ITYOUGH 55
Wase Tiônnongo Wou
Ior umiliôn mba civir Yehova saan saan ken atôônanongo udubu udubu sha tar. Ka i doo ve u dondon akaa a i lu tesen ve la, shi ve kegh iyol u wasen tiônnongo sha igbenda kposo kposo. We kpa kape ka i lu u ken ishima a tiônnongo wou laa?
1. Ka sha igbenda i nyi nahan u fatyô u eren tom a shighe man agee ou u suen tiônnongo?
Se cii se fatyô u wasen tiônnongo. Ikyav i tesen yô, mbabeenyol shin mba lun kor kor mba ken tiônnongo wouwee? U fatyô u wasen ve, tôôn ve zan a ve mkombo? Shin u fatyô u za wasen ve sha akaa agen, er u za yemen ve akaa ken kasua shin sôron ve ya nahan kpa? (Ôr Yakobu 1:27.) Shi se fatyô u wasen tom u sôron shi nengen sha Iyou i Tartor yase. Akaa ne cii ka se er a ishima yase, or kighir se ga. Er Aôndo kua anmgbianev asev ve doo se ishima yô, kwagh la ka a mgbegha se, se ‘na ayol a ase sha asema’ a ase.—Pasalmi 110:3.
Mbashiada mba ve er batisema yô, vea fatyô u wasen tiônnongo sha igbenda igen kpaa. Anmgbianev mba nomso mba ve kom yô, vea fatyô u hingir mbashiren tiônnongo gayô mbatamen. Anmgbianev mba nomso man mba kasev cii vea fatyô u suen tom u kwaghpasen la sha gbashima, sha u eren pania. Mbashiada mbagenev vea fatyô u wasen tom u maan ajiir a civir Aôndo gayô yemen hen tiônnongo u i gbe u a wase un sha igbenda igen yô.
2. Se sue tiônnongo sha inyaregh yasegh shin sha akaa a se lu a mi la nena?
Se fatyô u ‘civir TER sha inyaregh’ yasegh. (Anzaakaa 3:9) Ka i lu se kwagh u icivirigh kpishi u eren iyua sha inyaregh yasegh kua akaa a ase agen sha u suen tiônnongo kua tom u pasen kwagh u i lu eren sha tar cii la. (Ôr 2 Mbakorinte 9:7.) Shi ka i wase anmgbianev mba aahe shin kwagh u vihin tsung a er ve yô a uiyua asev mban. Mbagenev ka ve “ver kwagh” hanma shighe sha er vea er iyua yô. (Ôr 1 Mbakorinte 16:2.) Se fatyô u eren iyua shin mbaakwati mba ka i ver ken ajiir a ase a civir Aôndo la, gayô za eren iyua hen ijiir yase i sha Intanet i donate.pr418.com la. Yehova na se ian i tesen ér un doo se ishima sha gbenda u se eren kwagh a akaa a se lu a mi la.
HEN KWAGH I ZA SHIMI
Nenge igbenda i u fatyô u suen tiônnongo yô.
3. Se fatyô u suen tiônnongo sha akaa a se lu a mi la
Mba ve ne kwagh sar sar la ve doo Yehova man Yesu ishima. Ikyav i tesen yô, Yesu yange wuese kwasecôghol u lu a inyaregh kpishi ga kpa na Yehova kwagh la. Ôr Luka 21:1-4, maa lam nen sha mbampin mban:
-
Saa se er iyua sha inyar kpishi ve a doo Yehova a vese yee?
-
Ka sea er iyua a ishima yase cii nahan i lu Yehova man Yesu ken ishima nena?
Wea soo u fan akaa a i eren a uiyua asev yô, nenge VIDIO i i lu heen ne. Maa lam nen sha mbampin mba ve dondo ne.
-
Ka i er tom a uiyua asev u wasen atôônanongo sha tar cii nena?
4. Se fatyô u nan ayol a ase u wasen
Sha ayange a i ngeren Bibilo la, mbacivir Yehova yange ve er tom kpoghuloo u nengen sha ajiir a ve civir Aôndo ker la. Kpa kwagh ne yange hemba di u ve eren iyua sha inyaregh vev tseegh tsô la. Ôr 2 Kroniku 34:9-11, maa lam nen sha mpin ne:
-
Hanma Oriserael yange nan wase u nengen sha iyou i Yehova shin sha ijiir i ve civir Aôndo ker la nena?
Wea soo u nengen er Mbashiada mba Yehova ve dondon ikyav i ken Bibilo ne yô, nenge VIDIO i i lu heen ne. Maa lam nen sha mbampin mba ve dondo ne.
-
Gba u se sôron Ayou a Tartor ase shi se nengen sha mi tsembelee sha ci u nyi?
-
Ka sha igbenda i nyi nahan u fatyô u wasene?
5. Anmgbianev mba nomso vea fatyô u nôngon sha er vea kuma u seer eren akaa a wasen tiônnongo yô
Ruamabera taver anmgbianev mba nomso ishima ér ve nôngo ve kuma u eren akaa sha u suen tiônnongo. Wea soo u nengen ikyav i kwagh ne yô, nenge VIDIO i i lu heen ne. Maa lam nen sha mpin u a dondo ne.
-
Ken vidio la, Ryan er akaa sha er una hemba suen tiônnongo nena?
Bibilo tese kwagh u anmgbianev mba nomso vea er ve vea kuma u lun mbashiren tiônnongo shin mbatamen yô. Ôr 1 Timoteu 3:1-13, maa lam nen sha mbampin mban:
ALAGHGA ORGEN NANA PINE ÉR: “Mbashiada mba Yehova mba zough a inyaregh ki eren tom ve hana?”
-
We u na mlumun wer nyi?
KA NYI U HENE?
Ka sea na shighe wase man agee kua akaa a ase sha u suen tiônnongo nahan i doo Yehova a vese kpen kpen.
Mbampin mba umbur kwagh u i hen yô
-
Se fatyô u nan shighe wase man agee a ase u suen tiônnongo nena?
-
Se fatyô u suen tiônnongo a akaa a ase nena?
-
Ka sha igbenda i nyi nahan u soo wer u sue tiônnongo?
SEER HENEN KWAGH
Nenge er i hii ve Aôndo a kera kaan ér saa mbacivir un vea naan môm-ken-upue hegen ga yô.
“Ka Nyi Bibilo i Ôr sha Kwagh u Nan Môm-ken-Upue?” (Ngeren u sha Intanet)
Bibilo tese ér ityom igen ka anmgbianev mba nomso mba ve er batisema la i gbe u vea eren ye. Nahan zum u i gbe u anmgbian u kwase u nan er batisema nana er ityom shon yô, ka nyi i gbe u nana ere?
“Tahav mbu I Ne Mbatamen ken Tiônnongo La” (Iyoukura, Febewari 2021)
Nenge er Mbashiada mbagen mba taver ishima ka ve nôngo kwagh sha er vea za na mba ve civir Yehova imôngo ityakeda yô.
Tom u Samber a Ityakerada i Pasen Bibilo ken Tar u Congo (4:25)
Hen fa er gbenda u se zuan a inyaregh ki eren tom wase la u kaha kposo a gbenda u ukwaghaôndo mbagen ve zough a mi yô.
“Ne Mba Zough a Inyaregh Ki Eren Tom Wen Hana?” (Ngeren u sha Intanet)
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
