ITYOUGH 47
Kuma U u Eren Batisema Vee?
Er u lu henen Bibilo ne, u hen akaa kpishi sha kwagh u Yehova. Alaghga u sôr akaa agen ken uma wou sha er uma wou una zua sha kwagh u u lu henen ne yô. Nahan kpa, alaghga kwagh ngu u a lu yangen we u tseghan iyol you sha ci u Yehova shi eren batisema yô. Ken ityough kin, se lu timen sha akaa agen a ka a na ve i taver ior kpishi u eren batisema man er u fatyô u hemban mbamtaver mban yô.
1. Gba u u fa Bibilo nan ve u kuma u eren batisema?
Cii ve u kuma u eren batisema yô, a gba u u lu a “mfe u mimi u vough la.” (1 Timoteu 2:4) Kpa kwagh ne tese ér saa u fa hanma kwagh ken Bibilo cii ve u kuma u eren batisema ga. Mbakristu mba ve er batisema shighe a kar je kpa, ka ve za hemen u henen kwagh her. (Mbakolose 1:9, 10) Nahan kpa, gba u u fa atesen a Bibilo a vesen a ka i gba u or a hii fan la. Wea soo u fan aluer u ngu a mfe kuma u eren batisema yô, lam a mbatamen mba ken tiônnongo sha er vea wase u yô.
2. Ka akaa a nyi i gbe u u er cii ve u er batisema?
Gba hange hange u u ‘gema ishima, u hide hen Aôndo’ cii ve u kuma u eren batisema ye. (Ôr Aerenakaa 3:19.) Inja na yô, u vaa afanyô sha akaabo a u er ken ijime la, shi u zamber a Yehova wer a de u a asorabo ou. Shi u de akaa a Aôndo a vende la shi u kange ishima wer u eren kwagh ken uma wou sha gbenda u a doo Aôndo yô. Heela tseegh ga, u hii u eren akaa imôngo vea tiônnongo, u zaan mbamkombo shi u pasen kwagh vea tiônnongo.
3. Er nan ve i doo u u cia u eren batisema ga?
Mbagen ka ve cian ér vea va fatyô u eren kwagh u ve tende zwa a Yehova ér vea er la ga. Ka mimi, ashighe agen u er kwagh shami ga di vough er nomso man kasev mbacivir Yehova mba i ôr kwagh ve ken Bibilo la nahan. Nahan kpa, Yehova ver ishima ér mbacivir un ve lu vough a mshi shio ga. (Ôr Pasalmi 103:13, 14.) Ka wea er kwagh u u fetyô cii yô, i doo un kpishi! Una wase u. Yehova kaa a vese je ér, kwagh môm “una yange [un] u tesen se dooshima na” ga.—Ôr Mbaroma 8:38, 39.
HEN KWAGH I ZA SHIMI
Nenge er aluer u seer fan Yehova shi u suur sha a na wer a wase u ve, u fatyô u hemban hanma kwagh u ma a yange u u eren batisema cii yô.
4. Seer fan Yehova
Gba u u fa Yehova a kuma nan ve u er batisema? Gba u u fa un tsembelee, una doo u ishima shi a sar u u eren ishima na. Nenge VIDIO i i lu heen ne sha er u fa er nomso man kasev mba sha ajiir kposo kposo mba ve hen Bibilo yô, ve er kwagh ne yô. Maa lam nen sha mpin u a dondo ne.
-
Vidio la tese ér, ka nyi yange i wase mbagenev u wan agoyol eren batisema?
Ôr Mbaroma 12:2, maa lam nen sha mbampin mban:
-
U ngu a akperan sha kwagh u Bibilo i tese, shin aluer Mbashiada mba Yehova mba tesen ior mimi yôô?
-
Aluer ka nahan yô, ka nyi u fatyô u erene?
5. Kwagh môm a de yangen we u eren batisema ga
Se cii ka sea tsegha iyol yase sha ci u Yehova, sea er batisema yô, se tagher a mbamtaver. Wea soo u nengen ikyav i kwagh ne yô, nenge VIDIO i i lu heen ne, maa lam nen sha mbampin mba ve dondo ne.
-
Vidio la tese ér ka mbamtaver mba nyi nahan yange gba u Narangerel una hemba sha er una civir Yehova?
-
Yehova yange doo un ishima nahan kwagh la wase un u hemban mbamtaver mbara nena?
Ôr Anzaakaa 29:25 man 2 Timoteu 1:7, maa lam nen sha mpin ne:
-
Ka han ka se zua a ishimataver ve se hemba mbamtavera?
6. Suur sha Yehova wer a wase u
Yehova una wase u u eren ishima na. Nenge VIDIO i i lu heen ne, maa lam nen sha mbampin mba ve dondo ne.
-
Vidio la tese ér ka nyi yange i na ve orhenen Bibilo la lu soon u eren batisema ga?
-
Ka nyi yange hen ve i wase un u seer suur sha Yehova?
Ôr Yesaia 41:10, 13, maa lam nen sha mpin ne:
-
Er nan u lu a vangertiôr wer u fatyô u kuren iceghzwa i u er a Yehova laa?
7. Seer tesen iwuese sha dooshima u Yehova la
Aluer u ngu henen sha gbenda u u doo Yehova ishima la seer a seer yô, u hemba lun a iwuese shi kape u soo u civir un gbem sha won je la. Ôr Pasalmi 40:5, maa lam nen sha mpin ne:
-
Ka averen a Yehova a nyi nahan u hemba wuese ciilii?
Yehova yange doo profeti Yeremia ishima shi soo Mkaanem nam kpaa, shi yange lu un kwagh u icivirigh kpishi er i lu yilan un sha iti i Yehova yô. A kaa ér: “Akaaôron a Ou hingir mo iember man msaanyol ken ishima yam; gadia i yilam sha iti You je, TERE, Aôndo u akum a Sha.” (Yeremia 15:16) Na ase mlumun sha mbampin mban:
-
Er nan ve i lu kwagh u icivirigh kpishi u lun Orshiada u Yehova?
-
U soo u eren batisema, hingir Orshiada u Yehova?
-
Kwagh ngu u a lu yangen we u eren nahan yôô?
-
Ka nyi u nenge wer gba u u er sha er u er batisema?
IOR MBAGENEV KA VE KAA ÉR: “M ngu cian mer me er batisema yô, me va fatyô u eren kwagh u m tôndo zwa la ga.”
-
Kape we kpa ka i lu u laa?
KA NYI U HENE?
Sha iwasen i Yehova yô, u fatyô u hemban nyityôkwagh i i lu yangen we u eren batisema la cii.
Mbampin mba umbur kwagh u i hen yô
-
Doo u u fa Bibilo a kuma nena ve u er batisema?
-
Ka akaa a nyi i gbe u u er ve u kuma u eren batisema?
-
Er nan i doo u u cia u eren batisema ga?
SEER HENEN KWAGH
Nenge kwagh u i doo u una na ve u soo u eren batisema yô.
Hen er u hemba akaa a alaghga a lu yangen we u eren batisema la yô.
“Ka Nyi Je I Yange u Eren Mo Batisema?” (Iyoukura, Maaci 2019)
Nenge er orgen yange hemba akaa a vesen a tagher a mi la sha er una er batisema yô.
Sha hiihii la, lu taver orgen u i yer iti na ér Ataa yô, u eren batisema. Nenge kwagh u yange wase un ve taver ishima er kwagh u injaa ne yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
