a aveghemakaa a ken mzeram ma awambem ma vesen la u sôron twer. Igbenda igen kpa ngi i ka i er tom a awambe a or shighe u i lu eren nan twer yô. Shighe u u lu henen sha igbenda i eren twer ne la, fa wer gba u hanma wase nana tsua kwagh u nana er la iyol i nan. a—Mbagalatia 6:5.
HEN KWAGH I ZA SHIMI
Hen fa igbenda i i eren tom a awambe u sôron twer la sha er u fa twer u u lumun wer i er u yô.
3. Tsua twer u ua doo Yehova yô
U er nan ve u tsua twer u u zough sha gbenda u Aôndo a nengen awambe laa? Nenge VIDIO i i lu heen ne, maa lam nen er i gbe hange hange u eren akaa a i tese shin heen ne yô.
-
Er msen sôn Yehova a na u kwaghfan.—Yakobu 1:5.
-
Ker akaawan a Bibilo a a zough sha kwagh la yô.—Anzaakaa 13:16.
-
Tôv fa igbenda i i eren twer a awambe shio hen ijiir you la.
-
Fa twer u u venda wer i de eren we ga la.
-
Nôngo tsua kwagh u una na imoshima you ia lu zan we iyol ga yô.—Aerenakaa 24:16. b
-
Fa wer gba u or môm nana tese u kwagh u u er sha akaa a i gbe u or nana tsua er imoshima i nan i lumun a nan la ga, aluer or shon ka nomou shin kwase wou shin ortamen gayô or u nan henen Bibilo a we la je kpaa.—Mbaroma 14:12.
-
Nger kwagh u u tsua la shin inya.
4. Mbashiada mba Yehova ka ve tsua twersôron u ú hembe doon la
Aluer se mba dondon tindi u Aôndo a we sha kwagh u awambe la kpa, se fatyô u zuan a or u nana er se twer a awambe shio yô. Nenge VIDIO i i lu heen ne.
Ôr Titu 3:2, maa lam nen sha mpin ne:
-
Er nan ve i doo u se lamen a mbatwerev sha icivir shi se eren kwagh a ve kundu kunduu?
|
Kwagh u se lumun ga yô |
Kwagh u Orkristu nana tsua iyol i nan yô |
|---|---|
|
A. Mzeram ma awambem ma i yer ér plasma la |
Aveghemakaa a ken mzeram ma awambem ma plasma la |
|
B. Mzeram ma awambem ma pupuu |
Aveghemakaa a ken mzeram ma awambem ma pupuu |
|
C. Mzeram ma awambem ma i yer ér platelets |
Aveghemakaa a ken mzeram ma awambem ma platelets la |
|
D. Mzeram ma awambem ma nyian |
Aveghemakaa a ken mzeram ma awambem ma nyian |
5. Shighe u i er tom a aveghemakaa a ken awambe yô
Awambe nga a mzeram ma vesen ker atô anyiin. Ka mzeram ma nyian man ma pupuu man ma i yer ér platelets kua ma i yer ér plasma la. Mzeram ma awambem ma vesen ma mnyiin man, di gema ma a aveghemakaa ker. c Aveghemakaa a ken awambe ne agen ka i er mcimbim ma nôngon num a iangev mbigen ken iyol a mi kua mcimbim ma tôndon awambe shighe u or vihi iyol yô.
Kpa hide sha gbaa u aveghemakaa a ken awambe la di yô, gba u hanma Orkristu nana tsua kwagh u nan soo la iyol i nan er imoshima i nan i Bibilo i tsaase i la, i lumun a nan la. Mbagen vea venda twer u i gbe u a er aa aveghemakaa a ken awambe yô. Mbagen di yô, imoshima ve ia lumun ér i er ve twer a aveghemakaa shon.
Shighe u u lu tsuan kwagh u u er yô, hen sha mpin ne:
-
Me fatyô u pasen ortwer er i hii ve m vende mer i de eren mo twer a aveghemakaa a ken awambe ga shin m lumun kpa?
ALAGHGA ORGEN NANA PINE ÉR: “Ka kwaghbo u tan awambee?”
-
We u nenge nena?
KA NYI U HENE?
Yehova soo ér se nengen awambe ser ka icighankwagh.
Mbampin mba umbur kwagh u i hen yô
-
Er nan Yehova a nengen awambe ér ka icighankwagha?
-
Er nan se fe ser tindi u Aôndo a we ér i nyagh awambe la kua awambe a tan kpaa?
-
U er nan ve u tsua kwagh u vough zum u i gbe u a er u twer u i gbe u a er tom a awambe?
SEER HENEN KWAGH
Ka nyi i doo u u hen sha mi cii ve u venda shin u lumun twer u i gbe u a er u a awambe ou we?
“Mbampin mba Mbaôron Takeda Ne Ve Pin La” (Iyoukura, Oktoba 15, 2000)
Ka nyi i doo u u hen sha mi shighe u u lu henen sha kwagh u lumun twer u i gbe u a er u a aveghemakaa a ken awambe shin vendan laa?
“Mbampin mba Mbaôron Takeda Ne Ve Pin La” (Iyoukura, Jun 15, 2004)
Ka nyi yange i wase ortwer ugen u lumun ér gbenda u Yehova a nengen awambe la ka sha injaa?
“M Lumun a Mnenge u Aôndo sha Kwagh u Awambe” (Awake!, Disemba 8, 2003)
Nenge er mbatamen mba ken Kômatii u Wasen sha Kwagh u Iyouci la, ka ve wase anmgbianev mba nomso man mba kasev yô.
a Nenge Ityough 35, “Er U Tsua Akaa sha Inja Yô.”
b Nenge ityôkwagh i sha 5, “Shighe u I Er Tom a Aveghemakaa a ken Awambe Yô,” man Ngeren u shin kpe 3, “Twersôron u Ú We Kwagh u Awambe Ker Yô.”
c Mbatwerev mbagen ka ve nenge mzeram ma awambem ma vesen ma mnyiin man ér ka aveghemakaa. Sha nahan yô, a gba u ú nôngo ortwer wou una fa wang er u soo wer i de te u awambe jimin, shin mzeram ma nyian man ma pupuu man ma i yer ér platelets kua ma i yer ér plasma la ga yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
