ITYOUGH 46
Er Nan I Doo u Ú Tsegha Iyol You shi U Er Batisema?
Or ka nan tsegha iyol i nan sha ci u Yehova, sha u eren msen tôndon zwa a na ér ka un tseegh nana civir, shi ka ishima na tseegh nana eren ye. (Pasalmi 40:8) Ka nan tseghan iyol i nan cii yô, nan er batisema. Kwagh la maa a tese ior mbagen ér nan tsegha iyol i nan sha ci u Yehova. Ka sea tsua u tseghan iyol yase sha ci u Yehova yô, se er kwagh u vesen u una gema uma wase cii yô. Ka nyi ka i na ve or er kwagh nee?
1. Ka nyi ka i na ve or tsegha iyol i nana?
Ka dooshima ka a mgbegha se u tseghan iyol yase sha ci u Yehova ye. (1 Yohane 4:10, 19) Bibilo kaa a vese ér: “Yehova Aôndo wou a̱ doo u ishima kpee je, a ishima you cii man a uma wou cii man a mhen wou cii man a agee a ou cii.” (Marku 12:30) Ka se tese ser Aôndo doo se ishima sha kwaghôron tseegh ga, kpa kua sha ieren yase kpaa. Er nomsoor man kwase u ve soo ayol a ve ka ve er ivese nahan, kape se kpa Yehova ka una doo se ishima ve dooshima la a mgbegha se, se tsegha iyol yase sha ci na shi se er batisema je la.
2. Ka averen a nyi Yehova ka a na mbacivir un mba ve er batisema laa?
Aluer u er batisema yô, u lu ken tsombor u Yehova u i saan u iyol la. Una tese u sha igbenda kpishi er u doo un ishima yô, shi u lu kôôsôô a na a hemba er u lu hegen ne. (Ôr Malaki 3:16-18.) Shi dugh u Yehova hingir Ter u kera yô, u zua a anmgbianev mba nomso man mba kasev sha tar, mba Yehova a doo ve ishima shi we kpa u doo ve ishima yô. (Ôr Marku 10:29, 30.) Nahan kpa, akaa nga a i gbe u u er cii ve u er batisema yô. A gba u u hen kwagh u Yehova shi una doo u ishima, shi u na Wan na Yesu jighjigh. U masen yô, a gba u u tsegha iyol you sha ci u Yehova. Aluer u er akaa ne shi u er batisema yô, u fatyô u va lun uma gbem sha won. Mkaanem ma Aôndo kaa ér: ‘Batisema ngu waren ne hegen.’—1 Peteru 3:21.
HEN KWAGH I ZA SHIMI
Hen fa er i hii ve i gbe hange hange u u tsegha iyol you sha ci u Yehova shi u er batisema yô.
3. Gba u se cii se tsua or u se civir yô
Ior mbagen sha ayange a Mbaiserael la, yange ve hen ér vea fatyô u civir Yehova kua aôndo u aiegh u i yilan ér Baal la. Kpa Yehova yange tindi profeti na Eliya ér a za kôôm mhen ve u shami ga ne. Ôr 1 Utor 18:21, maa lam nen sha mpin ne:
-
Ka nyi yange gba u Mbaiserael vea tsua u erene?
Se kpa gba u se tsua or u se civir yô, er Mbaiserael nahan. Ôr Luka 16:13, maa lam nen sha mbampin mba ve dondo ne:
-
Er nan ve se fatyô u civir Yehova kua or shin ma kwagh ugen hen shighe môm ga?
-
Se tese Yehova ser se tsua u civir un nena?
4. Hen sha igbenda i u doo Yehova ishima la
Yehova na se akaa a injaa kpishi. Nahan ka nyi se fatyô u nan unu? Nenge VIDIO i i lu heen ne.
Ka sha igbenda i nyi nahan Yehova a tese ér u doo un ishima? Ôr Pasalmi 104:14, 15 man 1 Yohane 4:9, 10, maa lam nen sha mbampin mban:
-
Ka akaa a Yehova a ne se a nyi nahan u hemba lun a iwuese sha mini?
-
Akaa a Yehova a ne se la na ka u ken ishima a na nena?
Or ka nana na se iyua i i doo se kpishi yô, ka se sugh nan. Ôr Duteronomi 16:17, maa lam nen sha mpin ne:
-
Ka wea hen sha hanma kwagh u Yehova a er sha ci wou nahan, ka nyi ka i sar u u nan unu?
5. Ka wea tsegha iyol you sha ci u Yehova yô, a na u averen kpishi
Ior kpishi hen ér, aluer ve za iti shi mba eren tom u injaa shi mba a inyaregh yô, a saan ve iyol. Kpa kwagh la ka mimii? Nenge VIDIO i i lu heen ne, maa lam nen sha mbampin mba ve dondo ne.
-
Er or u ken vidio la yange soo bol u gbidyen nahan kpa, er nan yange de bolo?
-
Yange tsegha iyol na sha ci u Yehova, kera na uma na cii sha kwagh u bol ga. U nenge wer yange er kwagh u sha mini? U ôr nahan sha ci u nyi?
Apostoli Paulu yange soo u lun ityagheror cii ve va hingir Orkristu ye. Yange hen atindi a Mbayuda sha ikyev i ortesen ugen u za iti yô. Kpa va hingir Orkristu yô, gema kwagh la cii ta kera. Paulu yange vaa afanyô? Ôr Mbafilipi 3:8, maa lam nen sha mbampin mban:
-
Er nan ve Paulu yange kaa ér akaa a yange un er cii ve un hingir Orkristu la ka “ihyôghonov” shin icimbivi?
-
Kpa ka nyi yange gema zua a mini?
-
U hen wer aluer u ngu civir Yehova yô, uma wou una hemba doono? Er nan ve u ôr nahana?
IOR MBAGENEV KA VE KAA ÉR: “M fa ka mimi je ne, kpa mo me fatyô a kwaghaôndo la ga.”
-
Er nan ve u hen wer, aluer u tsegha iyol you sha ci u Yehova yô ka kwagh u dedoo?
KA NYI U HENE?
Ka dooshima ka a mgbegha se u tseghan iyol yase sha ci u Yehova shi eren batisema ye.
Mbampin mba umbur kwagh u i hen yô
-
Er nan i gbe u Yehova una doo se ishima a ishima yase cii shi se civir un tswene?
-
Yehova ka a ver Mbashiada nav mba ve er batisema la nena?
-
U soo u tseghan iyol you sha ci u Yehova?
SEER HENEN KWAGH
Nenge er yange hii ve kwase u wan atsam ugen kua or u eren anumbe ugen yange ve tsegha iyol ve sha ci u Yehova yô.
Mbampin mba Agumaior A Pinen La—Ka Nyi Me Er a Uma Wama?—U̱ Umbur Akaa a ken Ijime (6:54)
Shi nenge atôakyaa agen kpaa a i ne ve i doo u u tsegha iyol you yô.
“Doo u Ú Tsegha Iyol You sha Ci u Yehova sha Ci u Nyi?” (Iyoukura, Janawari 15, 2010)
Nenge er vidio ne i tese er i saan mba ve tsegh ayol a ve sha ci u Yehova iyol yô.
Nenge kwagh u yange mgbegha kwase ugen u henen sha kwagh u a hembe lun un kwagh u vesen la ken ngeren u, “Yange M Shi Pinen Mer, ‘Er Nan Jim Se Va Lu Heene?’” la.